因為今日約左收電視櫃，我同太陽哥哥一放工就返青衣．．．之後仲要去傢俬鋪講返ｄ細節，費事再造得唔好口同鼻坳；去傢俬鋪時經過涌美，休剛打黎，傾傾下我問佢係邊，一唔一齊食飯；點知佢剛係屋企，原本CW會上黎同佢食飯，既然咁岩，佢地就join埋我地一齊去青衣城食飯，我地去左扒王之王！
大潛艇係青衣城扒王特色之處，係度住左十幾年都未影過！哈哈～～
我地掛住食都唔記得影相，到太陽哥哥個碟黎先記得．．．
之後索性用佢個碟影晒，當大家都食呢個餐啦！
呢餐飯因為有點意外，食左成兩個幾鐘，雖然食得耐，但一ｄ都唔覺得悶，反而食得好開心，因為我地四個大談男女之道，呢個係講唔完既話題，大家都開放自由咁發表左唔同既意見同睇法；無論係純分享又好，係順便借題暗示又好，呢餐飯大家都食得開心，又帶到野走，幾好幾好，唔錯唔錯，希望有機會同郭氏食多ｄ飯啦！
呢兩日假日都冇同太陽哥哥出街，尋晚就約左傢俬鋪上黎傾個電視櫃有咩問題，點知臨尾個邊話唔上黎傾喎，一係減二百叫我地照要個櫃，一係約過上黎搬走重新造過；太陽哥哥揀左後者，佢地星期一會黎搬走．．．因為叫左媽咪煮飯我地食，我地就照舊留在家，順道睇宮心計！
到今日，都冇咩意慾出街，睇戲又怕太陽哥哥中眼訓，我又趕緊ｄ旅行網誌，最後決定都係唔出街，繼續留係屋企，睇埋宮心計大結局！
呢兩日既結局篇好好睇呀，我諗香港好多人都中左毒，會留係屋企追！哈哈～～套劇完左後有ｄ失落呢，不過對我黎講都好既，因為又要追宮心計又要追富貴門，連追兩套劇都幾吃力呀！尤其去完旅行返黎要追返十集，好攞命，宜家追少套舒服好多！
馬仔都有追宮心計呀，佢仲畫左幅超爆笑宮心計圖，我一見到就笑啦，好姣好似呀！
呢幅我睇完好有同感l，因為勁貼我既心聲，相信好多OL都係！因為夜晚睇唔切，返工一到lunch就即上TVB，追返未睇既集數，好攪笑呀！
仲有其他近來既馬仔圖同大家分享下，睇下邊ｄ似您地既心聲啦！
好鍾意將繁重既工作由接唔完既電話幻想成燒味，苦中作樂，馬仔好有創意呀！
