2009-01-29 (Thu) 年初四．媽咪生日

         

今日係媽咪西曆生日，咁岩係初四，所以我就請多一天假慶祝媽咪生日；琪琪同威哥本身都放緊假，當然都一齊慶祝啦！我地計劃午餐就四個一齊去食buffet，夜晚就等埋太陽哥哥放工一齊食！

         

我地去左日航酒店食buffet呀，因為知道有以下呢個優惠，而我同媽咪都係一二月生日既，四個入面兩個都有生日優惠，而琪琪同威哥仍然有匯豐信用咭八折優惠，非常抵食！

         

我地第一次試日航，以二百元的自助午餐黎講，呢度都算多野食，有成八個corner拎野食！

         

呢度環境都唔錯，今日天氣又好，成個落地玻璃望過去都幾好feel！

我地三個細路好鍾意呢度即煎既牛扒羊扒，真係好正，我食左成四件！

         

媽咪好開心呀，今日一叫佢影相佢就扮可愛教主，仲叫我地一齊擺甫士添，笑爆咀！

         

睇下我食左ｄ咩啦，好多好多．．．飽到嘔，呢度的兩個中西湯都好好味，又足料，中湯個煲一撈起，冬菇一舊舊任您"不"！

         

甜品時間啦，食過咁多次自助餐，呢次係第一次拎咁多返埋位，剛好十五款，仲未齊架，如果要一款不漏咁拎晒，怕食唔晒就大煲啦！

         

可愛教主同十五款甜品合照（哈哈!!）：

         

最終係．．．全部食晒！只係有少少唔好味既唔要，好在有四個人，而四個人都會每樣食四分一咋！

         

大家食到捧住個肚走，因為太飽，睡魔急call，開始眼訓，原本諗住過科學館行下都放棄了，媽咪話搭的士返屋企休息喎，雖然覺得特登走左出黎尖沙咀都唔周圍行下好似好晒咁，但今日係媽咪生日，壽星女話事啦！

         

返到屋企後我地個個都訓晏覺，訓醒夜晚個餐都唔知點算，成七點都未覺肚餓，但太陽哥哥講明要請媽咪食生日飯，最終去左葵芳食，威哥本想去和民，但要等成廿張檯，可能仲係年初四吧，好多人都出街食飯；最後去左雪國，開左幾個月我都未試過就試下啦！

         

我地四個最飽，都冇咩食慾，都係每人叫個dinner set就算了，反而太陽哥哥就好肚餓！

媽咪的生日就係食食食中渡過，由新年到宜家，個肚日日都咁飽咁漲，真係幣家火！係度希望媽咪身體永遠都咁健康、青春常駐、長病百歲、日日都開開心心咁過！