玩完小型賽車後只係三點半，時間尚早，我地就搵下邊度有得碌齡消磨下時間；得太陽哥哥天地線raymond協助，係華麗路個度有個齡場，又近我地夜晚食野既樂園路，非常perfect！
呢度$18一局加$5租鞋，連埋一對襪，我梗係唔會換上呢對紗布襪啦，咁超薄網面，只係套係我對靚襪外面咋，哈哈！
呢間齡場設施唔錯，電腦系統仲快過同正過香港的迪高，換樽又快，只係幾秒間，好專業！仲有茶水提供，工作人員一見飲完就係咁添係咁添，服務一流！
柱上的警告，令我諗起呀漢呢，哈哈！
仲有高分獎勵，可惜我地冇人過180分！
跟平時一樣，我地分租比賽，第一局字母組贏數字組！
字母組：
數字組（鑫去左接wing所以不在場）：
第二局都係字母組贏數字組，數字組真黑仔！
碌完齡六點半，天黑了，鑫剛接埋wing到達，時間岩岩好，我地就由華麗路步行到樂園路食海鮮！
去了平時跟raymond食過個間酒樓，我冇記錯之前都黎過兩次了，原來wing佢地都黎開呢間；我地平時坐地下，今日超多人，上了二樓！
我同wing同太陽哥哥負責落樓下點海鮮，我地點左好多呀，張單長到寫唔晒！
二樓環境好似差ｄ，侍應又忙過不停，叫極都唔埋黎，服務欠佳！
檯底的奇景，由於侍應叫極都唔埋黎，班嘩鬼丟晒ｄ包住餐具既膠套筷子套落檯底！
我地叫左好多海鮮，包括：２斤蟶子、１斤東風螺、２斤蜆、１斤蝦、10隻蠔、20隻鮑魚、18隻帶子！
呢個炸饅頭好金好靚，係飯後甜品！連埋兩碟菜、雞一隻、半打南瓜餅、椒鹽鮮魷、京都骨、西蘭花鮮魷等等，埋單只係五百幾，十個人每人只係五十幾蚊，超值！相比起早餐，呢餐抵食好多呀！
食完飯八點半，跟住call左瑪雅城專車去揼骨！
呢個係旅程最後一站啦，大家係骨場門口影返張團體照先！
兩年前我地都係黎瑪雅城揼骨，事隔兩年，又唔係舊左好多，各方面都保時水準，仲換左新服裝添呢！今次套衫，我覺得男既豹紋，女既虎紋，好威猛，女仔紅紅地仲好有新年氣氛添！
健今次單人匹馬，我估佢好少上黎呢，佢好愕然餐海鮮餐咁抵，揼骨後仲係度開埋會員咭，睇黎佢下次應該會帶puiyee上黎玩呢！
我係咁叫太陽哥哥做"豹哥"呢，哈哈！
回顧返兩年前的玩樂場面啦，記得明記當時玩完簡直愛上呢度呢！
請大家仔細看看，一樣的衣著，一樣的拖鞋，聯想到甚麼？似夠鐘放出來休息的囚犯嗎？哈哈！
今次我地開了間十二人房，間房非常大，成班人一齊揼骨，感覺勁開心呢！係健麻煩ｄ，竟然因怕羞而唔同我地一間房，要自己一間房，哼！佢應該未揼過骨吧，係咁問我點揼，我就介紹佢推油，因為我身體好敏感同怕痕，就咁揼骨我會忍唔到痕笑不停，推油雖然貴少少，但我覺得舒服好多同唔太痕，仲可以揀我鍾意的薰衣草味，成身香噴噴，又有酣睡作用喎！健都跟我推油，但一知道要除衫就話要自己一間房，早知唔同佢講啦，唉，激死！其實怕咩，我地熄晒燈，都睇唔到，我地間房九個人除左我，休同cw都推啦，一齊一間房開心好多麻，我地全程又吹水又玩IQ題，連技師都一齊講，不知幾開心呀！分道揚鑣時，我仲教呀健記得同技師要求推油要 "酸 yi 摷"(薰衣草國語讀音)味道添！
等技師時我地又發癲啦！
太陽哥哥又變馬騮啦！
其實熄晒燈我地都睇唔到大家架，呢張相係臨尾用閃燈影既，因為佢地三個要求試下踩背，咁既壯觀場面梗係要影低啦！
揼完骨大概十二點，明記佢地話要打乒乓波，最後玩到約凌晨一點就沖涼走人啦！全日旅程玩足十多個鐘，非常盡興，就此劃上句號，希望一班人再有機會好似今日咁多ｄ去旅行啦！
沒有留言:
張貼留言