今日唔知咩日子，我同太陽哥哥都互相送上驚喜，可惜．．．
事緣係今日我要返part-time，返工時我會較震機，原來太陽哥哥send了個sms比我叫我放工去starbucks幫佢買cake(其實佢係starbucks入面等緊我諗住嚇我一跳)，但我放工後又冇睇電話就雞咁腳咁走，因為我都趕住返去比個驚喜佢麻．．．今日理應一出大廈行右邊搭巴士既(starbucks都係右邊)，但咁橋elsa話帶我去萬寧睇ｄ野，於是就出左大廈後行左邊，緣慳一面，上演了一幕向左走向右走咁．．．
到我上到巴士睇電話先見到個sms，但已太遲了．．．太陽哥哥好失望呀，我都係．．．平時接我佢都會企係大廈門口既，我問佢今日仲咩係starbucks入面等喎，佢話諗住比個驚喜我麻，仲係同朋友係旺角食完飯，特登過海返過黎等我架，唉．．．佢唯有搭我之後班車，相約係落車個站等啦．．．
講返我個驚喜，今日係克勤出新碟的大喜日子，原本諗住要返工都買唔到架啦，但又好想買黎送比太陽哥哥喎，好在搵到elsa幫我手咋，真係太好啦，我好想炸炸林比太陽哥哥呀，我驚佢會買左麻．．．
雖然白白晒左佢特登過海接我的心意，但大家一見面都冇咩唔開心，行返去時傾計，佢仲話頭先係旺角見到克勤新碟MV呀，我個心好驚呀，怕佢買左，咪問佢：咁您有冇買呀？好在佢話：冇呀，費事晒錢啦！我個心即刻鬆晒，哈哈！（其實我都覺得ＣＤ冇咩用架，出街又只會用MP3，係屋企有幾何開ＣＤ機聽丫；不過對太陽哥哥呢個克勤超級粉絲，我實會買黎氹下佢開心既！）
返到去，原本諗住放係notebook上面跟住扮行開左，但佢又話要用電腦，話想即刻download克勤ｄ歌喎，係度捕住晒，頂~~ 個刻勁想叫佢彈開陣囉！哈哈！
唉．．．隻ＣＤ就快交到您手上，仲掛住download，激死人！
我唯有出返廳啦，諗緊放係邊好啦，係檯面見到太陽爸爸留比我帶飯碟炒烏冬喎，因為太陽爸爸冇我個飯盒，所以放係檯面，等我返黎裝，而次次都係太陽哥哥幫我裝落飯盒度再擺入雪櫃架．．．靈機一觸，一於放係碟炒烏冬個底度先．．．
跟住用返個蓋吸住先，哈哈！成功！Yeah～～
不過太陽哥哥掛住download，過左十分鐘都未捨得出黎幫我裝好ｄ烏冬呀，等到我呢．．．跟住見佢有所舉動，我就特登唔出廳，係廚房門口度扮洗臉，攪呢攪路，從而係鏡反射下睇下佢見到有咩反應啦，點知．．．佢盲左咁呀，拎起個蓋、跟住拎起碟烏冬．．．完全若無其事，我見到反應係．．．Ｏ晒咀！！！
點解可以成碟烏冬拎起左都見唔到隻ＣＤ架？？仲一路幫我將ｄ烏冬裝落飯盒度成一分鐘，都完全見唔到隻ＣＤ係檯面？我心諗．．．唔係麻，唔通佢一早知道已經收起左隻ＣＤ反玩返我？
結果係．．．佢裝好晒成個飯盒，行埋入廚房放雪櫃，返出黎收返個蓋先見到呀！唉．．．我扮洗面洗到皮都甩晒佢先見到呀！
不過佢好驚喜，睇住佢個表情：「咦？？？！！！」咁，成功送上驚喜我都好開心，哈哈！之後我狂笑，問佢係咪盲左呀，佢話佢真係冇為意，仲吹水話一心一意好專心咁幫我裝緊ｄ烏冬，冇留意其他野喎！唉．．．笑死人咩！
沒有留言:
張貼留言