今日約左DiDi，平時佢返香港，就唔到時間見面都冇所謂，咁多年朋友，一切在心中麻；但今次唔得，因為有野要比佢，就係媽咪織比悠悠的小外套！
媽咪仍然係屋企狂織小朋友衫呀，近來的顏色仲係我好鐘意的ＢＢ黃呢！呢件小外套就係織比悠悠既：
除左小外套，呢件短袖都係媽咪的新作，仲有其他架，再同大家分享啦！
不過只係見左悠悠幾分鐘咋，因為佢地趕住去拜年，佢地返黎日日都好忙呢！DiDi好鍾意件小外套呀，估唔到話有野比佢原來係件溫暖牌，好驚喜呢！佢地仲比左四封利是我，點解咁多封呢？原來比埋太陽哥哥喎，連太陽哥哥都未見過都比埋佢，真係very nice喇！我同太陽哥哥逗到利是都好開心呢，返去又可屈下佢，哈哈！
除左利是，DiDi送左份禮物比我，新年流流攪ｄ咁既野呀，仲大盒裝添，不過真係好似，哈哈！
Choco is better than sex！人地extra XXX，佢就 extra chocolate，真係攪野！ 一盒有九個套既，不過比我用(食)左一個，所以影相時剩返八個咋！朱古力味，好好味！哈哈～～
仲要有隻兔(套)仔添，好頂癮呀！哈哈～～
今日年初五啦，好多人仲放緊假，但我就要開始返工了，不過好在係happy friday，返一日又放過，心情仍然似放假咁返工，哈哈！
一返到去係檯面見到yammy的禮物，估唔到會有開年禮物，哈哈！佢知我鍾意飲朱古力奶，所以行年宵買了份新年禮物比我呢！
保存期限仲係 "直到永遠"喎，好冧啫！哈哈~~
心情咁開心，因為放工有節目，約左呀仔同hazel食晚飯兼逗利是，跟住一齊去睇brad pitt！
一陣睇戲係百老匯電影中心，我地就去左女人街食，去左一向覺得好味，但又唔太抵食的diamond餐廳；如果大家好記性，呢度對我同太陽哥哥都有ｄ意義架，不過今日先知原來呢度係呀仔介紹比太陽哥哥既，真係多得呀仔啦，哈哈！
呢度ｄ野食樣樣都好味，但細碟囉，我地叫左四個飯同意粉，埋單就接近五百蚊咁滯啦，呢度係女人街咋喎；不過雖然唔太抵食，但我好鐘意黑松露汁既野食，一口痕想食黑松露汁，就會諗起呢度架啦！
睇"奇幻逆緣"因為被得意的故事吸引，太陽哥哥講先知原來成三個鐘！
睇後感係一半半，頭一半好悶好悶，太平舖直述，可能老人家故事無咩特別啦；但去到中間，由中年開始，有ｄ愛情關係，開始覺得好睇，直到去到青年小朋友都唔錯，所以感覺係一半好睇，一半唔好睇！
睇完仲有樣野好出奇，就係呢套戲成三個鐘，兼有一半係悶既，但太陽哥哥竟然．．．全程冇訓過覺！奇蹟呀～～哈哈！！個幾鐘的波兒佢都可以訓左一半，好難想像呢套三個鐘既戲，佢一分鐘都冇訓過，可能對佢黎講太好睇吧！
想同太陽哥哥睇戲，原來一至五先係黃金時間，以後星期六日謝絕睇戲呀！
