丁媽媽: 2007-12-25 (Tue) Christmas Pary at Alex's Home

2007年12月25日星期二

2007-12-25 (Tue) Christmas Pary at Alex's Home

今日係聖誕正日，係度同大家講聲merry christmas先！

每年聖誕，我地碌齡班朋友都會係alex屋企開party，我冇記錯的話，今年應該係第五年啦，起碼呢五年既相我都有keep；除左2004個年我唔係香港外，我年年都有份參與架！

今年有琪琪的加入，我地先同媽咪食個christmas dinner先，媽咪好好，為左方便我地食完開party，揀左係美孚"牛車水"度食！威哥仲送左一份小禮物比我，對我，佢咁做已經好有我心了！影相時媽咪仲學太陽哥哥單眼呢，真係盞鬼！

食完我地拿拿林去alex屋企，因為大家都食完野等緊我地啦，今年有幾位新朋友，集體遊戲隨即展開！我一見到karen叠list，好surprise呀！有晒rundown有晒rules，仲係全電腦printout，好明顯佢花左好多時間同心思係個party度，咁都係為大家玩得開心，係度真係要好多謝karen！因為通常個個只會掛住玩，玩時只顧要win，跟住犯規，忽略了呢ｄ咁好玩既時刻，背後係有人絞盡腦汁去諗去度，玩完又散band，唔記得要多謝人呢！so，多謝karen！

我地分左三隊，先黎隊長solo~~

跟住各人傳波波，睇下大家功架咩level，方便隊長揀選至fit隊員！

跟住有吹蠟燭，各人面部表情非常攪笑！休隊win左呢個game，因為明記吹野真係好勁，果然有一手，大家睇片啦！

之後有爆波問答比賽，邊隊係未講出答案前爆波就輸，我係度揀左幾個短片比大家睇，過程好緊張，聽尖叫聲就知！原來睇人玩同自己玩好唔同的，睇人玩，會覺得ｄ問題咁易，咁都答唔到；但原來唔係難or易的問題，而係輪到您時，而您又見個波好大，個刻會好驚，真係會諗唔到野架！

跟住有演戲game，正所謂我地個個文又得，武又得，簡直文武雙全！其實都係鬥快令隊長估中演緊邊一套童話故事姐！我咁好戲，呢part我地個隊win左呀！

跟住有大家每年期待已久的大電視，點解咁期待，咪因為問題全都係三級架，哈哈！最勁都係休隊，因為有明記係度，真係勁，大家睇片啦，非常爆笑，拍晒手掌，聽到ｄ笑聲就知！

其實太陽哥哥都識唔少野喎，琪琪新人黎講，都算好落力了！

跟住有味分天下的扮野遊戲，各隊要估邊杯野先係好味呢？當中不泛好戲之人，不如大家又估下，短片分三段，您地講出邊杯係好味既，我過兩日開估！

剛剛呢個game，我地個組既非洲同wing簡直係影后影帝，因為對敵兩隊都同時估錯；亦因為咁，我地呢局扭轉局勢，升到第一名，拎左冠軍，仲有royce朱古力為禮物呢！

跟住第二名同第三名，第三名的懲罰就係執屋同洗野喇！

大家休息一陣，跟住就係交換禮物時間！

嘩，一共有十六份禮物！

係時候拎住禮物影團體照啦，買左部好玩既相機果然唔同ｄ，我set左十張自拍，大家影得好開心；但中段有人開始製造惡作劇，從後推前面既人，大家留意第五張，張相冇左我個樣架，我去左邊呢？咪就係比人"禁"在落地下囉，而我亦奮力要起返身呢(第六張)，紮衡馬步繼續影(第七張)！

咁好玩，玩多次！呢次試下轉位，開頭都ok，中段又黎料，個個搶住做主角霸頭位，越推越前，見住企後排的人亦逐一放棄；亦有人爭唔到靚位用盒twister擋住人地塊面唔比人上鏡，真黑心同無品！哼！最後黎個對住鏡頭啜返啖，明年再見啦！

跟住拆左盒twister玩，玩到出現以下攪笑場面，明記仲因為位置問題，焗住同非洲出現好多親密接觸呢，哈哈！

之後我地用頭先大電視剩餘既題目，唔好晒，玩埋佢，由我同明記做，大家估，都幾攪笑同咸濕呢！

搵返2003、2005、2006的聖誕party合照比大家睇下先，2004年我一唔係度，大家就唔記得影相喇！2005年應該係最多人了，alex屋企放得落咁多人，真係好勁呀！所以話呢，平時一定要影多ｄ相，睇下，呢度已經有四年前既相，睇住大家既變化，真係一個好好既回憶黎架！所以希望下次當我叫大家影相時，大家合作ｄ，唔好鬼殺咁嘈又話"又影呀"咁啦！