今日返工前去左睇醫生，左腳同一位置又痛了，真係奇，兩次一冇著波鞋就發炎，今次就係去健婚禮著左靴，唔係咁誇一日唔著都唔得呀．．．book唔到睇開的醫生就wallk-in，睇左個出晒名唔得的郭醫生，佢好長氣，睇左成十五分鐘，大部份時間都係講野，仲滿口英文，雖然長氣，但佢講既野又唔係冇point，佢一睇我以前ｄ病歷，就話我無可能係痛風，係發炎only，要做多ｄprevention，比如著鞋方面同做運動，咁就減少發炎機會；佢仲串到用支筆篤上次醫生寫我ｄ紀錄，話佢都唔知點攪，驗過幾次血仲驗，都唔係痛風，跟住仲寫左"young women won't have gout!!"係我病歷度，好似想下次比個醫生睇咁！型！哈哈！我話我放xmas放好長假，叫佢比多幾日藥，佢好樂意，仲話應該要放ｄ係屋企有事時可即刻食到！我估佢頂多比十日藥，點知．．．嘩，成廿日都有，好呀，咁我可以放係屋企看門口啦！
返到office有件事發生左，其實始於昨天，如果大家細心的話，會見我尋晚影ｄ相都眼腫腫好殘咁，其實因為office發生左件不愉快事件，仲攪到我忍唔住喊左好耐！
大致係關於我有批數比左account office，但個accountant一向態度麻麻，佢條靚又係做野亂晒龍既人，佢係電話度問左好多我唔清楚既野，但以我所知，佢地只係出數，唔需要理到咁詳細，正如Prof. Cheung同我講過，佢地蝦我就搵佢，佢會幫我；所以當時我叫佢將個問題email比我同Prof. Cheung，等我同Prof. Cheung了解好再答返佢；點知佢就串我話下下叫佢email佢咪唔洗做其他野！我咪話我冇下下喎，我第一次要求咁做，反而我email比佢地，佢地冇一次覆兼係要我打電話催佢地；跟住佢好激動，話我咁講唔岩，佢因為攪我地單野已唔理其他野即刻做左先，話冇唔覆我喎，跟住話我態度唔好．．．我好委屈，唔出聲，佢仲話我冇野可以講啦；跟住我就喊住講，我係度咁多年，都未試過比人話我態度差；佢仲講係我差先佢先差，嘩，要咁計，係咪男人黎架？但當佢聽到我喊時，就好轉左ｄ，話大家態度都有唔岩，可能都係緊張件事姐；但我冇應佢，因為真係喊到chok住講唔到野，佢之後仲攪笑，氹女朋友咁叫我唔好喊啦，我最驚咁架，笑返啦，當我錯晒，我同您sorry啦．．．一百八十度轉變，我同佢講我聽緊，只係講唔到野；到最後講完公事，臨尾佢問，您點呀？好ｄ未呀？唔好咁啦，我驚您以後唔搵我呀！好小事咋！我就話，我覺得對我都幾大件事，做左咁多年都未試過咁，我唔知．．．好多同事都見到晒．．．
今朝返黎，Prof. Cheung睇完我出既email，就即刻打比我，問我係咪account個邊為難我，我講左少少，我話個accountant要等佢老闆返再approve我地個case同仲有ｄ問題，Prof. Cheung睇住directory話唔識ｄ咁細粒既人（accountant個老闆），我都未講完，佢就急急收線去處理；十分鐘後佢同我講已攪掂，佢打左比account office最高級個個，即係睇晒咁多個section個財務長！嘩，好大喎．．．聽聞跟住財務長打比accountant個section既老闆，跟住個accoutant就比佢老闆照肺！
知道後有開心，亦有擔心，開心係自己老闆咁撐自己，佢仲同我講，下次一有問題即刻搵佢，唔好晒時間自己處理，有個咁錫自己既老闆，做野係方便得多同開心好多！但佢一向做野心急，佢係中大出名惡同有地位的人，但係佢姐，唔係我．．．今次佢幫我攪成咁，我有ｄ驚對我第時做野，點都有ｄ麻煩同尷尬，可能會再交手架麻；又或者，有朝一日我唔再跟佢，咪．．．
開心心情好快到下午，下午同聽日請左假，同太陽哥哥上樟木頭，都算係pre xmas celebration，我地好耐冇上去啦，有好多碟都未買；我地宜家想儲多ｄ錢，所以會盡量避開節日正日消費，呢個我當然都贊成，亦唔會唔開心，因為我地目標明確，儲多ｄ錢都係為大家將來，加上佢既錢等於我既錢，慳左我都有份既，而我既錢當然係我自己既錢啦，哈哈！
我地去到深圳買火車飛去樟木頭，之後係大快活食個下午茶醫肚先！
宜家火車改左高速，十五分鐘就到啦，好快！
酒店大堂有棵好大既聖誕樹呀！
酒店外貌，都好grand呢！
其實我地唔係第一次黎架啦，都黎過好幾次，之前太陽哥哥係廣州做野，我探完佢一齊返香港時順路都會過黎順便買碟，因太陽哥哥除左係電視精外，仲係戲精，屋企ｄ碟多到冇掟擺！黎過第一次覺得好靚好舒服，最緊要係近我地買開碟既舖頭，同埋我好鐘意既餐廳，之後都冇試過第二間啦！
今晚我地叫左三餸一湯，白飯任裝！
太陽哥哥仲帶左聖誕咭上黎寫，我就玩nds，今晚仲打爆左cooking mama 2，勁開心！煮完最尾款餸後，會多左一個獎，然後會出最後一味餸，名為"mama lunch box"，煮完後又會出多個獎，共三個獎，咁打爆機架啦！係咪好勁呢？嘻嘻~~ yeah~~
沒有留言:
張貼留言