.gif)
其實聽日先係同太陽哥哥的第十六個月紀念日，只係今日我隻腳要覆診，佢一早請左假陪我去，既然大家都放假，就趁機二人世界當慶祝啦！加上尋晚同今晚都唔返屋企食，聽晚想同媽咪食呀！
約左十一點，到落車都幾乎唔認得，太陽哥哥仲話我咁快就唔記得，曾經成日出入呢度喎！其實點會唔記得，掛住諗野唔記得落車之麻，哈哈！
呢度就係我每次睇醫生的私家診所，好high架，一ｄ都唔似係醫院入面，大半年前，我第一次黎睇醫生就係呢種感覺！唔掛之每次診金都一千蚊at least，走唔甩啦！
三四個月冇見醫生啦，覺得佢young左，有ｄ掛住佢呢，見到佢會有種親切既感覺，話晒我條命曾經交係佢手上喎！點少得同佢影相，點知佢即刻話：哈哈，您次次都鐘意影相喎！連醫生都知我鐘意影相呢！開頭覺得奇，我又唔係成日同佢影，梗係話冇呀，邊有次次喎；但諗返佢都講得岩，之前唔好講合照，當洗傷口、拆線、拆釘，我乜都要影住喎，可以講係相機隨身，佢又點會唔知呢！嘻嘻~~
講返腳先，今日親口從醫生證實，手術對我的腳起唔到咩作用，因為已彎返同以前差唔多了．．．醫生話有ｄ人天生關節柔軟ｄ，咁做完手術冇咩效果返返轉頭機會就會大ｄ，佢就屈下我ｄ手指、手踭、膝頭哥，話我屬中間，都軟軟地；而我就肯定太陽哥哥係屬勁硬型，佢一路睇住我做測試，一路自己屈，但佢ｄ手指係屈唔得向後既，所以呢種手術一定好岩佢，哈哈！醫生話無辦法，要睇下我舊骨個彎位之後多唔多痛or發炎，真係唔得先要考慮做第二個手術；第二個手術唔會再攪返之前個位喇，真係要做就會攪疤痕中間開始向下到腳中間個位，即係腳指公舊骨下面個條骨，成條向右移兼鑲螺絲．．．嘩，咁我條疤痕咪會好長．．．我都唔知呀，但我相信，年紀越大，舊骨應該會越彎，係咪應該後生做呢？但我短期都唔想再做手術了，首先傷口越前先越好麻，咁可以快ｄ落地行路，但如果咁開刀，傷口係腳中間，變相覆原時間會長ｄ；我係一個心急既人，之前行唔到路個種力不從心既感覺仲歷歷在目呀！
下次覆診係半年後，我仲以為睇埋今次會close file，攪到我幾唔捨得，諗返好多野；其實都因為呢個手術，睇到好多野，媽咪好錫我啦，睇住我入手術室，好記得我係床上面佢錫左我一啖叫我加油；太陽哥哥就超錫我啦，雖然陪唔到我入手術室，但佢負責送我入院架，跟住每日朝早返工前，同放工後都會撲黎睇我；出院後就日日放工由對面海黎青衣同我洗傷口，冇停過一日．．．最深刻係我做手術個日的電台點唱，我真係好感動！(http://www.rthk.org.hk/rthk/radio2/crazyandhappy/20070518.html 揀完media player or real player後，有三部份，click第三part，約11:20分鐘開始，就會有劉德華既"只想抱抱"，跟住就係太陽哥哥的點唱留言啦! 大家快ｄ聽下啦，就快expired架啦!) 唔少得朋友的鼓勵，休的sms，仲記得臨入手術室前我好驚係咁同佢sms；yammy送上我愛吃的朱古力；elsa的靚湯啦；phoebe的魚翅百力滋用作補身之用；太陽媽媽的燕窩啦；一大班同事的探訪啦．．．仲有相信太陽哥哥一世都難忘既醫院生日派對(http://hk.myblog.yahoo.com/aquarius-givens/article?mid=831)，全靠琪琪的蛋糕、休的細心安排、ben的接載、明記要返工都黎撐場，雖然中間笑料百出，去錯座數．．．話晒半夜十二點，點知唔知衝左去邊．．．去左老人部？！我都好開心，因為我真係好多人錫，我好愛我每一位痛錫我既人！時間真係過得好快，諗返呢個手術，原來已係半年前有多，令我好感慨呢！
睇下太陽哥哥咁開心既笑容，就知佢幾咁鐘意ｄ木瓜牛乳，佢仲好感動呢！
之後我地去旺角朗豪坊睇"塚愛"，平時見到呢幾隻公仔都唔會影相，因為勁多人係度；難得今日冇人，影返夠本先！weekday出街真係free好多呀！
"塚愛"．．．內容唔係好驚天動地，不過我都睇到喊，唔係感動，唔係嚇親，係見到男女主角都好愛對方，但又愛得好無奈；stephy個病發作，shawn諗住衝去拎藥比佢，但stephy叫佢攬住佢就得，shawn好大力攬實stephy，stephy痛到喊，shawn又心痛到喊．．．見到自己愛既人受苦，身體一日比一日差，而自己一ｄ野都幫唔到佢；對方仲成日對住自己笑扮無事，自己又要扮無事發生過咁，但其實好心痛．．．嘩．．．好到肉！最尾結局，無奈．．．stephy攬住shawn大叫，旁白講返shawn曾講過的說話：無論疾病貧富，我都會終生疼錫您！嘩．．．又好到肉！stephy食返自己嘔出黎ｄ野個幕，真係好核突呀！唔知拍時個pat係咩黎．．．嘔~~ shawn話男人最衰既地方係：性同愛係可以分開！攪錯呀．．．shawn又話：男人係性後，有ｄ都會有愛！攪錯呀．．．係．．．仲可同一時間鐘意幾個人添，只係有多少之分麻，咁係咪多個個係您就要偷笑，就要心足呢？但女人係要絕對一百份之一百的愛情呀．．．男人．．．唉．．．
weekday又一優勝之處，聖誕燈飾冇咩人，仲唔即刻衝入去狂掃！哈哈！
"街知巷聞"糯米糍，今次試左士多啤梨，朱古力同班蘭味，班蘭味唔得呀，yammy咪試呀！另外兩款都ok，不過都係芒果豆腐好味ｄ！
"人和豆腐"的豬腸豬紅，幾年冇試過啦，細細個媽咪帶我食，從此愛上食豬腸同豬紅，今日有機會再品嚐，個湯好似胡椒豬肚湯，好好味呀！
夜晚又去打邊爐啦，今次有埋太陽媽媽，試到四人餐！但四人餐ｄ餸好似唔及上星期同太陽爸爸食的二人餐ｄ餸豪，起碼冇生蠔．．．可能二人餐可以每樣有ｄ掛，佢地話都係酒樓好ｄ，下次應該會去了，哈哈！
教太陽媽媽玩cooking mama 2，好攪笑呀！
最後點左甜品"燉椰皇奶"，即叫即燉，等左半個鐘，熱辣辣，好正好正！
第十六個月紀念日，行下街，同屋企人食下飯；享受到二人獨處時的甜蜜，又享受到家庭的天倫之樂，兩種感覺都有，發覺自己好幸福呢！
沒有留言:
張貼留言