今日係約左華仔的日子，對我意義重大，哈哈！我地早ｄ出去行街食飯，本想揀聖誕禮物的，去左我最愛的agnes b，但都冇咩野睇中，係有條心型鍊幾好既，我鐘意心型麻，但又唔係一望上去有種好鐘意的感覺，唔想為特登買而買，其實佢都成日買野比我了；況且，太陽哥哥下個月同我去北海道，已係一份好甘好大的禮物了！哈哈！太陽哥哥話我唔介意的話，下個月去日本先再揀，到時再揀埋生日禮物同情人節禮物添，諗起就開心了！太陽哥哥想要手提包同冷衫，但今日似乎冇咩收穫，唔緊要啦，我又同佢講，去到日本先再揀囉！哈哈！今日的收穫反而係去左書局，陪太陽哥哥買一張聖誕咭比佢一位特別的朋友，揀緊的同時，比我搵到本之前教協冇的書，係phoebe介紹的，叫"壞女人有人愛"，真係意外收穫！
既然去開尖沙咀，我地的晚飯就揀左大家去完第一次都鐘意的charlie brown cafe，今次係一齊第二次去啦，冇再發癲影相，假期亦多人左呢，仲有部份係韓國遊客，原來呢度咁出名既！
聖誕關係，除左公仔外，有幾款聖誕甜品呢！
我地叫左牛肉丸螺絲粉同mushroom box；牛肉丸好難食呀，好腥；個mushroom box就好好食，尤其是個酥盒，配上我鐘意的黑松露汁，好正！
食完仲有時間，我地就叫多杯mocha係度hea下，無聊之際，我用張單摺下摺下，摺左件多年冇摺過既裇衫送比太陽哥哥；佢又無聊下畫左一男一女放係度，睇下下一手有冇人要先，哈哈！
跟住就出發搵華仔啦，一路行一路心情都好緊張呢！
入到去，原來只係加左四行，我地個位都算幾近呀，所以都好開心！
但就估到應該握唔到手了，因為唔係路口位，好難出去；加上前面幾行有欄杆，實會比"食蕉"攔截啦！
開場了，華仔先閃電出場
跟住係露點look出場，好大隻喎，睇到我留晒口水~~
"可不可以"呢首舊歌，平時係唔會開黎聽的，但係紅館無數的瑩光捧襯托下，聽落又好有feel~~
呢個高柱升起環節，沒有"威也"，由雙手變單手，又轉身，又踎底，條柱仲郁郁地，真係一步一驚心！
華仔呢個將女伴身上衫變衫環節，非常精彩，拍爛手掌呀！
我最鐘意的小丑look，件小丑踢死兔真係好型！
舞台劇演出，如報紙所講，華仔因失去女伴傷心，話喊就喊，好勁，祈求觀音呢幕，亦睇到好感動呢！
燈光著晒時，太陽哥哥發現了克勤呢！真好，我同太陽哥哥的偶像同時在場呢！而難得大家的偶像同對方都咁friend（大家記唔記得克勤結婚時華仔做伴郎架！），仲咁互相欣賞，呢ｄ咪緣份囉，哈哈！
握手時間，華仔個仔andox同黑仔出場，好可愛好攪笑！黑仔似乎比andox活潑得多呢！
最近的接觸就係呢個距離了，可惜我只能睇，無份握啦．．．
最後天使look高歌"沒有翅膀的天使"（麥當勞助養兒童廣告歌），聖誕樹高台升起，配上we wish you a merry christmas聖誕歌，跟住全場噴雪，好靚好靚．．．
演唱會準時八時半開始，到十一點三完場，good show！但沒有"安歌"部份，令大家都有點失望呢！
心情始續興奮，返到大圍去左試新開既"燉奶佬"燉奶！
沒有留言:
張貼留言