今日係健的大日子，我地梗會去捧場；有樣野好開心，一定要講，就係係換衫期間，太陽媽媽話我知佢有支新香水，跟住拎出黎比我，一睇，係GUCCI喎；老實講，我一向唔會用香水架，我好驚香水ｄ味架，亦好怕男朋友送香水比我，因為我本身已經夠香，哈哈！講笑，我係覺得女仔本身的體香係最自然，同獨一無二，每個人的體香都唔同架麻，噴左香水就會蓋過原有體香既味，加上香水好多花味咁，我真係麻麻地花，所以我係唔會噴香水既；但太陽媽媽同我好興奮咁講，係佢有個同事有日好香，原來用左呢隻香水，就託同事幫佢買左支喇，最開心係佢好開心咁同我分享，同講左句我好深刻既說話，就係："我地兩份用丫！"，嘩，聽到仲唔拿拿聲噴，哈哈！您地話我假都好啦，但咁既情況，真係開心都暈，噴少少味係身又算得係咩？但我真係好開心！太陽哥哥聽到仲講笑話：唔得，我要快ｄ搶返屋企第一主角個位先！哈哈！
今日註冊地點係伊甸園，我地先去太古廣場行下；最衰間M記冇左，我同太陽哥哥好想懷愐下以前既日子架，如果M記仲係度，我地實會入去坐下食下野；宜家呢個回憶，睇黎真係要留返係心入面喇，不過咁先歷久常新麻！
太古廣場的聖誕裝飾，今年比起上年，我地真係影左好多商場既聖誕裝飾呀！
行去註冊地點時，影左呢張"力保中心"高聳入雲既景象！
請帖寫二點十五分註冊，我地一點五十分到達，打比休，佢話三點先開始，因為驚賓客遲到，所以落二點十五分．．．頂！玩野咩，早都唔洗早咁多呀，同埋結婚咁重要，遲到都抵死啦，咁玩ｄ賓客．．．無奈咁係pacific coffee坐住等．．．期間比我撞到四位中學同學，原來有位女同學今日兩點註冊，佢地做姊妹！
新娘進場
健好豪，訂左兩個sessions，變左時間好充裕，影足晒相，勁！
新娘拋花球
新人的花車，司機叔叔好熱心咁充當攝影師，仲教我地擺甫士，又叫我地點企，又叫我地要拖住手，哈哈！
好多花車一列咁泊晒係度，好壯觀呢！
跟住我地坐埋家屬van仔去擺酒地點，由於有好多時間，我地去左睇"投名狀"，琪琪都做完野join埋我地！太陽哥哥見到成龍大哥，忍唔住要影相呢！
擺酒地點係荷里活廣場既聯邦大酒樓，呢度比起青衣城個間，真係靚好多，個場好寬敞，樓底好高，又冇柱，檯唔會擺得太密，真係幾grand！
健個婚禮，係我去過最多相的一個，十年前識佢，已知佢好鐘意影相，男仔咁真係算少見，唔知新娘子係咪同佢一樣呢？酒樓門口先有張易拉架，扶手電梯一上就係接待處，除油畫外，又有張易拉架，新人個樣，真係遍佈成間酒樓，哈哈！
座位表，用"保齡朋友"形容我地，真係攪笑！
我地個人情利是封
同新人影相時間
我做義工認識健，所以今日都見到ｄ義工朋友，甚至社工一家，因為唔同檯，梗係要影相留念啦！
菜牌好豐富，每人都有一隻鮑魚架，係我呢幾年食過算最好味的一餐飲宴，正！
開始啦，先睇過成長片段剪片，向左走向右走呢下，好感動呀！
跟住有請新人進場，每人手上都有支瑩光棒棒，好靚呀！我仲好似睇concert咁，當健經過時同佢握手呢！梗係啦，我知佢當晒自己係明星咁，今日係佢大日子，我咪附和下佢，等佢圓左個明星夢麻！進場播"beauty and the beast"，又真係好攪笑喎，但襯落又令人感動，有種童話feel呢！
切蛋糕加錫錫時間
新人致辭，健教開書，所以好勁，一ｄ都唔怯場，就咁吹水就四分鐘冇悶場，冇窒，好叻；最好笑係去外母家食飯的笑話，好好笑，大家都拍晒手掌！
跟住新娘致辭
雙方父母上台
跟住開始上菜，第一味係乳豬全體，酒樓好勁，放晒激光，真係開concert一樣！
花絮：今日休仲係MC添！Phoebe話太陽哥哥條吠靚，就要楂住影返張相，個手勢係我叫佢咁楂架，哈哈！
早上的接新娘剪片，楂晒槍搶新娘，呢條橋好得呀，笑爆全場！仲有張大支票，健真係落足心思，令人好深刻，掂呀！
早上註冊時短剪片
成圍搶食時間，真係好勁，十秒內成碟餸被搶掠一空，笑死人啦！
敬酒時間，新娘子晚裝好sexy！
新郎獻唱時間，我都話佢當左今晚係自己開concert啦！
新郎送禮物比新娘，係親手摺的一百朵百合花，每朵花入面都許下一個承諾加一個原因，絕不馬虎咁喎！
今日好開心，雖然我只係席上其中一位賓客，但都好深印象，野食好味，雖然冇玩新人時間，但中間又無悶場，好多剪片，好豐富，好好睇，好似去左個concert咁！係度祝呢對新人百年好合、永結同心！
沒有留言:
張貼留言