2007-07-14 (Sat) 七月之星生日慶祝活動

今日係我地七月之星生日慶祝活動大日子，真係多謝休的安排，呢一年佢都主動做左攪手角色，真係令人敬佩，係度都要表揚吓佢為呢個小圈子的心意同付出！

我地先去左長沙灣既小飛象食泰國野，真係幾抵食喎！唔錯，飯後切蛋糕同影大合照！今日太陽哥哥帶左三位朋友仔比碌齡朋友認識，雖然我已經之前識左，但碌齡班朋友成日呻冇女仔，唯有．．．所以今日真係好大班人，有十五人咁多，係咪好勁呢？

之後移師我地個場：齡場，主席今次建議，為慶祝小圈子成立唔知幾多年及香港回歸十年 ，決定組成一個組織：Small Circle Bowiling Club (SCBC)；為提高大家對碌齡的興趣，今晚舉行第一屆保齡球大賽，由於咁岩係7月有2位7月之星，漢同健，今次就由佢地兩位7月之星分別猜出兩隊對賽，勝出的一方會有豐富的獎品；此外，亦設有個人賽予最高分的頭三名成員！今次休真係好認真，睇下ｄ禮物就知！

最後結果，睇相就知啦！我竟然打抵多個男仔，入到三甲拎到季軍，不過多謝漢有生日禮物讓個銅牌比我，因為我同佢係同分架！但我最憎銅色，但又唔鐘意金色，最鐘意係銀色，就"唉"鑫同我交換個銀牌，但佢好奸話想換金牌多ｄ，咁我唯有轉"唉"非洲同我換金牌，再用個金牌換返個銀牌，係咪好傻呢？有金牌都唔要！哈哈！不過非洲真係好人啦，冠軍都唔要要季軍，冇計啦，我人緣好，多人錫麻！嘻嘻！

以下分別係：兩位壽星仔合照，我同主席合照，壽星仔頒獎照，冠亞季合照，隊際合照！

今日不能不提係以下呢個魔術表演，我諗由於我玩魔術已經玩到出神入化既境界，感染到太陽哥哥對魔術都產生左濃烈既興趣，佢就苦練左呢個魔術氹我，真係好得架，大家快ｄ去片啦！

2007-07-13 (Fri) 旅行箱揭秘．．．必睇！

呢個短片，大家一定要睇呀！！！

2007-07-12 (Thu) 交換禮物

今日去開旺角，咁岩Yammy會去個頭，就約定佢，互相交換新書睇，仲有還返ｄ舊書比佢，仲有托佢比ｄ野其他姊妹，當然佢自己都有份啦！我地去左飲珍珠奶茶，傾左一個鐘倒，仲收到Sa Sa B既輝輝印仔禮物，多謝妳呀！！

今晚計劃好跟太陽哥哥買一對情侶Converse波鞋，係最classic個白色款，第一間得男裝碼，照買先啦，咁多舖容乜易買到女裝碼，誰知，行晒成條波鞋街都斷晒女裝碼，頓時真係想喊出黎呀．．．

返到去太陽哥哥送左份禮物比我，係我鐘意的agnes b橡筋！我都覺得怪怪架啦，尋晚佢放工後無拿拿話去旺角買公仔書，咁轉折，不過我以為佢買個chip n dale枕頭，點知原來係買呢樣，多謝您呀！

2007-07-11 (Wed) 覆診之七 & 親手操刀的晚餐

今朝去左覆診，冇咩特別，醫生係嫌腳趾公郁得未係最好，今次佢比既功課係：楂住腳趾公的第二節然後練習郁，咁就訓練到第一節骨的郁動同反應！另外，佢寫了病假紙比我，竟然一寫就話，寫到下次覆診啦，八月八日！我心裡梗係暗喜啦，但都驚咁遲返工唔好意思，就多口問句，係咪我覺得OK都可以早ｄ返，佢話嚴格上係，但唔好有事囉，因為您係病假中，除非老闆都同意您自己覺得冇問題而比您返，同埋佢可能需要簽返ｄ野代表同意之類．．．唔．．．好矛盾，等我諗吓同問吓多ｄ意見先！朋友仔，您地又點睇呢？

睇完醫生後又去了Spaghetti House食下午茶，今次試到個拼盤啦！但個意粉唔抵，好細碟，縮咗水咁，不過真係好好食！

之後去百佳買餸，有牛扒試食，咦．．．好好味喎，咁不如今晚就煮牛扒啦，攞咗兩份，唔．．．琪琪鐘意食羊扒多ｄ喎，換份羊扒比佢啦！個推廣員話有埋牛扒粉，就咁兩邊各煎兩分鐘就食得，咩都唔洗再落好方便！

煎時，覺得好干呀，琪琪就建議落ｄ酒，就一野淋落去，跟住炸炸聲，好香同濕好多！但最終食時都係略嫌干身，一來ｄ酒揮發咗，二來我地係愛汁之人，咩都鐘意撈ｄ汁，下次都係煮個黑椒汁淋落去好ｄ！個椒絲腐乳生菜都係我炒架，上碟時應該唔好倒晒ｄ汁，不過佢地都話好味呀，梗係啦，落咗三磚腐乳，足晒料架！係琪琪唔食得辣，話辣咗少少，我落咗一隻指天椒咋噃，原本諗住落兩隻添架！哈哈！

 

2007-07-10 (Tue) Dinner @ Oliva

今晚約了多月無見的預科同學食飯，係荃灣廣場的OLIVA的意大利餐廳，呢度氣氛同環境好正，我地坐既窗口位仲係一排落地玻璃，每枱還有水晶吊燈，頗浪漫的！

食物樣樣都唔錯，最好味係雞卷，值九十分！青口好鮮味，有我愛的辣味汁；芝士焗波菜三文魚個芝士汁好正，我唔好三文魚都食到；通粉好好味，蝦又大隻；PIZZA好大個好型，但嫌牛肉太靭，最好不要點"五香牛肉"了！

跟各朋友仔的合照，很久不見，食完也可坐著傾到十點鐘，開心！希望我地可以多ｄ見面！

呢班朋友係我覺得頗疏的一班，有時諗落有ｄ歉疚，友誼係要付出經營的，相信只要有心，我地可以好好咁維繫落去！對班長，心中最有一份歉疚感，佢屋企舊年發生一件大事，我都係年頭係MSN先知，所有今次特登買份生日禮物比佢，希望佢可以開開心心，儘管生活艱難，也要繼續堅持落去！

2007-07-09 (Mon) 收藏了十多年的物件

今日執拾很久沒開過的迷你儲物櫃，把得意兼收藏了十多年的物件影低給大家分享！

中五會考後係麥記做暑期工，當時的員工名牌，還有參加了All Star Team比賽的紀念獎章及紀念品！好在有一直收藏咋，因為我咪就係喺嗰時認識太陽哥哥囉，呢ｄ野全部係我地既歷史入面有意思架！

仲有幾張太陽哥哥的舊作，係佢話仲未識用photoshop時製作的咭片／年曆咭，好多炒賣價值架，哈哈！其實．．．佢以前畫自己的眼睛都係．．．眼細細的，都算有自知之明，但點解．．．近年的眼睛會越畫越大既呢？哈哈！

我個人好鐘意"黑白底有前有後"個張的idea，等我叫佢幫我整張先！hehe~~　呢兩年的年曆咭，相信大家都見過啦！

細妹好多好多年前親手做給我的小手功，咩情況下做，幾時送，已經唔紀得了．．．

咁多年捐血的成績，最例牌係每年都有的"定期捐血紀念章"，跟住有小型襟章，我的"A+"血型小血點，同埋一個唔記得咩節日捐血時送的紀念水晶(好似係農曆年)，上面寫著"Give Blood Give Love"，好有意思架！

七年前咁大個女第一次去日本，分別係Disneyland同富士急遊樂場的Passport，富士急那個已差不多褪晒色了，那時仲係同BEN去的，真係好有懷念價值！

2007-07-08 (Sun) 新und und & bra bra

媽媽新買給我的，是我最愛的心型圖案，惹艷嗎？還是太少女情懷呢？嘻嘻！！