原訂今朝媽咪做左眼白內障手術，我地一家總動員一早起身，包括太陽哥哥，一早七點半出門口，真係好唔慣，呢個幾月我通常訓到十一二點架麻！
去到醫院，換好晒衫，做埋眼睛測試，見醫生時，醫生同媽咪講，佢今日的視力測試好好，係好好個隻，有機會做完手術後，同宜家差唔多，甚至會差過宜家，吓．．．我地都O晒咀，即係點呀？
佢就舉例咁講，今日做的測試係九十分，要是唔合格靠做手術做到合格，好易；但要九十分去到一百分，好難；加上手術一定有風險，有意外，值唔值得去做呢？醫生的語氣，比我感覺係唔建議做既．．．我地問佢，佢就話做唔做，其實係好睇隻眼係咪係日常生活度造成好大影響，呢個係病人自己心中有數；佢話唔同戴眼鏡，唔鐘意個款，度數唔岩，就換過一副，因為呢種手術，每隻眼睛只可做一次，做左就冇得返轉頭．．．但媽咪話之前咁多次覆診，冇醫生同佢講過佢隻眼咁；醫生就話，媽咪有白內障係事實，之前做過的測試，亦有試好係差的，但唔知點解今日咁好．．．我focus係醫生個句"只可做一次，做左冇得返轉頭"，都叫媽咪咁不如唔好做啦，費事今日做左，過多十年，真係有需要做時又冇得做．．．所以，跟住我地著返衫，攪返退款，就返青衣城食早餐，好攪笑的一個清早！但走時都十點幾，係醫院又等又攪呢攪路，原來都攪左三個鐘！
換衫準備做手術，一ｄ都唔驚，仲好開心咁喎！果然同大女恩恩豬有一樣的基因，哈哈！
