好快就黎到行程既最後一日啦，今日既早餐，我地去左總統大酒店入面既總統大餐廳食，呢度算係金邊幾高檔既地方黎架！
試左呢度出名既咖喱牛腩配法包：
呢個春卷撈麵就一般啦，因為我一向唔鐘意食撈懞，佢地幫我叫錯左呀！
之後就送別三個黎自越南既太陽媽媽既表哥：
拜拜啦呀古們～～佢地三個呢幾日都參與住我地既行程，又係住係太陽呀姨度，亦一齊見證住太陽表弟結婚架！
跟住我地去左一個要過大橋既郊區餐廳食午飯，太陽哥哥話呢度ｄ野好好味架！
原來叫『水仙花餐廳』：
環境真係幾舒服幾幽雅喎，欄杆後面係海邊黎架；我覺得呢度舒服過『小香港』呢，但景色就『小香港』靚ｄ！
餐廳中間有棵大樹，樹上吊左兩個籠，養住一隻鸚鵡＋幾隻小白兔！
大樹菠蘿樹呀！
食完午飯，去街市買少少生果帶返香港，跟住就要返去pack野去機場啦！我又試左柬埔寨式砵仔糕，下層原來係蛋糕黎架，幾好味架！
又買左芒果食～～
最後去飲蔗汁同食出名既牛丸，食食食．．．盡力爭取最後既時間，試晒呢度好味既野食！
跟住真係返屋企pack喼啦，執完就同各人影相留念．．．
落樓下見到．．．嘩！原來今日呀姨佢地都開返門做生意啦，所以要開始送貨！
柬埔寨人生活，會爭取所有有利空間，坐電單車會載幾個人，其實好似大陸咁；不過送貨送到咁我都係第一次親眼見到，佢地會塞到幾多得幾多，真係勁！
我地架車未到，不過呀姏既 tu tu 就到啦，所以我地送佢先！唔．．．似乎喜事辦完後，一齊好快就會回復平靜，back to normal．．．開返門做生意啦，親友們一個一個咁走啦，真係有點不捨添．．．but life is like this！呀姏今日都走，我地又係，跟住太陽爸媽星期日走，太陽表妹下星期一返紐西蘭．．．呀姨間屋好快會變得靜靜了．．．
盡最後一分鐘，努力影相留念，因為真係唔知幾時會再黎．．．
太陽表妹話約我下年四月，柬埔寨既新年再黎玩，我話睇下點先．．．佢聽到好失望呢，仲話我咁講即係唔會黎了．．．其實我都好鐘意去玩去旅行，但我同太陽哥哥既錢都儲得好辛苦，唔係動不動就可以飛去呢度玩，飛去個度玩．．．有多餘錢我地當然想去旅行啦，但都想趁後生去多ｄ未去過既地方麻．．．加上去柬埔寨既機票要成四千蚊張，計埋ｄ雜費同稅，太陽哥哥話去到日本了．．．不過真係同佢地都都生了感情，的確係好唔捨得既．．．
太陽呀姨同太陽表妹送我地去機場，影左張大合照後就入閘啦！後會有期～～珍重珍重～～
我地乘搭KA207 1820/2155航班回港，不過班機delay，我地係飛機等左成個鐘先起飛呢！
一上機就睇下有冇咩抵野買，發現了筍野！記得SHU UEMURA卸妝油最抵買係台灣免稅店，不過只得大支裝450ml，約$500；宜家呢款綠茶係旅行裝packing，細細支超方面，用返ml按比例計返，同台灣一樣價錢，即買！空姐仲話呢個packing係岩岩2010年1月1日先有，我係香港都未見過，正！
仲見到有LANEIGE出名既water sleeping pack plus，但用過唔係咁岩我皮膚，因為冇用開所以唔知價錢，不過影埋相比朋友們參考一下麻！
飛機餐～～我覺得去程餐天使麵好味好多呢！
到達香港時係室外停機坪，所以要好似港督咁行樓梯落機！哈哈～～
返到屋企拆禮物，好靚既packing呀！每次去完旅行都會影張戰利品晒冷相，不過今個旅程冇戰利品呢！
沒有留言:
張貼留言