2010-01-06 (Wed) 數碼電髮

後天要出發到柬埔寨 - 太陽爸媽的故鄉，當中會出席飲宴；而下星期日及下下星期日會有兩場飲宴，加上快過年，呢個時候整定個頭差唔多！我要電髮、染髮加焗油，唔知有冇可能一晚攪掂呢？

放工趕去，六點半開始，先洗頭，跟住剪髮，之後做一層保護＋除去原有的電髮紋．．．呢個過程最耐，因為整完一次都未夠效果，要再做多一次，因為我頭髮實在太多太多了！

攪掂完呢部份後，再洗第二次頭，跟住先開始夾髮鬈，夾完就可以電髮．．．插電後，髮型師講我先知原來呢部機係for『數碼電髮』，我真係out，我仲話我以前電個ｄ都有插電丫，有咩分別呀？佢就反問我係咪係上面吊落黎個ｄ，我諗諗下．．．又好似係喎．．．原來係完全唔同既呢，個款花名叫八爪魚喎！ 而『數碼電髮』係用電力，好處係唔會傷髮質．．．(下刪一段說話)．．．．因為咁多電髮機，我都分唔到了，反正對髮型師十分信任，佢整咩我都交比佢辦啦！

呢個時候已經九點了．．．跟住要等45分鐘，要頭髮完全被抽走水分！

呢個"等"既時候，髮型師終於騰到時間走去幫太陽哥哥剪髮喇，佢已經等左一個鐘啦！哈哈～～

十點正．．．除晒髮鬈，鬈返起每撮頭髮後用夾仔夾住，落藥水定型，呢個過程唔太耐，只係十五分鐘啫！

太陽哥哥已經攪掂啦，我叫佢返去先，但佢話等埋我，仲出去買野食比我醫肚，真係好喇！

跟住洗頭＋吹頭，數碼電髮果與別不同，電完沒有旱的感覺，以前我電完髮一定要做焗油架，但今次電完摸落反而滑滑地，加上好有彈性，亦容易處理；髮型師花左十五分鐘教我點set個頭，想立體ｄ又得，想多ｄ少ｄ又得；佢好有心機架，所以我先鐘意黎搵佢整頭髮；even佢剪太陽哥哥既百幾蚊頭都好細心，呢樣太陽哥哥都feel到，所以先痴住我一齊黎咋！見髮型師示範我都覺得好似幾好玩咁，不過要隔一日先洗得頭，所以未咁快有機會自己玩！最後佢仲問我介唔介意比佢影張相，佢想show比ｄ徒弟睇呀，當然冇問題啦！攪咁多野，最後2310完成，染髮同焗油都冇時間整，我諗要下個星期返左香港先整到啦！不過埋單成千蚊，有點肉痛．．．咁夜，商場都關左門要行後門呢！