2007-10-27 (Sat) 開心星期六

今日太陽哥哥去飲，起身同太陽媽媽食午餐後，佢就係屋企整理裝束，呢個就係佢個final image，其實都係同尋晚試衫時一樣，型仔！個利是封係佢份人情，幾得意，我就影低左！

跟住我地出左旺角行街，去左教協買左本哈利波特比威哥，上下集兩本，好重呀！

之後同太陽哥哥分道揚鑣，我約左媽咪食米線同行街街，當然又係我地至愛既譚仔米線，我地share左個大米線，好飽，好辣呀！

之後返青衣城行街，先幫公司去豐澤搵ronald買相機先，對ronald都幾有好感，可能鄭中基都叫ronald啦，哈哈！不過佢對我地都唔錯，次次買野都送好多野比我地，今次都好多野送呀！跟住係GIORDANO有收穫，媽咪買左件披肩，我就有條褲，仲係媽咪送比我的！試身時sales比左間好大既試身室我，入面仲有張sofa，我就叫媽咪坐入黎，睇住我試，咁我咪唔洗行黎行去囉！著住und und係媽咪面前走黎走去，真係好有母女feel，攪笑得黎又好開心！戰利品如下：

之後係starbucks嘆杯coffee，媽咪至愛的latte加榛子！好耐冇單獨陪媽咪啦，所以今晚呢幾個鐘都好開心同好sweet！

跟住送媽咪返屋企，我沖個涼後出去碌齡啦，今日好人齊，肥婆又唔係度，所以好順利好開心！

太陽哥哥飲完先黎，一黎到，大家都話佢型仔呀，我梗係開心，我揀既野著晒係佢身上，兼且仲有人讚麻！karen仲要求同太陽哥哥影想呢，佢話想買條呔比alex添，但我地研究緊，alex個肚dup．．．可能會"隊"起左條呔喎，哈哈，笑死人！細妹仲攪笑，一見到太陽哥哥就話：嘩！您個look好似吳尊呀！再次笑死人！

我同太陽哥哥影左好多相，因為今日．．．襯囉！嘻嘻~~

 

呢張係全身襯爆look全相

同細妹都唔少得要影返張啦！

跟住ben車我地返大圍，今次我地醒目地自付盈虧同請佢食宵夜，因為太唔好意思啦，ben個人其實好好，好為朋友，係平時．．．大條道理太多囉，哈哈！全程車由我呢個美女司機攪掂，兩個男既就係度講股，由於我要專心楂車，無咩插嘴，只係想話ben究竟佢介紹隻股幾時升架，我訓晒身架，死仔！

我提議食車仔麵，因為我好鐘意食呢間車仔麵，平時夜晚肚餓，都會心郁郁想落黎食宵夜架；您地睇，成兩三點仲幾多人！不過掛住食，淨係影到個殘渣比大家睇咋！

2007-10-26 (Fri) 開心星期五

今日係開心星期五，因為聽日就係weekend，仲有係下星期一又請左假，有三天假期喎，個人都醒神ｄ啦！

今日係公司，十二點就可以唔洗做，因為有個faculty lunch，十二點至兩點架，正！係lunch入面，有個小型頒獎儀式，係頒獎比係過去三年入面，教學上加埋晒年年都有出色表現既老師，名為outstanding teacher award；而一向同我friend過打band既 jimmy sen，亦係得獎者之一，百幾個老師得六個有份架咋，真係好叻仔；總有，個獎牌係我跟架，一早就秘密地知有佢份，做都做得落力ｄ，哈哈！jimmy sen今日著到好young好型仔，一黎到就坐係我隔離啦，羨煞旁人，比晒face屎我，哈哈！為捧佢場，最唔少得，當然係佢出去領獎時既尖叫聲同拍掌聲啦！最後當然都要同佢影相留念，真係好戥佢開心，因為佢出晒名好受學生歡迎架！另外，我地舊老闆都有份得獎，呢個老闆好出名架，大家坐巴士睇開road show，應該對佢有印象啦！

放工後，約左太陽哥哥食飯，佢聽晚要飲，想買條呔；由於我股票有軌穫，我就話送比佢！我地先去izzue睇，睇到一般般，但佢好似都想照買（激死！），但我又覺得好似唔太靚都夾硬買咁；醒目的我，即刻問個sales哥哥其實呢頭有冇5cm，原來朗豪坊係有架，我地仲以為冇添！跟住梗係標去睇啦，一睇就睇中了，揀左條好特別既呔，係兩邊pattern，打完出黎變相就有兩個pattern，好有特色！跟住太陽哥哥想揀件白色裇衫，但我又覺得唔"攝"衫腳入去著會型d，既然係咁，就建議佢買件硬身ｄ挺身ｄ既裇衫，我就睇中左件灰色，平時好憎灰色、屋企一件灰色都冇既佢，竟然．．．buy我喎，可能知我一向襯衫taste好啦！有相為證架，嘻嘻~~

難得佢咁鐘意我揀既野，多左件裇衫，我都買晒比佢啦，鬼叫係我baby咩；佢就好啦，大豐收呀！不過我都好開心，因為我都覺得好靚，仲要係好彩無夾硬係izzue買咋，宜家揀到件勁鐘意的，真係幾好，大家都勁開心呢！

之後我地去左試italian tomato cafe，我本身都幾鐘意食意粉，都唔錯啦，係個汁唔夠"杰"，兩個都係；意粉亦硬了點，下次試過濃ｄ汁既意粉先！

2007-10-25 (Thu) 不能說的秘密

有個不能說的秘密，忍左幾日都唔講得，今日當事人終於知道，我亦可以講晒出黎啦！就係．．．送比yammy的生日咭同禮物！

由於我地幾個分佈係唔同既大學，又要買禮物，又要買咭，又要召集齊人寫張咭，又要計劃點交到佢手上，的確有ｄ難度；但為左氹"妳"開心(我知妳睇緊架!!)，無計啦，我地上刀山落火海都會竭盡所能務求令"妳"開心架！

講完，舒服晒~~

今日又去NA食麵啦，攪手lilian竟然因病缺席，esther亦冇返，最後得返我地五個咋！今日多人，可以叫晒牛肉同豬扒，好正呀！唔記得同麵包超人影相呀，激死！叫左您唔好遲到架啦！

尋日同大老闆食飯的相，今日都收到了！呢餐係shaw食，真係好好味好好味，雞同豆腐係我favourite，食左好多！遺憾係無風沙茄子．．．

2007-10-24 (Wed) 劉德華 Wonderful World 演唱會2007

華仔的演唱會廣告，我諗大家近排都會見到；識我既人，都知我激愛華仔，哈哈！

係度呼籲下大家，一齊去睇啦，一齊去睇啦，一齊去睇啦！

我會買第一場，希望細妹的歌迷會朋友幫到我地買到靚位啦！一定得，一定得，一定得．．．知道後再同大家分享啦！

2007-10-23 (Tue) Dinner @ The Spaghetti House

今日原本想試下意粉屋的芝士火煱，臨order前取消了念頭，因為望到隔離檯碟海鮮．．．同大家樂差唔多咁喎，但價錢差好多倍喎．．．

最後點左個citibank二人套餐加小食拼盤；為了飲帶子湯同好多料的pizza，我地揀左海洋風味套餐rather than意味龍蝦套餐！

小食拼盤好大碟好靚呀！海鮮炒飯好得，因為個汁勁好味，雖然食唔出係咩汁，但撈落ｄ飯度真係好好味呀！仲有pizza都好味，我一向都鐘愛意粉屋的pizza多過pizza hut的，如果係千島汁就更加正喇！

2007-10-22 (Mon) Lunch @ NA Noodles

豐富的一頓午餐，同鐘意的人一齊食野，胃口會大增，食都食得開心ｄ，只會一望錶就會：下，夠鐘拿？咁快既！所以，唔好叫我同ｄ唔鐘意既人同檯食飯呀．．．嘻嘻~~~

2007-10-21 (Sun) 打邊爐 & 碌齡

今日原本係一個月前約好去踩單車的，明記連假都請定；但遺憾地，ben腳傷，連尋日的迪士尼都去唔到，更何況踩單車；加上小圈子有喜，又少兩個人踩．．．最後，我地尋晚決定取消，改做打邊爐聯誼同碌齡！

我地先到旺角行街兼陪太陽爸爸碌咭買衫，太陽爸爸真豪，睇中件成七百蚊的直間裇衫；但一件冇折，要兩件新貨先有，佢心郁郁想買條八百幾蚊的長褲，但條褲真係好普通，一ｄ都唔值，所以我地建議唔好貪折就咁買一件算！跟住食左個牛什就去邊爐啦！

今日都算齊人，反而少左琪琪，坐左成半粒鐘先知，張檯號係211！嘩，咁靚既no.咁都中，真係要夾份買六合彩喇！哈哈！

打邊爐其實旨在一大班人有個地方可以吹水同hea好耐，所以都食得幾開心！明記多ｄ咸濕笑話就更加好啦！

之後去左碌齡，個肥婆真係煩，明明十二點close，又話十一點，開得一局；好似佢鐘意幾點close就幾點咁，次次唔同，根本就係冇咩客，想早收工就話十一點！我地玩到十點八，想玩多局，開多幾條lane實玩得切，又唔比．．．成個場三十幾條lane，得個五六條開左，仲有廿幾條喎！激到太陽哥哥好勇咁走去問佢：其實您係咪好唔鐘意我地？嘩，三個字：勁！型！勇！禮貌地理論一番後，太陽哥哥大聲講，咁無晒誤會啦！希望下次真係能好轉啦！