2007-11-11 (Sun) BBQ 暨 JIMMY & YAMMY 生日慶祝

今日我地慶祝 JIMMY同YAMMY既生日，原本仲有OLIVIA架，可惜佢病左黎唔到，不過我地都會將禮物轉交比佢既，希望佢快ｄ好返啦！講返今日，原本BEN有車架，所以我地先揀去BBQ，可惜佢架車因事入廠，而玩得既佢，又繼續一齊join埋我地，所以連埋太陽哥哥，今日多左兩個圈外人！

我地去左太陽哥哥提議兼佢上星期去過的西貢自助燒烤場，禮物我一早買定啦，其餘的細心arrangement，多得ELSA攪掂咋！Thanks sweet heart！

去到有個小型賽車場同騎馬場，有個好得意的鬼妹係度玩緊，仲有大細馬架；雖然好好玩咁，但礙於動作有ｄ突兀，我地都冇人玩呀！

一坐低就收到elsa愛心禮物，我早兩日都提過了，特登託朋友係機場搵比我的珍寶珠電話繩，只係得個一毫子咁大架咋，細細粒，好cute！我亦將預備好的小禮物回敬返去啦！正所謂，您又氹下我，我又氹下您，咁就齊齊開心啦！Thanks sweet heart again！

呢度有厚多士燒，燒過咁多次野食，我都係第一次見，仲係好評如潮添！

跟太陽哥哥合照，係咪全身都好襯呢？嘻嘻！

仲有兩位圈外人合照，哈哈！

神秘環節：秘密蛋糕加每人一支花！我仲有個即場爆肚的魔術環節，雖然好低Ｂ，但旨在氹大家開心，我又有咩所謂呢？最緊要兩位壽星仔女都開心，何況我都覺得佢地幾surprise架！大家睇片啦：

影返張齊整大合照先~~

跟住有圈內人合照同圈外人合照

再有輪流跟壽星仔女的單人照，大家放心喎，有我係度，咩照種類都唔會漏，包您滿意兼樂而忘返，最重要留低晒所有happy moments！

分蛋糕，人人有份~~

四個男人都有一個墟的，仲要係唔企一次添！好friend咁喎~~

四個女仔都唔少得要影返張相先啦，原來今日係四男四女架！"發"個人，好意頭！

elsa請大家食台灣手信，係衛生巾棉花糖，我地即刻燒黎食呀！好有彈性喎~~

黎多張大合照，今日既活動就劃上完滿既句號啦！今日係jimmy既正日生日，我地仲約左佢，四年後的今日佢既生日，即係2011年11月11日，六條一，我地由上午1111，玩到夜晚1111，唔知成唔成行呢？哈哈！不過好似係閒日黎喎．．．

最後係yammy派發日本手信時間，佢好比手機，自製左好似明信片既相，寫低左一ｄ說話比各位朋友，真係好有心意！ｄ相好有料到，真係激似postcard水準！仲有愛心襪子，著住佢，實會諗起您咁暖笠笠的心意！多謝妳呀！

jimmy今日仲係我地既柴可夫，我要拎返上星期訂的頸巾，所以返左沙田citysuper，有相睇啦，靚嗎？多謝太陽哥哥~~

返到去，可能今日太開心了，胃口冇好飽的感覺，仲買左甜品外賣，名為"荔枝金露"，正呀！自拍範圍有限，影唔晒添，唯有黎個近shot啦！

最後，要多謝ben，冇車都肯黎陪我地玩，仲唔mind單獨同我ｄ朋友一齊黎同一齊走，真係要比個服字您，果然夠sociable！thanks！

唔少得要多謝太陽哥哥，每年的十一十二月既星期六日，係佢畫xmas card的黃金時間，佢放棄左之餘，又唔怕悶咁黎陪我、take care我同燒野比我食！Thanks baby！^^

2007-11-10 (Sat) "特別"星期六

今日太陽媽媽、太陽哥哥同我要做一樣特別事情，用"特別"呢個字，係因為我咁大個女都係第一次做呢樣野架咋；對佢地，應該用"重要"事情啦，因為係太陽媽媽搵的，哈哈！其實我都係最後一個知，因為佢地一早約晒，我係尋日先收到通知；其實之前都講過，只係諗住都係得個講字，未有"耐"，點知咁快就約左，真係冇諗過；太陽媽媽話要初一或者十五先去得，原來係咁，因為一個月的星期六日都未必撞正架，唔怪之咁急．．．就係去以下呢個地方喇．．．上去只係比左ｄ基本資料，要一個星期後先知詳細野；詳情唔講住啦，因為我想保持輕鬆的心情去面對，加上時間問題，因為我只愛下半年度；同埋有ｄ突如其來，我仲係未去到一個好實在的階段麻！

跟住原本想睇戲，但時間唔岩，我地今日又冇約人食飯，就決定返屋企，咁太陽哥哥就可以畫佢的聖誕咭，我就繼續上網、打nds同訓覺

！經過幾個小時的努力，太陽哥哥終於完成了今年聖誕咭的手稿；話過秘密比大家知，佢今年張聖誕咭係我既idea黎架，為左鳴謝我，到時仲會．．．係度賣個關子先啦，其實我好想比個手稿大家睇架，不過驚到時您地收到唔夠驚喜，唯有要大家忍多一個月先，到時密切留意啦！

晚飯去左樓下食車仔麵，之後去碌齡！

今日我地都算狀態大勇，我兩局都win隊際，而第二局值得一提係太陽哥哥的三個全中，簡稱turkey，帶高左好多分！仲有係我地一家三口加呀健vs一休加大條道理佬加六個二，佢地一睇牌面，以為我地輸硬，其實我自己都係．．．哈哈！點知．．．憑住我地堅毅同不屈不朽的精神，最終win左！哈哈哈哈！

2007-11-09 (Fri) Dinner @ 金不換

今日下晏放假，陪媽咪睇醫生，先係泰妃雞醫肚，食左至愛既海南雞飯同叫左碗粉share，正！所以要擺返個大哥手勢！哈哈！

之後行教協，買左好多零食，媽咪送比乖女食架！其中一份係某人既神秘禮物呢！呢個人好錫我，偷偷叫人係機場買左個我地係網上嫌貴的珍寶珠電話繩比我，因為呢個款係市面扭蛋機冇架，全港只係機場有得買，一係網上bid！咁錫我，我又點會唔氹返您呢！正如我成日都講，人夾人，您對人好，人地實對返您好；所以，您對我好，我實雙倍奉還，呢個亦係我一路對朋友既宗旨黎架！所以，我咁多人錫囉！嘻嘻！不過您對我衰，我都一定雙倍奉還架，小心！哈哈！

睇完醫生後仲有時間，就請媽咪去滿記食甜品，試左個新出的杏仁蛋白，一般咋，我以為係杏仁燉蛋白，點知好水，似乎係杏仁糊溝ｄ蛋白花．．．咁既質素要$32客，太貴了，唔抵！

之後去左鰂魚涌接太陽哥哥放工，因為約左佢朋友呀仔同Hazel去銅鑼灣食飯！約左好耐了，因為佢地好想睇我地台灣ｄ相，十分咪係佢地介紹我地必去既地方囉！個日的行程的確令人難忘，因為放左孔明燈同見到彩虹麻！（大家可去呢度回味下：http://hk.myblog.yahoo.com/aquarius-givens/article?mid=2237）

我地去左金不換食泰國野，我既favourite！未見過的係客名為蛋網金邊粉，打開後幾特別！

成整飯我地互相分享左好多旅行相片，因呀仔夫婦剛去完蘇梅島；而佢地上次去十分係冇放孔明燈架，所以佢地睇到我地既短片都好有新鮮感！Hazel仲因為太陽哥哥超誇既衝去攞相機動作笑到癲晒咁，話佢好似火燭要走路咁！哈哈！真係笑死人！大家又可回味下：http://video.yahoo.com/video/play?vid=1198287 

呢餐飯食左兩個幾鐘，因為佢地睇埋我相機現有的相，有迪士尼halloween、平時碌齡相、前日charlie brown cafe等等．．．有成百幾張相架，Hazel亦好有興趣同心機睇，因為佢好羨慕太陽哥哥係台灣為我佈置的蠟光中秋夜，同煮野比我食呢！仲笑太陽哥哥繼迪士尼後又一杰作，話說今年我生日book迪士尼酒店，係呀仔朋友幫手既，而呀仔朋友見到太陽哥哥一抽二"能"去迪士尼搵佢，就爆左比呀仔知，呀仔就爆左比佢老婆知；一傳十，十傳百，原來男人都係好鬼八架，大家小心！哈哈！我就笑太陽哥哥呢件事來本已被傳到街知巷聞，哈哈！原來，呀仔係唔會做呢ｄ野氹Hazel架，所以，我好開心，因為好威好有face呢，哈哈！呢餐飯食得好開心呀！

呀仔好好咁幫我同太陽哥哥影相，仲玩effect呢！

之後經過time square，見到個展覽，可惜粒珠係唔會碌比路人睇！

三個人睇到聚精會神既樣子，大家亦可認識下呀仔同佢老婆喇，好靚女架！

2007-11-08 (Thu) 表姐的ＢＢ仔

表姐生左個仔呀，七磅幾，塊面好漲，成個布甸咁！手仔腳仔好長，似足表姐夫高高大大，大個亦可以由媽咪教佢彈鋼琴啦！表姐生佢可算辛苦啦，生完仲有ｄ意外，輸左八包血，差ｄ入ICU，聽聞要勞動成team醫生，好在係港安，backup夠好咋！係度祝小clement快高長大，肥肥白白，媽咪生您咁辛苦，您要聽話呀！表姐宜家亦已無事，係屋企弄兒為樂，仲想辭左份工唔做添，真係羨慕死人啦！

2007-11-07 (Wed) 估您唔到的surprise！

太陽哥哥平時會幫我包飯盒，今日亦唔例外，我通常返到公司拆開膠袋跟住雪飯盒，今日亦一樣，當拆完正準備將膠袋丟落垃圾筒之際，見到手指頭同手指邊黑晒既，個膠袋咩蚊攪到我咁呀？一打開黎睇．．．．登、登、登、登！

真係估佢唔到，不過梗係開心啦，仲好冧添！我仲即刻拎返入office，盡量還原返原本形狀，我諗還原到七八成啦，其實唔仔細望，真係無為意，我只係以為一個有花紋的膠袋，好在未丟落垃圾筒咋！之後打比太陽哥哥笑佢，佢話呢個任務好艱巨架，要吼我沖涼先做到，又要快畫，又要驚我出黎，畫到心慌慌，哈哈！

多謝太陽哥哥的驚喜，生活中要keep住有情趣，先可以甜蜜落去，無論對情人、朋友，甚至家人，要您氹下我，我氹下您，關係先更好！至於我同太陽哥哥，慶幸我地仲係熱戀階段，成日都鐘意氹對方，成日都掛住對方！至於對朋友，我鐘意用把口氹佢地，啲gag都ok令佢地笑到幾開心架，有時笑到肚痛添！嘻嘻~~ 我希望，所有朋友同我一齊時，都做到佢地既開心果，令佢地嘻嘻哈哈，好開心，好快慰，笑聲不斷，忘記晒煩惱既！