今晚同太陽哥哥同事們係銅鑼灣唱Ｋ，所以一放工，先過銅鑼灣同太陽哥哥食飯，我地去左YAMMY介紹既『悠』：
櫥窗入面既假食物，像真度好高呀！
餐牌：
悠既環境非常舒服舒適，大部份既檯都係自成一角，唔會受到隔離檯騷擾，非常非常好！
海鮮粥天婦羅御膳[$88]：
另外散叫了烏冬鍋[$65]、串燒牛舌[$26]、TATAKI牛柳 [$48]：
跟住我地向灣仔方向行下，諗住睇下鏡櫃，點知閂晒門．．．反而見到一間夜冷店，就入去望望，因為我地想買書檯書櫃，之前都好矛盾，究竟買現成好定訂造好？因為我一部電腦，太陽哥哥兩部，夾埋三部！我地想要張好長既檯可以一齊放晒，然後其餘地方放書櫃，咁就最慳到地方喇！
現成當然化算ｄ，但睇黎睇去，都冇fit我地size既；唯有造啦，但成個書房咁做，問過要成六七千蚊．．．媽咪呢方面最有經驗，佢話我地五時花六時變，究竟係度住幾耐先？全間房度身訂造冇問題呀，但係for長住先化算，如果我地諗住只係住兩三年，又或者，我地會唔會生BB呢？如果有小朋友到時又要轉返做BB房．．．聽完真係一語中的！所以話呢，媽咪永遠睇野最通透同最醒！
之後媽咪都幫我行下實惠呀、唔同傢俬鋪咁．．．直至前幾天，佢係個朋友屋企見到ｄ書櫃好實用，原來係購自青衣一間夜冷店，佢朋友話ｄ野好平好新架，不過係office式囉，但如果平平地，又實用，我地又唔介意，絕對係一個可考慮既方法！我地原先已約左媽咪聽朝一齊去睇，咁岩灣仔又見到一間(不過呢間好細)，就入去睇下；ｄ野真係好抵呀，好似呢張非常新淨兼咁長既檯，只係賣二百蚊咋！
跟住我地就去唱K啦，呢幾位就係太陽哥哥既同事啦，佢地係一班活躍分子，好嘈好攪笑，每次見到佢地，佢地都會大叫我 "呀嫂!!!" 咁架，又超誇張咁HI同揮手，唔怪之得叫"跨"部門啦！聽聞太陽哥哥仲係"跨"部門組長添！哈哈～～
呢位呀SHEK哥哥好攪笑，除晒鞋當呢度係自己屋企！
同各位影下相先，不過影時VIVIAN同JENNY已走左，唉．．．影唔晒．．．有ｄ失望添．．．
今晚仲去左買生日禮物比諾諾，諾諾下星期三就兩歲啦，會係聽日開birthday party，諾諾有咁多衫同玩具，我就直接問表姐有咩想要，佢就話呢隻仙樂飄飄處處聞既CD喎，因為佢地有DVD，想要埋CD，等諾諾可以係車聽！
仲有下面呢對公仔：
呢對公仔係上星期去深圳整窗簾時買既，因為表姐話諾諾返playgroup個度有隻公仔，諾諾好鍾意佢，有次因為其他小朋友玩左佢冇得玩而喊左出黎；細妹同我都問過好多朋友，都唔知呢隻野叫咩名，好難搵！咁我見呢對都係近似個ｄ公仔，就買黎送比諾諾喇！因為係深圳貨，就算諾諾到時唔鍾意都唔太可惜麻！原本諗住買隻男仔，後尾見到隻女仔好鬼襯就買埋啦，因為諾諾話過鍾意mei mei (國語: 妹妹)呀！
至於細妹，佢已經準備好呢架手推車做禮物喇！
前幾日琪琪去玩具反斗城揀禮物，見到呢隻大barney，名為hot item，短短十五分鐘，已見三個小朋友買走啦，琪琪亦差ｄ買左，好彩佢問一問我，我又好彩打比表姐問一問．．．表姐平時成日都去玩具反斗城，呢隻大barney原來已見過，表姐仲比過諾諾抱，但諾諾好快就放低左，宜家諾諾唔鍾意barney啦！
記得呢個年紀既諾諾，成日鍾意推野，就諗到不如shopping cart啦，仲有餐車．．．最後表姐話要購物車！
沒有留言:
張貼留言