屋企裝修終於完工啦，今日鐘師傅全日係度執手尾，攪ｄ濕碎野，換燈掣、換電掣、拆窗花、吊廚房吊櫃、換瓷盆、油水管、鑽窗簾棍．．．其實呢ｄ手尾都幾多同幾花時間架，但佢係冇計錢咁幫我執架！
整到夜晚八點幾先攪掂晒ｄ野，第一次見佢留係度開咁耐工，不過亦係最後一次啦！哈哈～～不過其實裝修只係只完成左90%咋，因為仲有廁所趟門要換，由於訂造需時，要星期三先送到同裝到，攪埋廁所趟門先係正式攪掂！
師傅一走，我開頭都唔知點執，冇從入手，想死一樣，仲諗過不如搵清潔公司執啦．．．但聽日約得黎，最快都星期二，咁呢兩日唔通坐係度唔做野，甚至唔開床出黎訓咩？所以都係執啦，反正都預左時間執野．．．我先掃好全屋既地，跟住將中間既檯同櫃移返係廳兩邊，放返條通道出黎，跟住就同太陽哥哥分工合作．．．
其實我地成九點先開始抹，咁少時間點抹走咁多灰塵，我原本提議太陽哥哥不如訓多晚媽咪個邊，但佢話個邊訓得唔好，成日醒，想今晚有覺好訓，於是佢好落力咁抹我地間房先，今晚對佢黎講，最緊要有床訓！哈哈～～所以睡房交比太陽哥哥，抹完仲要砌返張床，同埋過媽咪個邊移張大床褥過黎呢！
因為睡房窗出面係騎樓，要抹就梗係同一帶一齊咁抹啦，所以我就抹騎樓啦，仲有洗衣機同雪櫃，同埋全屋其他窗，仲有個廁所，今晚要沖涼呀～～
就係咁分工合作，做晒以上既野，已經係點幾兩點啦！跟住拿拿林鋪床單，順便掛埋個窗簾，成間房就攪掂晒啦！又幾靚幾舒服喎，我地自己就好滿意鐘意呢，尤其係盞燈，真係型！哈哈～～
仲有變色壁燈：
乾淨騎樓 vs 污糟廚房：
無諗過靠自己抹既效果都幾好喎，原來肯落手做，我都係一個合格有餘既太太丫，係懶ｄ啫，嘻嘻～～聽日目標：書房＋廳！
沒有留言:
張貼留言