繼續重溫結婚既野先，因為仲有好多野要分享下！不如今日就講下太陽哥哥花左幾多心機落個婚禮度啦，有去到既朋友都知，佢真係泡製左好多野，花盡花思同精力，呢個亦都係我好感激佢既地方！好多男人攪結婚，好多野都交由女友決定同發板，但見太陽哥哥咁主動諗左咁多idea出黎，咁重視我地一生一次既婚禮，我真係好感動同開心架！我估佢應該都係一個好男人吧，我應該冇揀錯人！嘻嘻～～
冇去到既朋友，就唯有係度幻想下現場係點佈置架啦！呀．．．先講請帖先，呢個係cover，上面係面，下面係底，我好鍾意個對沙公仔架！
揭開就係我地既婚宴細節，上面係右，下面係左：
咁靚既請帖點整出黎架？一如以往，太陽哥哥先係白紙度起稿：
用相機影既完成品，跟收到帖既朋友收到既一樣：
請帖係一個重要環節，可以講係太陽哥哥花左最長既時間，因為佢希望收到帖既朋友，會鍾意張帖，唔會過左婚禮就丟左去；以下呢ｄ係絕密從未公開過既請帖設計，宜家婚禮過左，就梗係唔好"晒"，要同大家分享返，亦比大家知道原來太陽哥哥諗請帖時，一共整左幾款設計架！
呢款設計其實係我最鍾意既，因為設計好特別，用了puzzle既意念，代表住我地揀左同自己好夾既伴侶，砌出將來！加上唔係普通卡型設計，我覺得好有特色同新鮮感！可惜太陽哥哥要求過高，佢覺得太少details．．．曾經諗過將心型切開一忽忽好似真既細細粒砌圖咁，等賓客多樣野玩，但又覺得將我地個樣切開，意頭唔好，所以最後放棄了，但我仍然好懷念呢款設計呢！
面：
底：
跟住係另一款設計，用了左開右揭既三版既 idea：
左邊個款可用瑩光暗花做花邊，都幾創新架！
左邊打開：
右邊再打開：
底：
最後呢款就用了立體設計：
其實呢幾款請帖設計入面個公仔，係太陽哥哥最先畫既，諗住用黎做請帖，跟住整左以上咁多款都唔滿意，就重新畫過一張沙灘畫，最後都採用左；而呢幅畫，就用左黎做menu，我其實覺得有ｄ"晒"架，因為我好鍾意呢幅畫，覺得我"Q"住太陽哥哥，太陽哥哥又插住袋，兩個個look都好型呢！哈哈～～
呢個係手稿，最初我係紮起晒ｄ頭髮架，後來因為影完結婚相後，太陽哥哥好鍾意我係馬灣公園同沙灘個婚紗look，就加返兩條辮比我啦！
用相機影既製成品，唔講大家應該唔知，呢個菜譜同炸彈檯號，係太陽哥哥一手包辦架，佢逐張逐張咁貼落厚咭紙度，然後再界同摺，用左好多時間架！
呢個就係炸彈檯號：
手稿：
檯號既四個圓邊，界到太陽哥哥隻手抽筋咁滯呀！
炸彈除左用黎做檯號外，收到請帖既朋友都應該對佢好有印象啦，就係請帖信封封口個貼紙仔喇！
跟住到講下最受歡迎既利是封啦，真係勢估唔到，收到帖既朋友都好鍾意個利是封，利是封真係搶左請帖鏡呢，反而請帖變相失了色！
手稿：
利是封有個獨特設計，將男女兩款拼埋，就會有個『囍』字；因為我會用女仔封黎裝餅咭，太陽哥哥就用男仔封黎入利是，所以每位朋友只會收到其中一款；但又想比晒ｄ設計每位朋友睇喎，於是後面就印了一個細既相反公仔！
但如果朋友們仍然貪心想要晒一套，有咩辦法呀？咁就要新年黎我屋企拜年啦，因為用剩既利是封我唔想晒，會留返黎新年派利是，咁到時任您揀啦！不過記得帶手信上黎拜年喎！哈哈～～
最搶眼既就係燙左金既地方，成對利是封即刻『升呢』，即刻變左貴格野！哈哈～～亦唔知係咪因為燙金既開始，搶晒請帖鏡呢？！
因為收到請帖後，朋友們鍾愛利是封既反應相當熱烈，太陽哥哥就用埋個稿，整左一對紙牌公仔放係宴會場地喇！
因為攝錄公司會送兩塊易拉架比我地，太陽哥哥就諗到不如用黎做兩幅畫啦，於是另外又再畫多一對嫁娶公仔喇！
手稿：
用相機影既製成品：
打破一般婚宴賓客黎到要彎低身係 reception table 度簽名，太陽哥哥希望給賓客們一個小驚喜，亦希望佢地有賓至如歸既感覺，就整左呢塊大型簽名板，仲安排了專人影相；當賓客提名時，攝影師會叫佢地望望鏡頭丫，咁佢地就有如明星／VIP感覺一樣啦！不過此服務只能安排比準時既賓客們～～
跟嫁娶公仔放埋一齊，呢個咁寬敞既位置，就係賓客們簽名既地方喇，好在我地個場都算夠大先配合到咋！
最後，太陽哥哥連sitting plan都整埋，我已經叫佢呢ｄ唔洗整啦，冇咩人睇到，不過佢都堅持整，可惜．．．因為同場地既電郵溝通誤會，佢地只收到我地既座位表，唔知我地有埋sitting plan，咁佢地就用左佢地既sitting plan，仲係五行既排位，變左跟我地四行既排位完全唔同晒．．．我地都係當日下午去到宴會場地先知，檯亦已執好晒，冇得改．．．最後就冇用到太陽哥哥既sitting plan，亦冇黐到出黎，呢part都係一小個遺憾呢！
以上就係太陽哥哥既製作過程啦，係咪大開眼界呢？呢個真係一個大project，成個籌備過程真係相當精彩，可謂苦盡甘來！其實好多野，我都知比錢可以攪掂，唔洗自己咁辛苦，但我地唔係大富大貴，又冇屋企既經濟支持，所以好多野都係要靠自己！宜家睇返轉頭，成個婚禮都係靠我地自己一雙手努力出黎既成果，努力儲錢啦，應用錢既地方就用、唔應用就唔好用啦，最重要亦唔可以刻薄人地，闊佬自己，呢個亦係我地既宗旨，最後當然唔可以寒酸啦，雖然呢度唔係最好既婚宴場地，亦唔係咩大酒店，我細個仲憧憬過要係迪迪尼攪婚禮添，但當然冇可能啦．．．雖然我地唔係好有錢，但攪到呢個婚禮，我地已經好有滿足感，亦好難忘啦！我間唔中都會諗返，晚上十二點過後，太陽哥哥仲擔埋張摺檯出去走廊度好認真咁界紙(檯號咭)，呢個影像對我黎講，都係一個甜蜜滿足既回憶！其實親力親為，事事靠自己，都有另一番得著架！下一步係要繼續努力，向未來目標進發啦！
沒有留言:
張貼留言