2007-06-22 (Fri) 囡囡Day

今日媽咪唔返工，改聽日先返，咁可以陪我，仲唔係"囡囡Day"？Yeah！！我地又去左青衣城，因為呢個係唯一我較為去到的地方，哈哈！

今日好豐富，我地先去飲下午茶，媽咪咁好陪我，梗係我請客啦，任叫任食，兩個人，叫個六個點心，勁．．．係勁飽！！

之後行左幾間舖頭，我一心想買本相簿，係for碌齡friend既，因為一早已用完，唔夠入，其實每類的人，我都用唔同公仔的相簿，而碌齡friend我一向用開大口仔，但大口仔ｄ現貨真係唔靚，好淡色，又唔cute，令我好猶豫買定唔買好．．．連靚仔售貨員哥哥都問我：乜咁頭痕呀？您諗左好耐囉喎，好難揀咩？但我唔想再拖啦，好想買到，售貨員哥哥就係咁拎其他款我揀，後來見到本keropi，吸引我係因為佢ｄ顏色好colourful，岩我心意！而我印象keropi同大口仔都係讀書時期差唔多時期出的，心諗：買黎放碌齡fd相都唔會咁易同第二類人撈亂姐，最緊要易認！所以就扑鎚啦！另外，我仲買左個monchichi鎖匙扣比媽咪！

跟住去左豐澤搵媽咪個契仔-sony仔吹水，仲有個豐澤仔，佢地真係同媽咪好friend！乜都傾一餐，sony仔仲同我地分享佢剛剛失戀，好唔開心，佢講返佢個段戀情，愛得好轟烈，仲講到眼紅紅兼眼濕濕，我都打左個突，我以為佢好花靚仔，點知原來咁痴情同長情呀，媽咪聽到都眼濕濕添，仲叫佢唔好喊，堅強ｄ，真係愛仔心切！不過sony仔咁既表現，都令我對佢改觀左；豐澤仔仲大爆，話佢真係好傷，前排做做下野，試過忍唔住踎低流眼淚．．．真係聽者心酦．．．我地就咁就吹左半個鐘水，都幾開心！

之後睇衫，我原本想買件波波裙，但細碼都鬆，驚走光呀，不過最重要係有ｄ似．．．小鳳姐！哈哈！最終我冇斬獲，但我就揀左件衫比媽咪，又係我送比佢添，氹到佢不知幾開心！

跟住我地行零食物語，媽咪買左ｄ零食比為食妹！行行下又口痕，去左"滾滾紅茶"食下午茶，好飽呀！您地睇我媽咪幾鬼馬！！

食完又繼續行，今日ｄ衫舖差不多比我地睇晒！行行下睇睇個錶，嘩！八點喇！我地係青衣城竟然蒲左五個幾鐘！！係時候返屋企lu，由於我地都食埋"晚飯"，但驚夜ｄ肚餓，同細妹都要食野，我地就買左想試左好耐既每日鮮製既"美心彈蛋糕"！

食後感係．．．好麻麻地呀．．．大家可睇下算啦！

今日既"囡囡Day"真係好豐盛，除左節目豐富外(雖然只係係商場行吓咁)，最緊要係媽咪只陪我一個人，冇細佬細妹份，嘻嘻！令我有種．．．我細個時細佬妹仲未出世，只得我霸佔住父母所有時間的感覺，so sweet！！