尋晚口痕，成十二點幾，於是打開雪櫃搵野食，就食呢隻百福既椰芋奶凍啦，一開，紫中帶藍，幾靚，正想食之時，覺得個藍色好似怪怪地，就問細妹係咪咁色架，因為係佢買架，佢話食過應該得紫色架喎，我就拿拿聲開埋另一盒，真係純紫色噃，好彩未食落口．．．但係六月七號先過期，真奇怪，可惜張單己丟左，唔係實拎返去換！
今日沖涼，我竟然慘遭偷拍，兇手梗係鹹豬手肥妹仔！！見我的重要部位冇入到鏡，就post出黎比大家幫我評下理，我係一個跛腳病人，隻腳已冇得濕水，沖涼時只可以包到咁去沖，好易會失平衡，仲要比人偷襲，天理何在？
今日我應承左碌齡的朋友的聚會，因為佢地誠意拳拳，加上我係靈魂人物，無我就會失色好多麻，上星期我已冇去，係時候覆出啦！最重要休真係好有誠意，話一齊搭的士，仲揀間係正齡場對面的酒樓一齊打邊爐聯誼先，架的士亦去到門口，咁有誠意怎能推呢？就係因為趕住出門口，拿拿林沖涼，先忽略了周遭環境原來係危機四伏，先被人成功偷窺到！大家以後真係要小心，身邊往往您認為最安全的地方，分分鐘係好危險架！
好耐都未試過咁大班人打邊爐啦，大家好似餓鬼咁，企晒係度"十"下"十"下，睇黎，都係任食先岩呢班朋友，哈哈！
到碌齡時，個個都唔建議我碌，但我就話唔通齋睇兩粒鐘？您地有冇顧我感受？於是逹成共識，試一球先啦，好開心，我諗住唔助跑，純粹行出去拋個波出去就冇問題，點知．．．低估了自己的我，個球係落坑．．．自信心被深深摧毀的我，感到好傷心呀！所以只係坐埋一邊睇佢地玩算了，中間，有時都玩下佢地，大叫：唉，好悶呀！佢地聽到都會過黎陪下我，同我玩下痲下，算佢地啦！值得一讚係琪琪，今日佢竟然碌到144分！叻女！
沒有留言:
張貼留言