2007-06-15 (Fri) 氹媽咪

前天媽咪傷心地告訴我，話返工車轉車時，唔見左張八逹通，應該跌左係上一架巴士度，入面餘值成二百七十幾蚊，仲有八逹通積分成八十幾蚊，好無奈同勁唔抵呀！我都覺得係，所以．．．尋日決定氹返佢開心，我係度諗，如果男朋友係咁，我會點呢？我會買過張比佢，入面再值多ｄ值，相信對方會幾開心；所以我就用呢招，仲寫左幾隻字比媽咪，再係信紙上面界口，攝住張八逹通，然後放係佢電腦枱，比個驚喜佢！

佢見到後甜到漏呀，仲話我係"傻豬"添！原來，氹人都會好開心！

其實，自問都好耐無花時間氹下媽咪，我個人好矛盾，無可否認，有時我真係覺得媽咪太偏心，攪到我好無癮，覺得佢真係無欣賞我對屋企的付出咁，好幾心淡架，所以變相好多時一ｄ野，都係因為禮節上或者形式上要做才做，唔係真係有心氹佢而做，好似節日食飯，送禮物咁！

但諗返前幾日，媽咪做左樣令我幾感動既野，就係派錢！事緣係，我地欠佢好耐的母親節禮物遲遲仲未買到，因為佢三心兩意呀！最後迫到佢買啦，係價錢四位數字的手袋！

身為媽咪，我唸佢知道我地唔係好有錢或者充裕，加上佢知我ｄ流動資金好多都用黎買左股票，嘻嘻！佢突然係房走出黎，楂住幾十張一百蚊紙，大叫：媽咪今日開心，派錢呀，大家生日快樂！真係笑爆咀！我地問佢，您係咪short左呀？佢話媽咪比錢仔女，要原因既咩？雖然呢句佢抄襲我，但我地個個都幾感動！我地唔係市儈，見佢派錢而感動；而係明白佢當中的用意，就係唔想我地晒咁多錢係佢身上，佢比ｄ錢我地，咪當佢都夾返份，個袋一齊用啦！佢仲特登揀個young ｄ既款，等我地都可以用！

其實今次氹媽咪，除左因以上呢件事外，仲有係太陽哥哥曾經講過令我幾深刻的說話：一家人，ｄ錢都係碌黎碌去，咪當係您氹下我，我氹下您囉！幾岩呀！

不過，如果得我同媽咪，我都相信可以100%做到，但我地當中，仲有個幾唔掂的細佬，佢好多野都令我好唔鐘意，又成日激我，但無奈地，媽咪寵得佢太犀利，令佢物質享受太豐富，但偏偏，佢對屋企人係極度冇心同自私，仲成日駁咀，總之對朋友甚至新識的朋友咩都得，對屋企人就好唔得．．．

就好似，前日同爸爸食飯，我地同細佬講，呢餐係同爸爸慶祝父親節，我地唔迫您除三份，您仲係學生，您心意夾幾多呀？佢竟然話無錢唔夾，聽到都打個突，我同細妹即刻叫佢咁您自己比返自己個份，冇理由要我地請埋您；點知佢仲話家姐請細佬都應該姐，聽到真係嬲到爆！我地叫佢夾，係因為知佢有做緊暑期工，都有二百幾蚊日，心意姐，夾五十蚊又好，二三十都好丫．．．仲有就係，佢第一個月返工時，媽咪係照比零用錢佢架，咁筍，點會無錢？係睇佢有冇心姐！仲係學生咋，做下暑期工，第二個月，就join埋綠色力量，每個月捐款一百蚊；但請爸爸請飯就話無錢，平時爸爸比錢就袋袋平安，始終個個都係爸爸，您唔鐘意，一係唔好黎食，難聽ｄ講，佢都係知個日媽咪打波唔煮飯，自己食要用自己錢，就黎"痴"餐；您話丫，呢種心態係咪好唔得丫？唉．．．

所以某程度上，我係因為呢個細佬先唔係咁buy媽咪的做法，可能唔想ｄ錢碌左係佢身上，仲寵多佢幾錢重啦；或者我都要諗下，氹媽咪，做仔女點都應該，如果自己咁執著唔想碌左落細佬度，咁就諗ｄ直接ｄ的方法，直接碌落媽咪度囉，就好似今似八逹通咁！

但媽咪個日派錢，佢再靜靜入黎比多ｄ我同細妹架，算佢啦！哈哈！其實，係咪呷醋作怪呢？