2007-06-30 (Sat) 小學五週年校慶

今日係個幾月前同黃老師食飯時已約好左的"小學五週年校慶"，今日黎到的有：上午六位朋友仔，下午兩位朋友仔；返到小學又有種拾回童真的感覺！我地識的老師得返黃老師咋，零五年七月時返黎參加三週年綜藝匯演時，明明重有文主任，劉主任同楊主任，點知佢地今年都冇做了，有ｄ失落！我諗唔係黃老師仲係度，我地都唔會返黎啦，都冇人識我地，希望呢日唔好咁快來臨啦！

校園外觀

師兄妹的得獎作品

畫畫天份都好勁，簡直係文武相傳

開放日地圖

永遠不忘的校訓

跟黃老師的大合照

跟校長的大合照，壁畫好厲害吧？

跟小白兔合照

跟同學仔合照

舞蹈表演

唱遊表演，好大好得意的計算機，間尺，鉛筆同字典！

最後的獻唱環節，我地舊生都有份架，搵唔搵到我呀？

台下好多觀眾呢！

課室的壁報板總是色彩繽紛

見到咁細個又肥嘟嘟的小朋友，好似去咗幼稚園呀！

功課．．．不能相信宜家的功課咁型，唔再係只係校簿寫寫黙黙咁簡單

課室的枱櫈好細張呀！

我的戰利品，最鐘意有心心好colourful嗰個，係膠folder黎架

好開心欣賞到早上的表演節目，真係好精彩！最深刻係"花式跳繩"，同學仔話簡直可以去參加殘酷一叮呀！這個短片一定不能錯過！

其次，有小白兔小馬騮唱遊

仲有舞蹈表演　　　

之後約左媽咪琪琪tea，跟住過對面海，拎labels比太陽哥哥，真係唔夠用．．．差兩張，激死！

今晚原本約左休佢地出黎玩，點知改咗聽晚，我同太陽哥哥唯有幫襯樓下的潮州打冷，有我至愛的一味餸．．．"蠔仔粥"，yummy yummy!! 呢餐飯似唔似時下好多的"模範(無飯)夫婦"呢？希望我地第時唔會餐餐係咁啦，哈哈！

今日節目真係好full好充實！HAPPY HAPPY！！

2007-06-29 (Fri) 神奇四俠 & 別府晚餐

呢兩天太陽哥哥都放假，原本諗住去旅行的，後來因種種原因都係放棄了，而媽咪又有介紹比太陽哥哥，所以佢都唔銷假，做下part-time同陪我啦！因為聽日我要返小學，所以我就叫佢今日唔好做part-time，聽日先啦，我地原本想去新開的Megabox行下B&Q同睇戲，但因為媽咪有labels比佢，我地就約左一齊食晚飯，所以唔夠時間，就去左APM睇埸戲算啦，睇了神奇四俠，麻麻地．．．係戲院入口有好大個的simpsons家族，好colourful呢，梗係唔少得拍照留念啦！

之後接琪琪放工，一齊返青衣食飯，我地揀左好耐冇去的"別府"，好好味，因為有好辣的血地獄拉麵，我地揀左第四級，仲有八級同十六級，一定辣瓜啦！

點知媽咪話太陽哥哥要拎的labels係威哥度，但威哥去左旺角食飯，我地就諗，出唔出旺角拎呢？其實手頭上的labels都應該夠，所以都係唔出去拎lu~~

今日的行程好似因要拎labels而改變，去唔到Megabox，但改完最終又冇拎到labels喎，唉．．．不過冇所謂啦，同到媽咪食飯，一家人，又開開心心！今餐係太陽哥哥請的，答謝媽咪介紹part-time比佢！Thanks~~

2007-06-28 (Thu) 壽司麻雀 & 張小嫻新書

今日係教協見到的壽司麻雀，好似好好玩咁，因為平時係cafe玩ｄgames都好開心，諗住買副看門口，同朋友玩，但pictionary實在太貴了，差唔多成三百蚊，呢幅只係一百蚊，都抵玩既！買唔買好呢？都係影張相返去問吓琪琪同ｄ朋友仔先，咁大盒，買返去都驚比媽咪鬧呀！

另外買左我最喜愛的張小嫻的新書，我都唔知佢出左新書，多得Yammy話我知，係教協買真係平好多，原價$55先$44！抵呀！不過封面血紅紅咁，我唔係太鐘意呀．．．

2007-06-27 (Wed) 覆診之六

今日去覆診，天氣原本好地地的，但好黑仔，係我落車時落勁大雨，好在我．．．夠靚女，有位哥哥仔同我一齊落車，問我係咪去醫院，自動請纓遮埋我！哈哈！不過，真係勁勁大雨，好想同呢位好心人拍照留念，但唔夠gutsy，唉．．．

醫生話我比上次冇咁腫，幾好，再消腫ｄ就唔會覺舊骨又斜返；但我腳趾公郁唔到乜滯，無論向上向下，用力時仲陣吓陣吓，好似好驚咁，哈哈，我問醫生我唔想震架，佢自己震，係咪ｄ神經線有問題？佢話係正常，因為好耐冇郁到，宜家就好似小朋友學行咁，慢慢黎啦！佢叫我係屋企練習，放一塊毛巾係地，然後用腳趾抓住，咁就會慢慢好ｄ架啦！醫生話可寫紙去做物理治療，問我要唔要，我話我想自己練吓先，下次冇好轉先考慮啦！因為我之前都唔知ｄ腳趾其實可以曲到幾多角度，今次問左醫生，佢話45度，但就唔好90度咁趷起咁多，咁我知道幾多，我就可放胆練習麻！不過下星期醫生要開會，所以要過多個星期先覆診啦！

今日將晒好的相送比醫生，佢好開心，係咁多謝多謝，仲再叫我係相後面簽返我個大名上去，又問我個英文名真正的讀音！