2009-02-11 (Wed) My 2009 Birthday (下)

之後太陽哥哥帶我去左蘇豪東，呢度沿住海旁有好多餐廳，都幾好feel架，不過我地今晚食buffet，唯有下次有機會先黎試啦！

之後直駛金鐘，途中見到．．．

大哥呀~~ 太陽哥哥開心到差ｄ想停車睇！

今晚自助餐地方係太古廣場萬豪酒店，仲有三個鐘free parking，正呀！

我第一次黎萬豪酒店食buffet咋，呢度環境好得呀；自助餐就係樓上食，下面就係cafe，成座落地玻璃，個view真係一流！

食buffet的地方：

趁未天黑影下相先：

準時六點開始，梗係先攻海鮮先啦！

黎個close-up先，我最愛當然係生蠔，食左七八隻；龍蝦亦非常受歡迎，個鉗啖啖肉，我食左好多個呢，龍蝦就半隻半隻咁切好晒比人拎，我真係未試過食buffet係成隻龍蝦拎埋位架！

拎完 1st round 就飲杯，影返張相先！

貪得意食片皮鴨，似雪茄嗎？哈哈~~

甜品時間：

返埋位時有個意想不到的驚喜，有位侍應哥哥捧來點了蠟燭的小蛋糕，還有我的名字呢！原來係太陽哥哥下午打電話黎安排既，好驚喜好感動呀！

表姐夫到來祝賀，順便借我地他的會員咭；估唔到係佢會帶住禮物黎，原來係表姐千叮萬囑叫佢預備架！WINNIE：呢度您要睇清楚喇，KELVIN好攪笑呀，佢搶住要同我影相呀，話要有相為證佢將任務順利完成喎，仲叫我記得將合照放上blog等您知道呀！哈哈！(搶住影相就講笑既!!)

睇我幾鍾意~~

趁KELVIN係度叫佢幫我地影張相先，因呢度個侍應哥哥唔太掂！

影多張自拍就走啦，我地仲有下場，但我已經開始攰啦！

下場係返旺角睇"游龍戲鳳"，終於等到睇華仔啦！生日有coupon，加上積分又換了張free ticket，多謝GH請我地生日睇戲啊！

游龍戲鳳我梗係覺得好睇啦，因為有華仔麻；其次，澳門取景真係好靚、好靚呀！住宅博物館、松山燈塔．．．無論日夜定夜景，都好靚好靚！仲有舒淇既綿羊仔，都係吸引我既地方！不過現實ｄ講，故事似乎欠缺真實感，可能我太理智啦，現實又點會有童話故事呢？只睇舒淇同華仔的愛情故事，好似好浪漫咁，但睇真ｄ，華仔結左三次婚喎，同舒淇拍左幾日拖就又求婚，呢個有錢仔對感情既了解有幾多呢？對婚姻又覺得係ｄ咩呢？

反而何韻詩個段愛情故事幾好笑，雖然都係脫離現實，但係碼有多ｄ笑料，唔係只用浪漫舖排，係個男主角唔靚仔囉；林嘉華又係唔係靚仔，所以佢段愛情故事唔太吸引我，個女人我又唔識！

最鐘意睇係華仔何韻詩林嘉華三個撈埋一齊時，場泳池醉酒戲演得好好呀，ＣＣ叔叔變了司機叔叔印象最深，笑到我拍晒大脾，勁好笑！另外，達明既"幸福係要自己爭取"既節目亦都好好笑！

今日的禮物係戒指，頸鍊唔戴得，因為好易敏感；手鍊又已經有，加上戴左我就好少換既，要除麻煩麻，明知戴住沖涼唔好都照做，皆因太懶，哈哈！戒指方便替換，岩晒懶惰的我！

我特登係盒入面界左幾行放戒指，宜家有兩隻啦，幾時儲夠六隻呢？嘻嘻~~

今個生日節目真係好豐富，我玩到好攰呢！原本計劃左去旅行，唔成行都有少少失望，仲要係因自己既事去唔到，但係香港都過得好快樂丫，多謝太陽哥哥的安排！亦要多謝BEN借架車比我地，唔係行程點可能咁豐富呢？

仲要多謝各朋友的祝賀：Tracy、Jimmy、Ben、Yau、Ching Wing、Yolinda、Didi、明記、漢、Esther、Yammy、Michele、Phoebe、Ronnie、Winnie & Kevlin，有親口講既，有sms既，邊樣都好，我都多謝各位！

踏入三字頭啦，有幾位朋友衰衰咁同我講，歡迎我加入佢地既三十大軍喎，真係激死人！不過我想同您地講返，雖然我係加入左，但我仍然係呢 group 中最細既一個囉，呵呵！！

有人陪，呢個三十大軍都唔係太恐怖啫，加上我宜家咩都有，有錫我既屋企人、有幸福的愛情生活、有份好穩定同收入好既工作、仲有幾位身邊的摯友；雖然我個人又懶又怕辛苦，個人冇野心又唔會力爭上游，反而追求平穩的生活，生活安份，每年可以去下旅下咁我已經好滿足！我唔洗點捱，已經有人生呢四樣野，已經好過好多人好多喇，今日真係要多謝上天係過去三十年既眷顧呢！

其實今日睇游龍戲鳳都有得著架，華仔開頭既開場白好深刻：傳說，幸福係一個水晶球，一直放係天上面；直至有一日，唔小心被打爛左，變成碎片，一塊一塊咁跌落人間；世人知道後，好拚命咁執，有ｄ人執得多ｄ，有ｄ人執得少ｄ；每個人點都會撿到一ｄ，但係，唔會有人係會執得晒全部，亦唔會有人係一ｄ都執唔到既！

我自己聽完，學識左要珍惜我所執到既(現已擁有或者個天賜左比我既野)，唔好咁貪心想執埋人地個ｄ(成日去渴望點或者去恨有ｄ咩咁)；黎緊既日子，我希望維持原狀，唔好比宜家辛苦就可以了，哈哈！咁當然都要長命百歲先可以享受到宜家所擁有既一切啦，亦順道希望我身邊所有錫我同對我好既人平平安安、開開心心咁過每一日！至於唔錫我同對我唔好既人，以上既祝福就冇您地份啦，真係 sorry 喇！

" Happy  Birthday  to  ME !! "