今日我嘗了人生第一次當導遊的滋味，由於爸爸公司唔夠泰語導遊，但同時間有兩團佢負責的旅行團撞了一日期，佢就叫細妹頂，因為今日做的純粹係由深圳帶班旅行團過關到香港，再送佢地入香港迪士尼，唔洗day tour(係車度行香港景點)，所以唔洗講泰語勉強都冇咩問題；細妹推唔到爸爸，因為真係冇辦法，而佢又驚單人匹馬，所以又叫埋我去陪佢；橫掂又有人工有錢賺既，我又覺得幾得意，人生有唔同體驗都好丫麻，所以我就應承左喇！
我地好早起身出發啦，因為要八點半係深圳新都酒店集合！
原本以為係ｄ低grade酒店，點知去到又唔係喎，大堂好大好靚，好似五星級酒店咁；仲有棵巨型桃花呢，晨早流流，梗係行返個桃花運先啦！
酒店正門仲有隻巨型金牛：
唔知點解成日都會比我遇到我的生日no.既野，上次黎深圳玩小型賽車前，飲茶時既211檯號啦；今日又比我遇到211車牌既靚車！看似小事，但要係平常生活遇到自己生日no.既野，又真係唔易哥喎！
團友的節拍非常慢，約好八點半大堂集合，最終九點半先齊人，我係團友之一的話實火都黎埋啫！
車上有本身跟團來的泰國領隊，還有負責大陸呢邊的導遊，我地一早黎到已經同大陸導遊溝通好，所以上車後佢同團友們交帶聲我地係邊個，我地就可坐低，因為香港個邊先係我地正式in charge！
泰國團友們：
做導遊真係唔係易事，要識係成班人面前攪氣氛，仲要連歌都唱埋，我仲以為早年代既旅行團先會咁既呢！
我地過既關口並唔係深圳或者落馬洲，而係新開既深圳灣口岸，因為呢度係最方便旅行團既，大陸同香港既海關counter都係同一層，唔洗團友拖住ｄ行李上上落落，所以今日可見識到新開既深圳灣口岸，都係一種得著！
開始進入深圳灣口岸範圍：
國內的建築越來越model了！
團友們落車拎返自己既行李，跟住好似鴨仔團咁排隊，聽指示一陣點過關同係邊度等，十足我地平時去旅行時一樣，只係今天身份對調，呢個體驗真係幾得意！
ready就跟住我行啦！
排隊過中國關，旅行團只得一條隊，有排等．．．
出香港關時有海關狗呀，好在冇帶煙花過境咋！(今朝真係有咁諗過，險!!)
係深圳灣口岸過關，出黎香港就係流浮山個頭，電話等左一段路先收到香港網絡，真係要有待改善；海入面有好多籠，應該係用黎捉魚掛?!
跟住我地直駛九龍城富豪酒店，呢part真係亂到爆，所以冇時間影相；呢part係我地全日重點，做最多野既，去到要轉第二架旅遊巴，因為我地唔再用呢架過境車，貴好多架；落車時又要幫手搬行李，計埋頭先過關後上車，我已經係第二次搬晒成車既行李上車落車啦，呢團有18個團友架！跟住又要check-in，又要安排ｄ團友係邊度休息等候，個泰國領隊又bi li ba la好鬼煩；當中又有兩個團友唔去迪士尼，佢地想去黃大仙，又好急咁問想上房先，一陣點去點叫車等等，衰在佢地離隊今晚餐飯又要join返食喎，咁又要攪佢地到時係邊度等，仲有佢地張電話咭search唔到香港網絡，又係咁想我地幫佢check，但我地做緊check-in，係正經野架麻！好混亂．．．最大原因係溝通問題，語言真係好重要呀！
總算settle好晒就去迪士尼啦！
約好團友五點半係邊度等後，就由車場帶佢地行去迪士尼，送晒佢地入場後，我地既工作就完成了一大半，晚上會有返個識泰語既香港導遊帶佢地架啦，剩低既工作就係到時帶個導遊搵返佢地就攪掂！
黎到大門口梗係影返張相留念啦，平時黎親都有得入去玩，今次就冇份，都有ｄ失落感架！
無得入去玩，唯有行下出面兩個攤檔啦，宜家先一點鐘，仲有成四個幾鐘，我地就決定去東涌行街啦！
今日好靜冇咩人，我就做攝影師，叫細妹影ｄ跳起相，影左兩張後，我諗住攪掂走啦，點知琪琪望下後面，見無人竟然話：下？咁快走？我岩岩先warm up好，仲有好多甫士未出！我聽到Ｏ晒咀，竟然自己要求，梗係平時佢見我同太陽哥哥跳得多啦！所以影左好多張．．．超爆笑吧？
我係一個有image既人，當然唔會係public area做ｄ咁既野啦，哈哈！
一日內遇到兩棵大桃花，希望今年真係旺到桃花啦，嘻嘻～～
冇人真好，周圍影都冇人阻擋視線！
成架車冇人咁滯，我地又可任影唔嬲，爽！
去到東涌第一時間係去醫肚，因為由今朝起身到宜家我都未食過野呀！太陽哥哥比定ｄＭ記咭仔我上路，冇左銀包都唔怕冇錢買野食，真係用得著！
睇琪琪個樣幾肚餓，哈哈～～
呢度超勁多OUTLET，幾乎每間shop都係，真係勁齊全；可惜我對sports shop冇興趣，只係IT同ESPRIT較岩我咋，其次童裝kingkow同chickeeduck都唔錯！
THOMAS店咁colourful咁起眼，我地都被吸引呢！
左手專用的筷子，宜家ｄ小朋友野真係好周到呀！
係度我買左個電話比諾諾呀，留意幅畫會變架！
買電話比諾諾係因為見呢部係摺機，同我部真電話一樣架；年初一食飯時，我見諾諾好鐘意玩我部電話，所以一見到咁似就即刻想買比佢啦！
同我個部差size差唔多架咋，係咪超似呢？
跟住係東涌等埋爸爸，佢個團遲我地個團一個鐘入迪士尼玩咋；跟住一齊搭地鐵返迪士尼接返各自的團，我地個團五點半，佢個團六點半！
係欣澳琪琪好high，拍左以下雖 low b但超攪笑片段：
地鐵內仍然好少人，咁岩今次一入黎見到chip n dale！
識泰語的香港導遊都到左，我地交低返今朝做既野同酒店資料比佢後，就完成我地今日既工作啦；之後跟爸爸六點半集合個團出返九龍，今次係我第一次睇住爸爸點帶團呢！不過佢講咩我都聽唔明，只係見佢又笑下，ｄ團友又笑下！
好似我地去旅行團咁，導遊會係車上sell野；爸爸都係，我真係覺得好特別，一樣都係遊行團，但唔同的身份同角色，所體驗既都唔同；今日初嘗做導遊的滋味，發覺帶團都唔係易事，communication、time management、logistics等等，終於明白到時間係depends on 團友而唔係自己，唔怪之有時約爸爸ｄ時間咁難就；其次係要識執生，轉數要快；另外仲要行好多路，都幾辛苦呢！
沒有留言:
張貼留言