丁媽媽

2007年10月11日星期四

2007-10-11 (Thu) 多重心思的驚喜

今日收到ELSA幫我儲的瑩光橙特別版叮噹，點知入面仲附送一張心意咭同一對耳環，仲係我喜愛的心型！感動，窩心．．．多謝您呀！

見您咁有心思，呢個blog effect特別整比您，您係第一位呀！

瑩光特別版就咁儲齊左三隻，仲欠閃粉特別版咋！

2007年10月10日星期三

2007-10-10 (Wed) 棉花信件

今日收到封好大舊的棉花信件，外面軟林林，洗唔洗咁大舊呀！哈哈！

一打開，係朋友幫我儲的叮噹印仔，驚整爛所以用棉花包到咁厚，細心得黎又令我覺得好攪笑！多謝CLARE！

計埋呢ｄ，我成套叮噹印仔儲齊晒啦，但只係普通版；7-11好奸呀，無拿拿又整多六隻特別版，我只拎到兩隻咋，激死人啦！

2007年10月8日星期一

2007-10-08 (Mon) 好多雞腳

平時跟太陽哥哥好鐘意食的"泰妃雞"，通常我都會要湯唔要野飲，因為保證一碗實跟一隻雞腳（只係試過一次冇，可能唔夠雞腳．．．哈哈），而我又好鐘意食雞腳！

個日下午放假去食，我問係咪有雞腳架，個哥哥仔話係呀；跟住一黎到．．．嘩，一個盅仔的湯竟然內有三隻雞腳！洗唔洗咁益我呀！可能知我乖女特登放假陪媽咪睇醫生啦！即刻影低比太陽哥哥晒下命先，嘻嘻~~

2007年10月6日星期六

2007-10-07 (Sun) 品冠梁靜茹 Way Back Into Love 回到愛

呢個係琪琪搵比我的，好開心，兩樣我好鐘意的野，呢首歌同梁靜茹！Thx琪琪！

雖然好鐘意梁靜茹，但都要客觀講句，佢唱得麻麻地呀，好似含住舊野咁，未聽前，諗住佢咁叻女，廣東話都講得咁正，英文應該都幾talk得添；反而品冠令我刮目相看，唔睇佢個樣，都有外國口音feel，唱得幾型，唔錯！

2007-10-06 (Sat) 十四個月啦~~

今日係同太陽哥哥一齊十四個月啦，恭喜恭喜，嘻嘻~~

一早就上左常平佢舊朋友準備開的燒腊舖睇下個招牌點整，講起常平，有ｄ掛住阿細六月出世的ＢＢ女添，六月中上去飲滿月酒個時(http://hk.myblog.yahoo.com/aquarius-givens/article?mid=1132)，佢都幾大隻架啦，唔知宜家係咪變左個小肥Ｂ呢？

下午返左深圳整野，之後去左STARBUCKS坐，太陽哥哥幫我揀左個香港好似冇的朱古力蛋糕，又真係幾好味喎！但杯咖啡就苦左ｄ，都係太陽哥哥親手調比我個ｄ好飲，唔太甜、濃ｄ朱古力味、唔太多我怕肥的cream，好懷念呢！

我地係starbucks嘆左成粒幾鐘，因為要等埋BEN，等我可以順便去佢鞋舖度掃貨，可惜今次ｄ款麻麻，又冇咩靴，激死！之後原本約埋爸爸係上面大吃一餐先回港碌齡，但爸爸臨時唔得閒，我個朱古力仲係個肚度未落格，最終都係返香港食"譚仔記米線"！

跟住去碌齡，約左十一點，但要等BEN細妹攞返架車，遲晒大到，十一點九先到，我最憎遲到，比BEN拖累晒！好彩未有齡咋，唔係班friend實炸型！最開心今日有新隊友加入，就係ELSA同DAVID，仲有DAVID的朋友；但要佢地等左成粒鐘，真係超唔好意思，sorry呀！不過您咁遠都肯黎一齊玩，我真係好開心好感動！今日掛住玩唔記得影低同您開心一刻，激死呀！

我好鐘意禮拜六的碌齡節目，每個禮拜都一定會去咁滯，應該係成班朋友都會好自覺地預留左呢個時段比大家，呢種感覺您話幾好，有種sweet sweet加朋友情義係入面！我相信大家旨在唔係碌齡，而係見到咁大班同一興趣的朋友，又可以聚首一堂，談笑風生！佢地真係好攪笑，又多有味笑話，係我的開心果！我好鐘意您地呀！

2007年10月5日星期五

2007-10-05 (Fri) 撞到爆的禮物

繼前日收到warm到爆禮物，尋日收到冧到爆的禮物，今日竟然收到．．．撞到爆的禮物！哈哈！

上星期已睇中我最愛的chip n dale月曆，但因為賣晒冇貨，只係買左marrie比Phoebe，點知太陽哥哥靜靜幫我check晒左幾間舖頭，想返貨時第一時間買到比我！

今日帶返公司，點知．．．另一同事又買了送比我，我相信，送的人實會有ｄ失望，始終想比個種開心人地，原來已發生左．．．但對收禮物個位，其實一樣都好開心架！因為我會諗到，真係好多人都好錫我！

2007-10-05 (Fri) 搵到您啦！

哈哈哈哈，搵到您啦~~

早前的台灣entry提過我地上機時，被迫放棄左ｄ木瓜牛乳，攪到好唔開心；上年十月我同太陽哥哥去時咪又係咁拎，點知今次咁唔好彩，諗起又激氣啦~~冷靜先，因為憑住我咁聰穎既頭腦，我實諗到計既！

其實唔係咩諗到計既，只係比心機搵下啦，亦要多謝好友didi以佢過往百貨界的management trainee經驗，教左我好多channel去搵，聯絡過Jusco、Taste、Citysuper、UNY．．．問埋推廣台灣節係幾時．．．最後send左email問台灣統一的香港代理contact，等唔切就搵到幾個以"統一"名稱開始的公司電話，問下係咪台灣統一的香港代理．．．最後，梗係問到啦，佢地話礙於入境同政策問題，香港賣的那款不能名為"木瓜牛乳"，而係"木瓜奶類飲品"，亦沒有冷藏版的，但保證味道係一模一樣！仲話我知係邊間超市有售，個日放工即刻去買啦，點知個間超貨架冇放呢隻product，佢地幫我查埋邊間有；但唔順路，唯有等第二日放工去買啦！買完返屋企，即刻雪係雪格，因為夜ｄ會見到太陽哥哥！

之後唔洗講啦，佢好肉緊攬實我，話我傻妹囉！因為佢知便利店有得買，我話係咩？個日您樓下個間無喎；咁就唔知啦，可能咁耐都唔同左；佢話好好味，唔止一樣味，直情好味過台灣，因為我咁辛苦買比佢，哈哈！雖然味道冇分別，但論包裝，梗係台灣版出色好多，香港版成隻牛係度，真係有ｄ"leung"味，唔知係台灣統一的木瓜牛乳，根本吸引唔到我去買！哈哈！

之後check返email，發覺台灣個邊有回覆啦，不過佢地好醒，send左比香港代理答我，我開頭見到andy lau，仲以為係華仔添，空歡喜一場！不過佢真係遲左少少覆啦，連奶都飲左落肚lu！hehe~~

Subject: 木瓜牛乳

張小姐，您好！

我是Andy Lau，統一國際(香港)有限公司的助理產品經理。首先多謝閣下支持統一產品。　閣下提及的木瓜牛乳，在香港的名稱為木瓜奶類飲品，閣下可以在吉之島、百佳、惠康、華潤萬家超級市場購買此產品，但只有常溫的紙包裝，沒有屋型冷藏裝的。

現附上產品照片，供閣下參考。

謝謝

Andy