Ben下個月930結婚啦，我有幸成為大典的兄弟團之一，今日佢就相約我地兄弟幫黎個首聚，順道派帖比大家！我地去左荃灣綠陽新邨的美心，亦係Ben下個月的婚宴地點：
我地八個人點了半席雞煲翅海斑宴，好在冇加餸，始終有三個女仔係度，六人份量剛剛好！
嶺南玉鴛鴦 (第一次見呢款餸, 好特別!!)：
白灼游水生蝦：
生炒龍穿鳳翼球(好味!!)：
竹笙法海蒲團：
老派雞煲翅：
清蒸海石斑：
脆皮皇子鴿：
懷舊生炒鮮排骨：
叉燒撈粗麵：
等甜品時，Ben派帖比大家！
休作狀補粉等影相上鏡靚ｄ喎！
我地都未有ＢＢ，攪咩寫闔府統請呀？！
甜品鮮檸馬蹄露味道又酸又甜，有點怪，我就幫大家爭取睇下可唔可以換第二款甜品！
呢個世界只要您有禮貌，您客氣時人地都會尊重您，加上我地又唔係搗蛋，所以瞇眼經理超好人咁換左．．．睇下，五款甜品任您揀呀！super great，瞇眼經理super nice！
但佢地係咁笑我囉，話諗住我只係成煲換過一款，點知我若無其事＋唔怕樣衰咁逐款逐款問大家要邊款，攪到經理要搵紙記得咁．．．
我：腐竹白果邊個要？(跟住自己舉手．．．)
我：紅豆沙邊個要？(數幾多個．．．)
我：綠豆沙邊個要？(數幾多個．．．)
我：紫米露邊個要？(數幾多個．．．)
當時我又真係冇為意既，聽佢地咁講完，又真係有ｄ好笑既
！不過又覺得，唓～～咁我問時您地又舉手？！太陽哥哥仲笑到收唔到聲，又要忍笑，係我側邊笑到chok下chok下，唔洗咁誇丫話
？
餐飯食左三個鐘，九點散席，中間亦大致傾了rundown、dress code、幾點集合等事宜；攪到我都好興奮好緊張，好似好好玩咁，因為我第一次做兄弟麻！不過服裝方面我真係要認真諗下點著．．．
臨走前影張大合照，兄弟幫到時會有八人，CW同KY唔係，到時還有鑫、非洲、Ben同事Ricky，不過佢地今日唔得閒所以黎唔到！
我叫大家做930手勢，變成左呢張咁既相！
飯後應休邀請，一齊返青衣城睇十點半『綫人』，開畫前的出品人介紹好特別，好多好多條糾纏著的綫，有點似我們的兒時玩意 - 解繩，又有點似紅外線保安系統互相交纏著的紅外線咁．．．鏡頭不停帶觀眾從線與線之間進入一層又一層的線，繼而帶出呢套戲的戲名 - 綫人，有意思！
套戲好正，霆鋒好出，開始對佢放低成見；張家輝繼續好戲，佢對老婆份情，睇到我好鬼心up；桂綸鎂角色一般，唔係太出，反而我諗搵谷祖琳演可能會好ｄ；最爆笑係霆鋒差點被大佬踢爆係綫人之時，緊張關頭張家輝輕鬆的爆笑手法圓場，呢幕條橋好掂，全場爆笑，我拍手咁滯！不過呢部份亦係全套戲最輕鬆的一幕，之後都好緊湊，結局亦有點 heavy，好悽慘！完場時佢地仲話每次有錢嘉樂做武術指導就要斬手，又好似真係喎；證人問個細路女用左手定右手寫字、門徒廖啟智成隻手被斬落黎．．．不過呢套戲冇成隻手斬落黎既，大家唔洗擔心！
沒有留言:
張貼留言