2008-08-25 (Mon) Yammy first day & 諾諾豬 & 鼻咽檢查

今日係Yammy歸隊第一天，我點可以唔返工呢？佢宜家坐住係Prof. Cheung間房先，等Yammy今朝settle好晒，我地影相留念啦！

Prof. Cheung出左名鐘意Ｍ＆Ｍ，之前係佢屋企已見識過(http://hk.myblog.yahoo.com/aquarius-givens/article?mid=3976)！office呢度只係佢既一小部份咋！

跌了幾粒出黎包Ｍ＆Ｍ我覺得好似呀！

大概十二點多，Yammy同Prof. Cheung就出發去機場啦！去機場做咩？帶十六個學生出發去大阪做交流團囉，咪就係我呢排花左唔少時間安排既交流團囉！Yammy好型呀，第一日report duty就出trip了！

今日下午要去威爾斯做鼻咽檢查，橫掂都係第一城個頭，所以去探埋諾諾豬，幾個月冇見佢啦，佢大個左好多，個樣好似唔同左咁呢！諾諾豬宜家笑同唔笑個樣真係好大分別，笑時對眼會唔見左得返條線；最攪等係佢笑時，ｄ笑聲好似喊聲呢！哈哈！

箭豬頭加六隻牙仔！

Ｒ頭加點蟲蟲！

真係喊啦～～

拍低左佢既笑聲係幾咁攪笑：

爬＋用腳自轉，自轉勁攪笑，撐下撐下咁，曾經見到佢360度自轉一圈架，可惜拍唔切！

至於鼻咽檢查，都攪左成兩個幾鐘；入到間房，唔似平時睇腳醫生間房，呢度有晒儀器同好大張椅係中間，誇過睇牙咁，攪到我好驚呀！我睇個醫生叫Prof. Van Hasselt，係西人黎既，係中大耳鼻咽喉科系主任黎架！佢識聽ｄ中文，叫我"吳洗惊"，幾攪笑！

其實做呢次檢查係因為五月時係訓覺時流過好多鼻血，加上上個月睇睇下戲又無端端流鼻血，中大醫生就寫紙我去威記檢查。

先做少少麻醉，醫生放左兩舊浸左麻醉藥既棉花入我個鼻窿度，跟住就開始檢查，塞入去個支野都唔粗既，係有個位要入到好入，就會痛囉；檢查完醫生話我並無cancer，鼻咽好乾淨，但右邊鼻窿血管腫左，建議我做左個minor operation，用ｄ野係鼻入面"勒"條血管，等佢收縮返．．．

做呢個時，痛呀！"勒"一下痛一下，究竟有冇麻醉架？我隻右眼一"勒"就標眼水，手上的紙巾最終唔係用黎抹鼻水，而係抹眼淚呀！

醫生話做完後會流鼻水，亦會帶ｄ灰色野，黎緊呢十日亦有機會流鼻血，但係正常的；埋單二千大元，好在有得claim咋，四個禮拜後要返去覆診！

做完後感覺好唔舒服，個鼻好似撞腫左個種拿下拿下咁痛，鼻窿入面長期濕濕地，間歇性亦會突然一行鼻水咁流鼻血咁流出黎，抹唔切就流到落個口度，好似低能兒童咁．．．跟住仲開始鼻塞，講野把聲唔同左，elsa打黎仲問我做咩喊呢．．．哈哈！不過真係好唔舒服！