今個星期六節目非常豐富，行程相當緊密，schedule排得滿滿的，一於要玩足十二小時！
第一站，跟同事們慶祝Elsa生日食飯，由於Elsa想拎張仙踪林VIP咭，但自己好難食到百二蚊，佢就揀左去仙踪林慶祝；我地係始創分店食，咁多人食，實食夠啦；最後我地食左接近三百蚊，可以申請兩張VIP咭添呢，所以宜家我都有一張啦！
匈牙利牛肉米飯：
芝士吞拿魚意粉：
魚香豬柳意粉：
黑椒牛仔腸意粉：
吉列豬扒烏冬：
魚腐紫菜湯麵：
Elsa揹住個袋就係今年我地送比佢既生日禮物喇，係佢自己揀既，咁仲好啦，送禮個個又唔洗煩，收禮個個又開心，一舉幾得！
第二站係馬仔簽名會，其實我咁大個女去簽名會都幾怪架，但因為我地今日約左一齊係海運睇３Ｄ地心探險記，中間的時間咪可順道去埋係尖沙咀舉行既馬仔簽名會囉；最重要係，有Elsa同Yammy陪我一齊去麻，咁就冇有怕啦！
馬仔簽名會係尖沙咀新開的天地圖書舉行，小馬網頁一早講好係下午三至五點，仲話唔會派籌，先到先簽，所以我好大安旨意，諗住五點前去到就實有得簽，點知一去到樓下見到．．．"時間籌已派完，敬請見諒！"？？
上到去睇，好多人呀！職員話由於太多人，所以都係派左籌，已經派晒，淨係簽有籌個ｄ都會簽到八九點了，下．．．．
咁都冇辦法啦，我都冇太唔開心既，又唔係華仔，哈哈～～咁咪周圍影下相留念囉，仲見到小馬結婚個紙牌公仔，小馬亦另外為呢個簽名會整左好幾張poster呢！
我都忍唔住要入鏡影幾張，等個心舒服ｄ麻．．．嘻嘻～～今日黎到的每位朋友，都會獲贈扇一把，我地每人一把；而上個月係書展買唔到個書盒，今日我都補買返，點知買野又送多把扇喎，所以我有好多把扇呢，哈哈！
影完相，梗係入去睇下小馬真人look啦；其實咁大個女，真係第一次黎呢ｄ簽名會；小馬都屬靚女之人，又高又瘦，覺得佢真係好叻女呀！
我仲拍低左佢畫公仔過程，好快手呢！
我影得好投入之時，Elsa竟然諗到．．．佢叫我拎本書出黎，試下叫排緊隊既人幫手！嘩，咁都諗到，勁！但我覺得．．．呢個冇錯，係一個好方法，不過好似唔係太好喎．．．但佢話一場黎到，冇得簽好唔順氣呢！竟然係佢唔順氣．．．哈哈！
佢先走去問一對情侶，點知條女麻鬼煩，一ｄ主見都冇，指住叫問佢男朋友喎，點知個男仔蠻臭串，望黎望去，又話唔係咁公平咁喎．．．咁Elsa咪再去後ｄ問一對女仔，點知即刻攪掂，全程唔洗一分鐘！
登、登、登、登．．．得左！真係好開心呀！好感謝Elsa咁有吉士！雖然冇得同小馬合照有ｄｄ遺憾，但有個本身應該係冇的簽名，仲畫埋公仔喎，已經係一個好大的意外收穫，好滿足好滿足了！
有個靚靚書盒裝住我三本小馬漫畫啦！Yeah~ Yeah~~ Yeah~~~
另外，今日Elsa又送我禮物了；係一本小型chip & dale 2009 schedule book，佢知我懶，唔會袋住厚厚的schedule book每天走，但無記性的我又成日唔記得part-time既更，佢就買左本薄薄既比我，袋係袋又唔太重，又可以即時check到更表，真係好細心！最感動係又寫左心意紙仔比我．．．佢見我近排辛苦，仲送了個自家湯比我呢！好衰架，成日整到人咁感動，好想喊呀．．．
沒有留言:
張貼留言