2008-02-17 (Sun) 雙方父母首次見面 & "魔幻奇緣"

今日係我同太陽哥哥的爸爸媽媽首次正式見面，對我地黎講都算重要兼特別架！其實第一次係太陽媽媽新年時某日突然問我，想約媽咪聽日飲茶；但由於咁急，媽咪約左人，所以推左；點知今個禮拜，又問喎，睇黎佢好心急呢！哈哈！再約都唔會推啦，所以就正式見面啦！

我地叫左好多點心，呢度只係1st round黎咋！兩張相質素係咪分別好大呢？因為上面個張係琪琪影，下面個張係太陽媽媽影，哈哈！不過以大人楂機黎講，算合格架啦！

今日有段小插曲，我地約好十二點，但媽咪竟然遲左成二十分鐘．．．佢平時好準時亦有分串，真係好尷尬！後來問返，原來佢十點八就出門口，去左青衣城，諗住去italian tomato買罐餅加已準備好的朱古力送比太陽爸媽，點知去到青衣城未開；十一點，即刻過element，諗住咁大咁新的high class商場實有，個度再去佐敦亦近；點知．．．連個大型超市都冇；去萬寧，諗住夏威夷果仁都殺，點知．．．間萬寧無糖果部，真係黑仔．．．十一點四十五分，諗住渣渣林閃，行過去，點知．．．細妹聽到要行過去就黑面．．．咪搵出口落去再搵車站，兜左好耐，陌生地方亦行左好多冤枉路．．．搵到車站又勁多人．．．最後餅乾買唔到，反而遲了到，朱古力亦怕得一樣唔得體而冇送到．．．呢個奇遇真係攪笑，又怪唔得晒佢既！

甜品食左燕窩燉蛋，非常好味！

之後我地去左睇"魔幻奇緣"，呢套戲情人節就上畫架啦，可惜當日買唔到飛睇左"L"；呢套戲充滿童話浪漫感覺，個個女仔實會睇到好陶醉好鍾意姐！橋段亦非常超級爆笑，好多幕都好深刻：女主角對住個大廣告牌敲門諗住返屋企、白鴿老鼠一齊執屋、剪窗簾布造裙著、公園唱歌跳舞、同男主角個女用附屬咭shopping．．．

記得睇完時心情輕鬆，不期然係咪諗返套期，感覺有如去完迪士尼玩一樣，每次都真係走左入童話世界咁，唔想完結唔想離開，因為．．．現實係殘酷架麻，邊有咁浪漫呢？但真係好好睇，未睇既朋友快快去睇啦！