2008-02-03 (Sun) 健master畢業相

 

健人生大件真係一浪接一浪，十二月結婚後honeymood返黎就約我地影畢業相，今次係master畢業，真係可喜可賀喇！尋日仲落緊大雨，大家諗住今日都好大機會要cancel，點知一早比休嘈醒，原來雨過天晴，陽光普照，健仲話因為同"上面"傾掂數麻！哈哈！

中大對其他人可能好陌生，今日就當帶大家中大一日遊啦！第一站，係本部既烽火台，後面白色個幅就係大學main library，簡稱"u 拉"！

烽火台旁邊的小花園水池，行程只係剛展開，我地就已蓄勢待發咁．．．跳呀！睇下太陽哥哥，成隻馬騮咁係後面左跳右跳！

周街小便．．．比張發票您架！

浪漫的相片好像被健的甫士破壞了．．．哈哈！

烽火台另一邊的小型迷宮！

lady shaw building，呢度我十年都唔會踏足一次．．．原來有個幾日式feel既亭，太陽哥哥似乎真係馬騮上身呀！哈哈！

lady shaw building的天台草地，嘩，好靚！我第一次黎咋！景色真係幾好，影到水霸之餘（中間一條柱的物體，係中大其一出名建築物），亦影到飯煲底的中大logo！alex & karen呢個時候黎到，仲帶埋佢地隻畢業snoopy公仔，趕得切影大合照！yeah~~

一場黎到，影完團體照通常都會再同太陽哥哥影雙人照，成日拎住對mickey，好似影緊結婚相呢！好攰．．．好曬．．．

呢張相真係要比十個得佢！！！我好鐘意！！！其實太陽剛剛射過黎，我本身係諗住影我同太陽哥哥個人影only，點知我影左一次效果唔係幾掂；太陽哥哥就隨手舉起相機一影，嘩，掂呀！係影到前面晴泳小姐扣左少少分啦；但本身諗住只影人影唔包真人，但無意攝埋我地入鏡，而咁岩個角度人同影又冇重疊喎，level岩岩好，效果真係出奇地好呀，呢一take真係好成功！

呢個就係飯煲底啦，好出名架，好多出街既中大刊物都用呢個景架，係中大一大象徵黎架！

呢條路就係"百萬大道"啦，係連接住飯煲底同烽火台的一條路，每年的中大畢業禮就係係度搭booth舉行，可以坐到好多人架！

開始明白點解太陽哥哥次次跳都型過我啦，因為男仔短頭髮，跳時同靜態時無咩分別，但我一跳起頭髮就好似成個傻婆咁囉！

聯合書院~~ 健的master大本營，換下snoopy公仔影先！

呢度係新亞書院一個熱門影相點，名叫"天人合一"，因為角度好以海同天連埋一齊咁，加埋倒影，幾靚架！連環快拍咩甫士都出齊，最攪笑係扮自由式游水，仲有扮影婚紗相潑水！

新亞書院~~ 專攻牌匾，睇相就知去左邊度影啦！

換下畢業熊影返張先！

崇基書院，名為小橋流水的地方！

有張肉麻照，後面有我地，呢張相頓時變得浪漫中帶盞鬼呢！

健話唔洗去外國都有楓葉呀，又真係幾靚喎！

紅當當的獅子亭，就當恭喜健master畢業啦！

見距離晚飯時間尚早，我地就出埋中大正門影個大牌匾！唔．．．咁先似係中大影畢業相架麻！

健話咁影似唔似係香港大學畢業生喎．．．吓．．．哈哈！

名為"四條柱"的中大入口！

 

影完相後，我地去左大圍食潮州打冷，亦即太陽哥哥樓下我好鐘意食蠔仔粥的地方，每人點一味餸共九味，呢餐好好食，大家都大吃一頓呢，消費只係每人八十五蚊！平時頂多同太陽哥哥屋企人四五個黎食，今日咁多人，可以試到ｄ平時未試過既菜呢！

身為健的朋友，今日好開心能見證佢的master畢業，同佢雖然唔係咩傾心事的深交，但其實一路以來，佢有咩都預埋我，當然我都會比面出度啦，能夠成為佢身邊一位有咩都希望我能見證住的朋友，其實已經好足夠了！正如佢今日的一句說話："嘩，givens真係見證住我既成長！"，呢句說話，佢可能只係隨隨帶過，但我好深刻，我中五時識佢一齊玩義工，佢就中七，原來都識左十二年了！的確，如佢所說，我見證住佢成長，佢科大時畢業我地係city影畢業相、跟住佢師範畢業係ied影畢業相、到佢結婚我仲成家人去撐場以表支持(成家人係指我同太陽哥哥同細妺姐, hehe)、到今日佢master畢業．．．寫到呢到都有ｄ感觸＋感動添！

人生又幾多個十二年呢？能夠跟一班好朋友，咁多年黎都keep住咁深厚既友誼，又有幾多位呢？朋友，真係一樣好奇妙既關係！我想借呢個機會，多謝我身邊每一位一路以黎咁支持我、痛錫我、對我不離不放棄的好朋友！亦要多謝您地，肯接受我呢個又長氣、又成日三心兩意、又唔得果斷、又多野諗、又固執的麻煩朋友；一直以黎，多得您地的包容與體諒呀！

I LOVE YOU ALL！