2012-05-19 (Sat) 太陽哥哥生日飯@八王子

呢個weekend太陽哥哥生日休息兩天, 全天候停工; 佢呢幾個月黎正職都做到晚晚十點十一點幾, 加埋工作七天, 今朝我都由佢訓唔嘈醒佢啦, 佢一訓訓到十二點幾呀! 原本諗住去灣仔行藝術展, 去到青衣城時, victor需要太陽哥哥幫手還返架的士去荃灣, 約左四點半香港機鐵站等; 時間唔容許去藝術展添, 我地就去左中環行街, 跟住係香港站攞車, 楂去荃灣交車, 再搭返地鐵出尖沙咀食飯, 訂左六點鐘八王子!

太陽哥哥第一次黎, 覺得呢度好特別, 裝修又有特色, d 野又好食, 話好味過尋個餐呢, so good!

之後我地行下街咁, 代細妹買左兩件tee送比太陽哥哥做生日禮物!

買杯星巴克飲, 我就買左澳洲牛奶公司熱燉奶外賣, 就咁過左跟太陽哥哥最後一次二人世界的生日!  我話有d平淡, 原本我地呢幾日可以去旅行, 宜家應該身在布吉架麻, 但因為太陽哥哥公司太忙請唔到假..........不過太陽哥哥話, 佢生日其實唔需要大搖大擺, 簡簡單單開開心心咁同我過已經足夠, 咁今日我地都好開心既, 只係我覺得唔夠特別啫, 嘻嘻! ^^

返到屋企太陽哥哥仲堅持搬晒d箱出黎抹床下底, 佢話難得佢放假先可以有時間做, 但我覺得生日要佢咁, 真係唔好意思喎........佢絕對係一個好好老公呢! ^^

2012-05-18 (Fri) 太陽哥哥生日前夕飯@盛八．神秘嘉賓送蛋糕

太陽哥哥明天生日, 今晚得登同公司申請左permit, 要早d放工; 幾個月黎真係第一晚八點前走到; 之前佢話想食盛八燒肉, 我就話生日飯咁普通, 建議去佢未去過的八王子; 正當佢未決定到揀邊間時, 又早到收工, 即刻扑鎚今晚旺角盛八, 明晚尖沙咀八王子!

我放工後去左沙田COVA拎蛋糕返屋企先, 跟住再出旺角同佢食飯; 期間約定休今晚十二點上黎, 比個驚喜太陽哥哥, 因為得休一位朋友住得近, 加上佢實唔會托手踭, 哈哈!

晚飯後返到屋企十一點幾, 太陽哥哥剛去左沖涼, 休就到左, 一路叫佢匿埋係睡房入面 , 咁上下我地夾好, 先係我入書房搵太陽哥哥閒聊, 跟住休ready就捧蛋糕入黎, 仲唱住生日歌; 太陽哥哥都嚇一嚇, 無拿拿有把男人聲傳入黎, 哈哈!

2012-05-16 (Wed) 表姐家

原本一早約好表姐今日去迪迪尼, 點知兩個小朋友尋晚開始發燒, 今朝連學都返唔到; 最後我去左表姐家hea, 大家一齊玩下訓下食埋lunch, 到兩點幾時突然樓上好大聲鑽窿, 嚇到兩個小朋友都彈起, 我地仲好似避難咁出左露台度坐; 叫姐姐落看更度睇, 先知樓上今日開始裝修兩個幾月!  咁嘈好難頂, 我地就去左沙田 IKEA 行街, 行完我仲去左COVA訂蛋糕比黎緊生日的太陽哥哥!

 

2012-05-13 (Sun) 再戰 Baby Gap

旺角分店開左啦，係九龍城食完飯後，出旺角再戰 Baby Gap！點知呢度大過中環好多呀，ｄ款仲多好多好多，總之就又多又靚，件件都想要！

 

最後同太陽哥哥一人揀一件，好公平，哈哈！因為始終唔知小丁丁係肥定瘦，加上呢ｄ係夏天款，要佢出年先著到，都係適可而止好ｄ，一陣唔岩身就晒啦！

我仲有呢件都好鍾意，但有丁丁size，留左電話等呢幾日返貨睇下有冇機！

還欠敏契仔生日禮物，揀左呢件型仔裇衫仔比佢，禮物盒都好靚呢！