2011-03-28 (Mon) 素黑新書．相贈好友

素黑出左新書，係我第一次買她的作品，源於好友極力推介；亦因為咁，買了兩本，其中一本相贈超愛素黑的好友！

2011-03-27 (Sun) Cooking@Home：腐竹白果薏米糖水．峰壽司．單身男女優先場

前晚跟太陽媽媽學左整糖水，今日日頭係屋企即刻試整，咁太陽哥哥今晚返黎咪有得試囉！

今晚我地睇戲前食飯，食一直都未試過的峰壽司！

好大隻杯！

呢度ｄ壽司價錢唔太貴，唔怪之成日排長龍，不過份量較為細件；加上熱食選擇好少，有牛舌壽司，但又冇燒牛舌食喎；太陽哥哥話鍾意北海道活壽司多ｄ！

食完飯去左睇單身男女～～

套戲比預期中好睇，真係好好睇，去到中段超多笑料，仲要係全場都笑到好大聲個隻！戲入面ｄ冧招，相信每位女仔都恨爆，因為我自己都睇到好冧同好感動！但現實入面，又點會同一時間有兩位咁超班馬級的筍盤爭一個女仔呢？呢ｄ咁誇既冧招，亦相信係戲入面先能咁天馬行空；又老實講，追緊您時咩橋都一定有！其實我係個女仔，都會揀一個令自己有安全感＋比到百份百信心的男人，只怪另一位之前的記錄太差，好難忘記歷史一齊就一齊，話咁易咩．．．但論深情，其實兩位都不相伯仲既！

 

返到屋企食糖水，但我比自己唔合格，因為窿左少少呀！雖唔係勁窿，但飲落有少少窿味，不過太陽哥哥話好少咋，話已經好好味同我第一次煮已經好叻，我好多謝佢咁講，仲好多謝佢飲晒一大碗黎支持我，我好開心有位咁既老公，不過我覺得自己好無用囉．．．因為我知呢款糖水係好易整架，同埋我覺得似豆漿味多ｄ呀！點解我會煲到似豆漿味既？

2011-03-26 (Sat) 打邊爐＋會玲玲@曾家

幾個月冇見玲玲啦，連利是都未比佢，Gigi 早排先同我講，玲玲有日同佢講：媽咪，好耐冇同林太(我)同叔叔(太陽哥哥)食飯啦！ 所以今晚去左曾家屋企打邊爐，仲同玲玲玩左好癲的一晚，超開心！

一黎到，玲玲就拎玩具叫我地同佢玩！

太陽哥哥同親邊個小朋友玩都好鍾意飛起人，但玲玲一ｄ都唔驚，玩完仲話再黎過丫，真係大膽呀！

玲玲係書包拎佢ｄ功課比叔叔(太陽哥哥)睇：

同林太＋叔叔影相，玲玲好多攪鬼表情架，氹到人好鬼開心！

食完飯，媽媽批准拆禮物；知道玲玲宜家中晒迪迪尼毒，我地係 treddyland 買左張米奇被比玲玲！

派利是時間～～玲玲叫左太陽哥哥做林太，應該同我講"多謝林太"又講左"早晨林太"，真係笑死人！

跟住同玲玲玩，其中一樣就係推住呢架ＢＢ車，上面戴住 "曾Ｂ仔"，係度坐黎坐去，其實我地係玩搭車去迪迪尼呀，坐下又轉車，坐下又轉車，玩坐車坐左好耐好耐好耐呢．．．．哈哈！

跟住我暗中播八達通電話鈴聲的嘟一聲，玲玲超新奇，之後就拎住我張八達通周圍嘟，玩得好過癮，我地仲整古佢話無錢要去增值添，淨係咁玩都玩左十幾廿分鐘！

可能開始大個女，玲玲熱衷於幫人，係咁要求幫我地影相喎，呢ｄ相全部都係佢影架！

臨走時再同玲玲影下相，咁就過左一個好開心的星期六喇！