2008-09-27 (Sat) 第廿六次捐血 & 2008/09 定期捐血章

今日係第廿六次捐血啦，仲拎埋2008/09定期捐血章；計埋今年呢個，一共拎左八年定期捐血章啦，覺得自己好叻呀！

因為好多人，冇得同太陽哥哥一齊坐，只能坐係對面；我唯有遠距離同佢影相啦，點知佢表揚多多，狂擺甫士，我真係冇佢咁勇喇！

仲等緊入針之際，我隔離個位都捐完，姑娘好好咁叫太陽哥哥坐過黎！坐咁近，可以調換相機影啦！

之後又去左食譚仔記，旺角呢間真係長期都咁旺，已經夜晚九點都仲要等，仲開埋樓上添，可惜冇緣被編排坐樓上啦！

   

2008-09-26 (Fri) 熱切推介：保持通話!!

 

熱切推介：保持通話

內容﹕改編自荷里活電影《駁命來電》(Cellular)，講述單親媽媽Grace（徐熙媛飾演）這天如常送女兒如婷上學，途中卻被悍匪以霍（劉燁飾演）駕車欄腰猛撞，在她半昏半醒、全身無力的狀態下，目睹以霍在她屋內大肆搜索，更以凶殘手法殺害其女傭！然後把Grace擄走並鎖到一個貨櫃內。以霍逼使Grace交出他的犯罪證據，否則把她全家幹掉。驚惶失措的Grace襯無人看守時竭力地把一台損毀的手機重組，奇蹟地打出一個求救電話，意外撥通給任職財務公司貸款部職員的阿邦（古天樂飾演）。

阿邦的兒子要出國升學，這刻他姐姐Jeanie（陳慧珊飾演）與兒子已在機場等他，正十萬火急地趕往機場。對於Grace的求救電話感到半信半疑，隨手把電話交給交通巡警輝Sir（張家輝飾演），可惜此時線路出現問題，輝Sir未聽清Grace的說話，更驚告阿邦別再戲弄警察。此時以霍突然闖進貨櫃箱內，幸好Grace能把手機及時藏好，阿邦再接過電話便清楚聽到一下槍聲，知道事態嚴重，決定拯救Grace！但當務之急，是要阻止悍匪傷害下一個目標 — Grace的女兒，阿邦必需阻止其女兒落入綁匪的魔掌之中，前面將有驚險萬分的事情發生，他隨時要為了救人而付上寶貴生命．．．

數年前已睇過《駁命來電》(Cellular)，卡士唔算勁，但好深刻，因為劇情非常緊張刺激，好多位我仲記得好清楚；所以當知道《保持通話》係改編自《駁命來電》時，我已好期待！

主要演員：金碧辛嘉 Kim Basinger
基斯伊雲斯 Chris Evans
積遜史迪咸 Jason Statham

通常越期待，結果總會比預期差ｄ，但呢套戲完全冇比我失望的感覺，所以我熱切推介比大家一定要去睇呀！成套戲一開始就好緊張，劇情亦好緊湊，睇到我手心長期出汗，絕無悶場！有一幕仲忍唔住覺得古仔好型，好自然咁拍左兩下手叫：勁呀！．．．之後仲比太陽哥哥笑完一次又一次！

大家亦可先上官方網站看看，個度都有好多地方好刺激，好似成套睇的製作特輯、好多幅人手畫既story board、多個危機動作畫面．．．絕對吸引您入場睇架！老實講，我覺得呢套戲入面既飛車鏡頭、打鬥動作等，仲勁過成龍大哥ｄ片呀！

官方網站：http://connected.emp.hk/index.html

2008-09-25 (Thu) 味千拉麵

青衣城大改造，多左好多勁舖，好似板前、馬莎、mos burger．．．新開既味千拉麵當然都要去捧下場啦！

新出既"忌廉溝鮮奶"(真係用呢個名架!!)好特別！

三粒辣椒既九州拉麵，我都係貪佢辣先叫咋，唔錯！鰻魚炒飯我就冇興趣喇，因為我唔食魚架麻！

由於新開左幾日，可能好多野未運作得好，我覺得今日既服務好差呀！尤其是有個好ｘ形既男侍應，我完全覺得佢絕對可以炒得！佢只係好優閒咁行行止止，撥弄頭髮．．．其他職員都忙到甩碌！揚手叫佢佢又唔應又扮睇唔到咁，激死人！其次，環境又好嘈，ｄ職員係門口大叫幾號幾號，我覺得超級煩擾！唔知遲ｄ係咪會有咪或者籌號燈箱呢？唔係咁叫法，ｄ客點食得安心呢？

2008-09-24 (Wed) Dinner @ 清亭燕萍 & 2008 Xmas Card

今日要返part-time training一個鐘，去到銅鑼灣咁遠先計返一個鐘人工咋，所以唔想晒左黎到銅鑼灣既機會，就約左太陽哥哥放工黎食野；我地去左清亭燕萍食越南野，叫左我最鐘意食的雞翼(照高卡路里!!)，同埋上次食過返尋味既椰青焗海鮮飯！

太陽哥哥己完成了今年的聖誕咭啦，我當然係第一位先睹既人啦！睇住佢由鉛筆稿一步一步咁做，終於大功告成，我當然都好開心啦，因為又係有我份架，仲有我個樣呢！

由於今日都見到elsa，我就將呢個好消息講左佢知，本身elsa都會收到聖誕咭既，但咁好姊妹，我當然會比佢自己選擇啦，我問佢：您想到時先睇留返個神秘感？定係宜家睇呢？如果宜家睇，就會成為呢個世界第二個人睇呢張2008年聖誕咭既人喇！佢聽完哈哈大笑，話成為第二個，咁就一定要睇啦，做唔到第一個，做第二個都好麻！我聽到佢咁講又哈哈大笑一番！最後，由我做證，elsa就係呢個世界第二個人睇今年張聖誕咭既人喇！哈哈！

不過，我要打格仔先，留返個神秘感比大家麻！唔好意思呀，要吊住您地癮！不過放心啦，我寫開的朋友一定會繼續收到，為左您地，我會繼續keep住呢個一年一次寫聖誕咭既重大任務架！

至於未收過的朋友，想要都可同我講聲架！