丁媽媽

2008年6月29日星期日

2008-06-29 (Sun) Dinner@清亭燕萍越南餐廳 & 功夫熊貓

今晚約左太陽哥哥朋友呀仔同 Hazel 食飯睇戲，佢地由將軍澳搬左去對面海，所以我地見面的地點係．．．銅鑼灣！又係銅鑼灣．．．我由星期二去到今日，去左六日銅鑼灣了！而黎緊呢個禮拜，我都要返四日part-time，聽日又要黎．．．銅鑼灣就快變成我屋企了，哈哈！

我地去左清亭燕萍食越南野，我好抗拒個番茄牛柳粒飯，示意太陽哥哥唔好再叫（因為次次同佢黎佢都食呢味，我食過好多次了，怕~~），點知呀仔同 Hazel 竟然揀左．．．避唔過添，唉．．．好在今次有四個人，可以叫多ｄ，我就揀左個新菜式試，椰青海鮮焗飯($65)，我覺得好好味呀，下次會再叫呢；不過貴左少少，個椰青入面好少空間，份量變相太少，好似食兩啖就冇晒咁！馬拉盞炒芥蘭亦係好味菜式呢！

呀仔非常合作，擺晒甫士滿足我的影相要求，佢應該都係玩得之人，好有潛在爆炸力，哈哈！

功夫熊貓我冇諗過會睇架，隻熊貓又肥又醜怪，點知太陽哥哥想睇，呀仔亦買左飛，咪跟大隊囉；點知原來好好笑，有幾個位我笑到都幾大聲，仲比太陽哥哥發現左呢，醜死！其次係ｄ背景畫得好靚好detailed，最深印象係一開場的廚房同麵檔，真係嘆為觀止！成場戲除左聽到好多小朋友"格格格格"的笑聲外，仲有大人的大笑聲同拍掌聲，的確係一套老少咸宜的卡通電影，大家快ｄ去睇啦！

2008年6月28日星期六

2008-06-28 (Sat) 南記粉麵 & 殺神特工

今個星期係一個好忙碌的星期，由星期二至五放工後都有返part-time，今日星期六都要由九點返到四點，踩足五天；而下星期亦唔弱，要返一三四五四天，唔係個七一公眾假，可能返足五天呢！不過雖然忙，但都應付到，亦開始愛上這份part-time，可以講係身攰但心不攰啦，應該休息多ｄ就冇問題的；可能有新鮮感啦，有時我覺得part-time仲好玩過full-time份工添，又幫人報下名，而我最鐘意就係收錢，可能細個曾經諗過第時要做收銀員啦！嘻嘻~~

星期六返part-time好少機會返早更，因為有full-time同事返麻，今日可以返早係因為佢地都放假，我先有機會返咋；呢個鐘數亦係我最鐘意返架，因為同太陽哥哥楂車的時間太夾，我收工時佢都差唔多，之後去街拍拖係非常方便，真係fit到爆！如果唔係，平時返星期六多數係返pm shift，由下午二點至晚上九點半close，成個saturday就咁就冇左，好sad架！

今朝怕遲到早左出門口，八點半就到銅鑼灣啦，嘆左個好少食到的麥記早餐，就踩到四點放工，等埋太陽哥哥收工，我地就去左南記醫肚；南記係返part-time後elsa介紹我食既，食過一次就愛上，可能本身我鐘意食米線啦；而最重要係，呢度的春卷一ｄ魚味都冇架，仲勁好食添！

呢幾天天氣真係極差，成日落雨，仲要係勁大個隻，本想行陣銅鑼灣都放棄了，因為實在太大雨；跟住我地返旺角，太陽哥哥尋晚已買定今晚七點幾殺神特工既飛！

呢套戲實在太誇張，車都可以好似人咁，打個"關斗"跌落地跟住繼續行；子彈仲可以曲線咁行，實在impossible！其實我都係想睇安祖蓮娜，因為佢真係好fit同索左好多！不過如果您追求觀能刺激，都可以去睇呢套戲，有ｄ位同有ｄ甫士，又確實真係幾型既！

睇完戲後，我地去左泰妃雞食左碟海南雞飯，跟住就返屋企了；返到去先十點半，媽咪仲問我做咩咁早添；冇辦法啦，太陽哥哥星期日都要楂車，早ｄ訓先有精神，加上我都攰，亦冇咩地方想行；自從返part-time後，不得不承認同太陽哥哥的生活變得較為平淡，因為大家都冇咩時間，亦要多ｄ時間去休息，不過so far都可以接受既，大家都想搵多ｄ錢，暫時黎講，我都覺得值得既！