今日又上深圳同爸爸食飯，今餐佢好豪咁，係大陸咁"是正"都算係咁啦！特備節目梗係放煙花，今次仲偷影咗個煙花竇比大家睇下，最衰個賣家唔肯上鏡，哈哈！
太陽哥哥的煙花招式，似足成龍大哥！不過原來將ｄ煙花耍太極咁耍，係咁靚既！
我同細妹有樣學樣，但係騰雞版，因為驚ｄ煙花彈到我地對玉手呀！
最後的一個大煙花，今次比上次那個更靚，拍得住尖咀大型煙火的效果，係小型版姐！
見到上次好得意的小朋友，佢好乖，唔會好似其他細路咁意圖想偷我地ｄ煙花，只會乖乖地咁睇同拍手，好純，所以我地會醒佢幾支比佢玩！今次仲見到佢的爸爸，細妹影了一張好騎呢的父子照呢！
今朝又買唔切麵包，又send左 SMS比 Yammy叫佢幫我買，但佢無覆，我又唔想咁早煩人，諗住有就有，冇都唔緊要啦！返到工後，佢一入office，我就抱住期待的眼神望住佢由門口行入黎，佢經過我個位，有野拎出黎比我喎，不過佢竟然比左．．．一盒朱古力奶我，咁頂癮？哈哈！好明顯，佢真係睇唔到我SMS！我特登唔比反應佢，隔左陣，佢就話哎呀，宜家先睇到我個訊息，但佢咁岩有多個包喎！佢買定今晚briefing頂肚餓架！但最最最邪就係，佢多左個個包，exactly係．．．我係訊息打比佢叫佢幫我買個個．．．吞拿魚蟹柳包！！！十萬個驚喜，十萬個開心，十萬個夾呀！！！
今日一回到公司，枱面有份好大好靚的禮物！是Conney送的Chip n Dale衣架，真係有心，我好鐘意呀！
爸爸幫我寫的一封泰文信，係我諗住寄比兩年前係布吉識的朋友，做得朋友，一年點都應聯絡一兩次吧！希望快ｄ收到佢回信啦！
最喜歡的二月快完了，千萬個唔捨得，有我的生日啦，溫馨的情人節啦，熱鬧的新年啦，節目停不完的近十天的假期啦．．．下個二月，要等一年了，有排等呀！
最後的一日假期，陪媽咪入貨，拎到我地．．．傻晒！
不過今日係開心的家庭日，見媽咪煮咁多味餸就知，仲好有興致整杏仁糊湯圓我地食，真係食到超飽呀！
今日太陽哥哥碌齡碌到好高分的分數，仲係兩舖都不錯，真係叻仔！其實我都想佢碌得開心ｄ，尋求到當中既樂趣，咁就唔會成日陪我陪到發牛豆啦！
今日還將一大袋毛公仔送去太陽哥哥既迷你倉度，閘門個刻，都有ｄ唔捨得，因擺低咗就唔會成日見到架啦，但仲好過扔左去，入面每一隻都有一些令人懷念既回憶架！又唔記得影相，激死我啦！
今日去左深圳爸爸屋企，我由生日到宜家都未見過佢，比佢串左我幾鑊，問我乜我仲記得有佢呢個DADDY咩？爸爸知我地想玩煙花，買左好多，呢度先二百蚊咋，好抵玩！這亦是我地上去的目的！
最後個煙火好大個，四十蚊架，我地留到最尾先放，係全晚既高潮！真係好靚同放得好耐！
好多年都未試過咁盡情咁放咁耐煙花，恨左十幾年都有，宜家爸爸係大陸住，只要我地想，相信每年都可以玩！
