麥生係中大做左接近四十年，上星期五正式榮休，不過因為佢太重要，office繼續以PT形式聘任佢，所以佢仍然會繼續同我地一齊做野；雖然係咁，但我地都覺得應該同佢食返餐 farewell 一下，就訂左 Royal Park 的 2+2 Cafe 食 buffet lunch！
office有成十六個人，又要搭火車，時間有限，我地分兩批出動；我梗係第一批啦，坐低先同麥生影下相先！
呢度食野一般架咋，但最近我地又最似樣，冇得揀．．．魚生全魚類，冇我份！
海鮮只得青口同蝦．．．
我食左唔係好多，因為冇咩選擇，青口同燒牛肉最好味！
我地十六個人坐四張四人檯，霸晒成排窗口位！
第一次見藍色Macaroom，有同事食完變左阿凡達，佢仲唔介意扮比我地睇！
大合照：
媽咪去旅行九天，冇晚飯食唔係大問題，冇飯帶先係最慘．．．所以今日試下煮飯食，咁就可以帶飯啦！
煮勁野就冇我份架啦，都係煮返媽咪教過下我既菜式，簡單個ｄ比如黑椒洋蔥牛柳、蕃茄蛋咁；油鹽水煮蜆係太陽哥哥點既，其實都煮過，我反而想試下其他煮法，比如用豉椒炒，但佢話唔鍾意喎，唯有繼續油鹽水煮啦，我今次貪玩試下加埋豆腐！
假日煮飯幾好，多ｄ時間比我預備，我四點幾就去買餸．．．
跟住調味同切好晒食材備用．．．六點仲黎個Aerobics dance，跳到一半太陽哥哥仲返到黎添，即刻叫佢沖涼＋推佢入書房，等我安心跳埋下半個鍾！
突然收到震撼消息，太陽哥哥話佢叫埋太陽媽媽過黎食飯，我唔介意架呵？仲話宜家係大圍出發啦？！下．．．超淆底呀！臨尾個十分鐘aerobics完全不在狀態．．．淆都要頂硬上架啦，跳完aerobics沖埋涼即刻開始！全個過程都好擔心，都冇時間影煮野過程．．．最後總算順利完成，煮到個三餸飯，食得飽肚！
呢餐飯只係比自己合格，因為難度唔高，味道唔夠媽咪咁好味，繼續努力！
平時好少食橙，因為覺得好大個食唔晒，又懶搣啦，就算人地搣到一"界界"，我都只係會食幾界；上次同太陽哥哥食buffet時，見到人地ｄ橙切到咁我好鍾意，感覺勁 juicy，太陽哥哥宜家就經常學人地咁樣切比我食，因為咁樣我就會不自覺可以食晒成果橙架！
