今日朝早要去房屋處，所以請左一日假，攪掂完返到屋企兩三點到，冇幾耐表姐就突然來電，佢話好悶冇野做呀，想同諾諾出去行下，見我冇online就估我放假，問我係邊．．．就係咁，我地即興又去迪欣湖呀！
黎到五點半，天氣好好，又唔曬，仲有陣陣涼風，好爽呀！每次黎到呢度，見到呢ｄ藍色屋仔，都會覺得好靚同望落令人好舒服，亦會諗起係度影結婚相時的情景呢！
當然又唔少得繼續踢舅婆比既波波啦！
把藍點遮仔係咪好可愛好靚呢？係我買比諾諾架，今朝先係吉之島十蚊店買，抵到爛！我見上次諾諾好鍾意玩我把麥嘜遮，但始終大人遮太高，見諾諾楂得好辛苦，咁岩見到呢ｄ咁可愛既小朋友遮仔，梗係唔放過啦！仲有黃點橙點紅點等等架，咁抵，玩爛左再買過都唔肉赤啦！諗住過兩日會見到諾諾先比佢，點知話咁快我地就見面喇！
天氣實在太令人relaxed啦，我地開始除鞋＋訓草地，仲打開埋把遮仔放係草地上面，諗住影下沙龍咁！哈哈～～
不過諾諾唔係咁鍾意 lay down，可能ｄ草草拮拮佢啦～～佢一趷起身表姐又"禁"低返佢，好攪笑！
諾諾天真可愛笑容連環圖：
咩事咁開心呀？原來係舅婆被大自然既氣息感染左，係草地上失控，係咁將著住既鞋踢高飛上天，跟住又去執返，又再踢上天．．．如是者，諾諾就係咁狂笑啦！哈哈～～
影腳腳～～ (我對腳最醜怪呀, 做完手術的腳趾公, 好明顯係冇咩改善到既!!)
呢張相我影得好滿意呀～～
玩完草地，我地就過遊樂場玩啦；諾諾一路行，一路用把遮仔篤個波，您估玩緊snooker咩！哈哈～～
諾諾睇黎都幾鍾意把遮仔，去到邊都楂住；遮仔高度易楂手，岩岩好，真係買得好呀！
呢張相我覺得好得意呀，諾諾拎住把遮仔，一路篤一路跟住舅婆後面，好以大母雞＆小雞仔咁，哈哈～～
又黎到呢個玩水遊樂場啦，每次開頭諾諾都驚驚地咁，係要我地拖住佢先夠膽玩ｄ水水！
正所謂熟能生巧，黎得來玩得多，諾諾既warm up時間就越來越短，好快就夠膽自己企係度玩ｄ水啦；仲玩到瞇晒眼咁，又要玩，又要驚ｄ水彈到自己～～
用完手又用腳，越玩越放～～
嘩～成隻手插入ｄ水柱度添！勁～～
又瞇眼！哈哈～～
最後咪玩到．．．成面都係水點囉！成個豆皮仔咁，勁爆笑～～
做咩突然縮起膊頭＋收腹呀？可能係ｄ水整濕左件衫，跟住件衫掂到個身咪凍一凍．．．
舅婆您係度做咩呀？玩"捐山窿"呀！
咁好玩，我一向贊成比小朋友接觸新事物既，一於教諾諾玩先！諾諾好攪笑，唔敢自己"捐"過去，我唯有以身犯險，叫諾諾搭住我膊頭一齊"捐"過去，有野比諾諾扶住，佢就唔驚啦！不過我當時就勁驚囉，勁驚ｄ水一熄淋到我呀！不過見最後諾諾都成功"捐"過去，又有咩所謂丫，最緊要諾諾開心麻！諾諾個樣都好攪笑，又要驚，但玩完又覺得好新奇咁喎，笑得咁開心應該覺得好好玩啦～～
件衫濕晒啦，要快ｄ換衫先～～
換左套泰仔look衫：
仲Yeah添～～
換完衫就唔再玩水水啦，玩sir滑梯啦～～
無錯喇，arms up 咁 sir 落黎，先夠離心力，咁先夠刺激架麻，就好似玩海盜船原理一樣！哈哈～～
諾諾玩高sir滑梯連環圖，先係比心機爬上去：
跟住行上斜吊橋：
驚驚地想搵媽媽～～
唔幫佢，鼓勵佢，加油加油～～
得左！叻叻～～
諾諾做咩坐監呀？哈哈～～
好鍾意諾諾間唔中個側頭裝人嗲樣～～
玩搖搖板：
諾諾個樣做咩忽然呆左呀？
原來舅婆繼草地上失控亂跑亂踢鞋上天後，係遊樂場又再次失控呀！不過諾諾今次見狀反而冇狂笑，而係好似嚇親呆呆地咁喎！
我地玩到六點半就走啦，其實我一路玩時，ｄ手手腳就係咁被蚊叮，上車後數下被蚊咬左幾多啖先．．．嘩！成二十粒都有呀！ｄ蚊滋咁細粒都咬到人咁勁架！好痕好痕，救命呀～～
上車後大家都玩得好滿足，以下係我同諾諾既對話，留意呀，小朋友係唔講大話架，即係佢講既全部都係真心話黎架！
恩恩：諾諾, are you happy？
諾諾：Yes!!
恩恩：諾諾, am I beautiful？
諾諾：Yes!!
恩恩：am I pretty？
諾諾：Yes!!
恩恩：am I a princess？
諾諾：Yes!!
恩恩：do you miss me？
諾諾：Yes!!
恩恩：do you love me？
諾諾：Yes!!
諾諾最後仲講 I love you，同埋 I love 恩恩添呀！攪到我勁開心，今晚實訓唔著！哈哈～～
