今日要覆診，體貼的太陽哥哥都請假陪我去，既然係咁，我下晝都請埋假，一齊休息一日，順道提早慶祝我地的22個月紀念日！
屈指一算，做手術已係一年前啦，時間真係過得好快！睇下張 x-ray，醫生話宜家腳趾公彎的度數係廿二／三度，手術前係三十度既，其實手術都算改善左；大家睇下右腳第三節骨的左邊位置，比起隻左腳，見唔見冇左一忽呢？個個位就係手術時磨平左架；而磨平左個位下面，就係切斷的駁骨位，但經過一整年，個切斷位已經見唔到，生返好晒啦！
醫生好努力咁量度緊我的度數！
太陽哥哥幾時變得咁怕醜架？
同太陽哥哥拍拖咁耐都未試過唱lunch k，我同朋友就試得多，但同佢一齊時，weekend多數都陪ｄ媽咪食野，同埋其實都訓到好晏啦，嘻嘻！今日睇完醫生十二點，計落可唱lunch k喎，即刻打比elsa，問下佢邊度最近威爾斯有得唱k；elsa果然係search野王，不消幾分鐘，就幫我查到富豪花園有間neway，仲要係只要show的士receipt，可claim十六蚊！
我地一於搭的士，真係claim到！全靠elsa咁醒，勁呀！可能冇咩人，話唱兩個鐘，最終唱左兩個半鐘，埋單只係$72，物超所值了！
夜晚我地去左Royal Pacific食buffet，用左buffet club的coupon，買一送一；張咭十月到期了，半年黎只用左一張coupon，真係要用快ｄ，唔好晒左去；不過其實之前成功用左泰國酒店的coupon，呢個千五蚊membership已算抵用！我地計劃黎緊兩個月的慶祝活動都會係食buffet，期待+ing！
最緊要睇下有咩食物先啦，海鮮不可少，有長腳蟹同生蠔的buffet，我最喜歡！不過呢度ｄ長腳蟹比起九龍酒店，真係差得遠囉！
甜品簡直係超勁多選擇，有八檯之多！睇到我流晒口水！
趁人仲係少時，影晒相，跟住就開餐啦！
呢碗鮑魚海參湯勁呀，每人一客，由廚房熱騰騰送上！隻鮑魚同海參有匙羹咁大隻架！
buffet好少見到小籠包呢，我聽到就快蒸好就不自覺咁講好野我鍾意食；跟住好難得，個廚師認得我，一見我行緊埋去就開定蓋比我拎啦！唔通靚女易認？哈哈！
睇下我地大致食左ｄ咩：
我地係咁食係咁食，食到好飽呀；甜品只係試左呢幾款．．．不過都係九龍酒店個ｄ好味好多呀！呢度個朱古力tat同朱古力布甸，名就好得意，但前者過甜，後者口感好怪．．．
朱古力tat界開一半後，甜到漏，唔食又好"晒"，我靈機一觸，用叉"刮"起ｄ朱古力漿．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．．登登~~ 係咪好靚呢？太陽哥哥起初話冇可能靠支叉打直咁流ｄ朱古力漿落黎然後寫字；但佢話唔得，我偏就要做到！哈哈！最後，佢知道我成功之餘，仲原來我係寫左佢個名係碟到，梗係冧到佢暈啦，笑到甜絲絲呢！嘻嘻~~
最後佢心有不甘，想學我．．．但佢用牙簽．．．
雖然好努力，但．．．寫得好肉酸呀！
開心的22個月紀念日，影返張合照先！
