2007-04-07/08 廣州長隆+碧桂園兩日一夜遊

計劃左一段日子既長隆之旅，終於係復活節舉行了！老實說，今次參與的人數並不多，但唔理了，都攪左咁耐，要去馬呀！！！

行程第一天

0815　黃崗集合 - 誰知呆等一小時，因為BEN竟然仲訓緊覺！

0930　搭旅遊巴直上廣州 – BEN要自掏腰包買過晒ｄ車飛

1200　午飯

1330　抵達長隆

1930     大馬戲

2300   碧桂園BEN家兼晚飯／宵夜

行程第二天

1200　起身梳洗

1500　上下九步行街飲茶

1800   乘廣深線火車回深圳，超多人！

1930   東門美容

2200   過關回港，超超超多人！

2230   BEN駕車上水接我地，呆等左我地一個鐘，去左火炭津津食雞粥

今次有好多難忘時件發生，BEN訓過龍啦，唔係我打去佢屋企都唔知幾時先識醒！至於長隆遊樂場，最難忘既機動遊戲係摩托過山車同十環過山車：摩托過山車好型，坐住我至愛既電單車一樣，速度好快，最攪笑係面向鐘頭笑住影相時，突然"BOMB"一聲開始，成個人好似差ｄ向後飛出車咁，全程好驚好驚，係咁叫，其實係個速度好快先咁驚，本身條軌道都冇咩勁位；十環過山車就真係好多環，係咁狂轉，都幾刺激，落返地面腳步會浮浮地呢！

其次就玩左洗衣機，比ｄ醜態大家睇吓啦，仲有4D立體影院等等！

至於全team人最勁，就係BEN同琪琪喇，因為淨係得佢兩個夠膽玩一個好得人驚既遊戲，好似叫ｘｘ大陀螺，我只可以講係勁過海盜船十倍，睇movie就知！

另外有個好賤既射水遊戲，路人係可以比錢入機，每次一蚊，就可以有大概廿秒既變態時間，用水射玩緊遊戲經過既人！雖然玩緊遊戲既人都可以反射返出黎，但唔知係咪唔使入錢免費既關係，ｄ喉好似塞左咁，出唔到水乜滯，所以結局都係．．．凶多吉少！大家睇睇短片啦，真係好變態，又賤喎，但又真係好好笑呀！不過我發誓我冇份玩架，因為實在十個賤賤賤，我冇咁變態．．．其實原本係BEN同ALEX入去玩，點知比KAREN係出面狂射，KAREN又點會忍心射自己老公ALEX呢？所以遭殃既都係BEN，佢出到黎全身濕晒，頭都未抺乾咁，我諗佢連底底都濕埋！為左氹返BEN，KAREN就換了十個一蚊被BEN發洩返當報返仇啦！不過呢個方法，見仁見智啦！哈哈！

至於大馬戲，一向興趣麻麻，驚入面好臭，但長隆大馬戲聽過好多人講話好得，一百蚊到既價錢值得睇過幾百蚊既莫斯科馬戲團好多！

最深印象係三個大鐵環既表演，三個人好似倉鼠咁轉黎轉去跳來跳去，仲係冇安全措施既，真係睇到個心卜卜跳，好驚險呀！

完場後勁多人，我又勁急尿，但條人龍睇怕要排成粒鐘先到！呢個時候，我做左一件咁大個女都未試過兼好大膽既事，就係．．．入男厠！其實係太陽哥哥叫我既，因為我真係十個勁勁勁急，唔係咁，都唔會行呢一著！佢搭住我膊頭，叫我望住地下，跟住佢行就得！最後我地行左入最入個格，我拿拿聲去完就閃，真係成個人舒服晒，係成世女暫時去得最舒暢既一次！真架！！不過真係無人發現，其實個個都掛住屙，又咁多人，得鬼閒望您，所以各位朋友，下次遇到呢個情況，不妨參考我今次既做法啦！

BEN屋企好大好靚，係比個煤氣爐玩死姐，一係好凍，一係熱到劏雞咁，沖涼沖到好辛苦呢！有興趣大家可效法BEN屋企人，買黎間唔中for返上去渡假！

第二日訓醒後去左好旺既上下九步行街食午飯，個度真係好多人，仲有兩個好大既王老吉同枇杷膏呢！BEN山長水遠，一心諗住帶我地去陶陶居，點知勁爆，唯有轉去蓮香樓，咁辛苦黎到食唔到陶陶居都有ｄ失望．．．

不過大陸食野真係好抵，叫左十四碟點心加兩個小菜，埋單都係二百蚊！但其實我地得四個人，叫太多了，最衰都係BEN，發晒狂咁！我個人覺得最好食係鳯凰流沙飽，個包皮溝埋蛋黃汁整架，好正；仲有香脆金沙腸，脆卜卜，好似炸兩咁！兩款都係推介黎架！芝士海鮮酥，聽個名就流口水啦，可惜賣晒，試唔到！最被昆應該係蟹柳紫菜卷，我以為係炸，點知．．．難食！

食飯時我地又昆左BEN，話同佢影張相點知拍左個好攪笑既MOVIE，大家又欣賞下傻BEN又一最新傑作啦，哈哈！

過關回香港係我親眼見過最多人既一次，直情係人貼人咁行，好犀利，累到BEN等左我地好耐，楂車接我地都要受罪，真係超唔好意思！

回港後我地去左火炭津津食雞粥慰勞返BEN，雞粥真係好味，不過唔係咁抵，七十幾蚊煲，可能食慣左大陸Ｄ平野呢！另外仲有蠔餅、鵝腸、瀨尿蝦、豬紅蘿蔔豬皮，不過通通都麻麻，好普通姐！

兩日一夜既行程就咁劃上左完美既句號喇。

2007-04-06 SZ & HK 兩邊飛，趕趕趕！

今日好趕，深圳香港兩邊飛，點解呢？

其實今個復活假好多未知數，攪到計劃真係有ｄ難度！又要同朋友去廣州玩，但日期一改再改；而我同太陽哥哥都想抽一日陪兩邊屋企人！到尋日先決定到今晚同媽咪食晚飯，誰知到尋晚凌晨，太陽媽媽話今日冇野做，提議一齊去揼骨，佢都知我地約左媽咪，人地都唔介意，又誠意權權，咁就去馬啦！

訓醒食埋早餐去到上水都一點幾，真係感激BEN由天水圍拎張瑪阿城VIP咭比我地，山長水遠上到去，其實應該玩多ｄ，食埋飯先抵，但冇計，約左媽咪七點，所以到揼完兼太陽媽媽刮埋沙後都五點，要沖涼換衫走啦，真係唔係幾好意思，太陽媽媽想按腳都冇時間！不過睇到，太陽媽媽爸爸個人真係冇咩所謂，好就得人，如果係媽咪，佢實又唔鐘意，難聽ｄ，有時仲會話我地都係搵佢攝時間，所以有時真係幾hurt！所以，我都幾欣賞太陽媽媽爸爸，起碼唔抗拒同佢地相處，易話為同脾氣好既人最容易相處，冇咩壓力，太好了！

跟住同媽咪食"金潮小廚"，係葵芳好出名架，上次仲撞到周慧敏添！今日仲有粒嘉賓，係琪琪既中學同學，呢餐飯冇咩特別，威哥又冇黎，一心只係想陪下媽咪，點知佢又好似唔係好領情咁，我咁趕都係為左同佢食飯，點知佢又好大反應話：喂！千祈唔好咁講呀，我冇話要架，唔好加係我身上呀！您話聽到灰唔灰？唉．．．有時，真係唔知佢想我點呀！佢幾時先可明白我地多ｄ呢？

總括今日真係趕趕趕，開始感受到要兼顧兩邊屋企既難處呢！

2004-04-04 威哥牛一

今日威哥牛一，十九歲啦，但思維仲係．．．

 我只想佢快ｄ長大，快ｄ生性，唔好再激我！

今日放假陪細妹做野，由於隻腳未消朣，行路都要就住就住，唔得太快！攪掂後就去左唱ｋ同探佢朋友剛出世的BB，等媽咪咸哥食晚飯！K既 tea set好滿意呀，賣相得，又好味，不過價錢就仲貴過人頭費，哈哈！

我地去左我推介既"泰妃雞"食，個度既海南雞飯真係食極都咁好味！不過真係叫太多野食啦，有ｄ浪費．．．又因為個度太迫，食得唔係咁舒服，有ｄ趕，所以都冇影大合照，大家都食完各就閃，連威哥都係，攪到媽咪要自己一個返屋企添，佢又好似唔係咁開心啦，唉．．．

2007-04-03 泰國朋友的回覆

等左好耐，終於收到泰國朋友的回覆了，開心地拆開，但．．．失望地收回，因為．．．都睇唔明，哈哈！睇黎要等下次同爸爸食飯先可以叫佢翻譯我知！

2007-04-02 美腿受傷了！

唔知因咩事，尋晚開始腳痛，今朝仲朣起左，朣到腳踭瘦個位都唔見左，痛到行路都好辛苦，睇完醫生，醫生話腳跟發炎，叫我停止郁動，仲比左兩日病假我呢！奈何我已身在公司，返屋企係一個遙遠既路程，所以都係選擇左留係公司．．．全日每行一步都痛呀，好辛苦先等到放工，平時一段行去搭校巴既四五分鐘路程，今日行左十二三分鐘，多得May幫我撐傘！