2009-05-29 (Fri) 新星飲茶．未來戰士2018

今日仍然係假期，太開心啦！

太陽哥哥今日都放假，不過早上佢有野做，下午先join我；起身後先同媽咪威哥去新星飲茶，因為媽咪話呢度抵過青衣城，我一拎位後第一件事就係問呢度有冇得泊車，因為想下次同諾諾黎麻，哈哈～～可惜呢度係冇free parking，如果楂車黎，要泊係隔離個居屋青宏苑停車場，最近架啦喎．．．表姐：您考慮下啦！

呢度有咩咁抵食？大家估下呢個點心拼盤同埋鳳瓜排骨飯幾多錢？

答案：每客$6.8咋！仲係任叫幾多客都得，真係勁抵呀！尤其是個點心拼盤，我好鍾意食餃，我諗我一個人黎食，叫兩客食都夠我一餐啦！

呢個迷你粉麵孖寶都幾抵食，任揀一客大點點心加粉麵，只係$28！

話係迷你粉麵，都唔算細碟，我地配左雞札，不過唔記得影相！

另外叫了點心紙上的流沙包同牛肉，點心紙的點心就係正常價錢，大家要留意喇，唔係樣樣都$6.8架！

埋單$97，連威哥都餵到飽一飽，呢個價錢好抵架啦！

下午同太陽哥哥係旺角睇左兩點幾場既"未來戰士2018"，我覺得一般，麻麻地，雖然都有好緊張既場面，但都係以往個ｄ好睇ｄ！

行街時見到匯豐咭izzue有折，買了兩件tee送比太陽哥哥；一個款買兩隻色，因為白字個度係夜光黎架，真係幾靚，我都好鍾意，所以最sharp個兩隻色都買晒送比佢！

太陽哥哥就買了一條勁鬆身裙褲比我，因為free size，冇得再細條ｄ，著上身好似過大咁；不過唔緊要啦，黑色唔太覺，最重要係．．．入面好通爽呀！哈哈～～

跟住返太陽哥哥屋企食飯，成兩個禮拜無見太陽爸媽啦，佢地屋企個油油project都剛完工，全屋又係好亂．．．飯後我地又搬左幾袋野返去，又繼續執下野，又繼續添置日用品．．．呢個假期除左貪新鮮買左好多野飲放係雪櫃外，亦都買左好多日用品，仲陸續有黎呢，原來一頭家都有好多野要預備呢！