.gif)
原本今天．．．係一個特別日子，除左係好友休的生日外，亦係我地既大日子呢！因為不滿意新建好的場地，於是係上年年中決定放棄，重新揀過，重新揀場、睇場、夾日子．．．經過一段煩擾日子，總算定下新的922日子，這日子其實不太滿意，因為九月會熱，又係閒日；但如果唔要的話，睇怕要搵師傅重新擇過日，仲要等2010年啦！
雖然日子已改，不過今日總算曾經係一個大日子，我地都想係婚宴地區蒲下頭！等太陽哥哥放工後，我係SOGO等佢，香港SOGO終於有我鍾意既cheese curry杯麵啦，唔洗再搭朋友去日本旅行時買啦；不過仲未有第二鍾意的milk seafood，希望遲ｄ會有啦！
雖然香港有得買，不過價錢方面，貴過日本買架，@$20.1，呢個價錢可食到飯盒了；除左cheese curry，仲有新產品milk curry同cheese & garlic，我覺得幾貴，諗緊不如買兩個新口味試下就算了，點知太陽哥哥話鍾意食就買多少少啦，每樣買多個，一共買左五個！成百蚊先得五個杯麵，我成世女都係第一次．．．肉赤！不過真係多謝太陽哥哥咁錫我啦！
心癢癢想去婚宴場地望下，睇下有冇人執左我地二攤先，太陽哥哥話實有，我都唔信，點知黎到真係！太陽哥哥話當然有啦，又係星期六，又係全年八大好日之一，唉．．．諗起就有ｄ心傷，呢日仲係對我倆最好既一日黎架！可惜可惜～～
跟住我地係銅鑼灣行街，行到去灣仔，再坐叮叮去太古食野，太陽哥哥話有日lunch同同事黎呢間"圓鐵板燒"食過好好味喎！
望住廚師煮，好似好勁咁喎！
等左十五分鐘，終於有位，算等得快了，真係好彩！
我地叫左牛肉片同羊肉片各一客：
我極少去太古城咁偏遠既地方，點知今日係度竟然撞到kammy，又係食呢間，咁有緣，梗係影返張相先啦！
好在撞到 kammy，咁佢就可以幫我同太陽哥哥係呢個特別日子影返張合照呢！
仲有呀，早前去過教協，個度冇大富翁啤牌買；今日就去埋太古城玩具反斗城買左幅啦！
沒有留言:
張貼留言