尋日同諾諾玩到五點幾後，我就會合太陽哥哥，仲有呀仔同hazel，搭火車上常平，參加呀仔個細佬個囡囡兩歲既生日飯，關係聽落好複雜吧？哈哈～～都係架，呀仔呢家人，同太陽媽媽工作的同事／雀友又係有關係架！總之就後生同後生既一group，大人又有大人既一group，而大家都係同一個家族啦！
去到深圳後就坐廣深鐵路上常平：
宜家ｄ廣深鐵路火車真係又靚又舒服，一ｄ大陸味道都冇，仲好乾淨添！
到達後，我地就坐的士黎到呢個名為"蘭桂坊"地方既"老林大石斑魚"酒家：
門口呢條大石斑，就係我地兩圍檯將會KO佢架啦，真係好大條架，聽聞只係兩千蚊人仔，係香港實食唔到呢個價錢喎！
呢個就係壽星女幸怡啦，同爸爸勁似樣呀！幸怡五月十九日就兩歲啦，同太陽哥哥同一日出世架！
其實係兩年前，我都有上常平參加幸怡既滿月酒架，大家得閒可去回顧返；當時幸怡係一個手抱ＢＢ，細到太陽哥哥都唔敢抱，轉眼就兩歲啦！
幸怡勁怕羞，佢對住陌生人唔會笑同唔講野，但人人抱佢又唔喊喎，只係好無奈咁既樣啫，好攪笑！
今晚係打邊爐式，食物全來自條大石斑，有魚片魚蛋魚肉魚餃魚塊等等，我知道後真係呆左，我最怕食魚肉，平時連魚片都嫌有骨．．．好在都唔係太濃的魚味，又冇骨，我今晚算成世人暫時食得最多魚既一晚了！
除左打邊爐，仲有熟食，有好正的蠔餅、老水鵝等，仲有個叫芥辣斑塊，我竟然好鐘意食，不過冇影相；仲有個魚腩煲，好多人食，太陽哥哥都話好好味，食左好多舊，但我覺得有腥味，食唔落．．．
呢個芋頭甜品又係正野！
幸怡傳下傳下，傳左去比我同太陽哥哥個度，又影幾張先～～
笑下啦，幸怡～～
生日飯後，大人返去打牌，後生既就搵節目，我地好似上次咁去左按腳，可惜呀仔同hazel有事要返香港，唔係就更加好玩啦！
按完腳後都成十二點啦，我地買左串燒就返去啦！食串燒係我特別要求架，因為上次食過之後都成日回味住；不過上次係叫外賣，今次就我地自己行埋買！
好多款食物任揀任燒，雖然我好鐘意食蠔，但係呢度，我就唔敢食啦，嘻嘻～～
去士多買野飲時，撞到梁靜茹，去到常平咁遠都撞到佢，真係有緣喇！哈哈～～
返到去開餐，呢度有好多串串燒呀；我冇記錯好似有十串牛十串羊廿串腎，仲有少少雞翼；最終．．．梗係食唔晒啦，唉！
呢度就係我地過夜既屋，好大間架，呢度係地下客廳，一入門口見咁大就影低相先！上到二樓我同太陽哥哥間房超大，唔怪之咁多人返大陸買樓，真係好正！不過我地好攰又眼訓，當時已經接近兩點啦，又要研究點用個熱水爐，同埋想洗頭又唔知有冇風筒，咁多野攪，都唔記得影相添，激死～～
訓醒第二日就執野離開，去飲早茶，途經尋晚好黑睇唔清楚的蘭桂坊區：
飲茶地方係新世紀酒店，亦即兩年前滿月酒的地方！
幸怡旁邊係爺爺嫲嫲邵生邵太，即係呀仔呀細既父母！
幸怡好鐘意食鳳爪雞腳類型既食物架，食到好開心呢！
呢餐太陽媽媽宴客，因為佢好似打牌贏左千五蚊，勁！呢餐超抵食呀，十三個人食到勁飽先四百蚊人仔有找！不過好似係邵生識人先打左六折，勁！
跟住我地就回程返香港啦，今日太陽哥哥放棄一日唔開工上黎當渡假，時間話咁快就過左，唔知幾時可以再一齊去下旅行呢！
沒有留言:
張貼留言