2008-06-20 (Fri) 難得拍拖Day

自從返part-time後，同太陽哥哥各有各忙，雖然佢好好咁成日放工後都走去cafe畫畫等埋我放工，但我地好少時間一齊行下街食餐飯，因為我多數weekday夜晚返工，而佢就weekend兩日日頭都楂車；今日係星期五，難得我唔洗返part-time佢又唔洗OT，我地就去左跑馬地食飯同係銅鑼灣行街喇！

part-time已經成日要去銅鑼灣，今日唔洗返都係要去銅鑼灣．．．冇計，因為我地想坐下電車浪漫下麻，哈哈！

我地係銅鑼灣搭叮叮去跑馬地，只係兩蚊雞位，又抵又好玩！仲咁好彩比我地遇到架咁colourful的叮叮，我最鍾意影colourful野！

我地就係去黃泥涌市政度食野喇，第一次黎係幾年前同tracy一齊，仲係jacky帶我地去食翅既；太陽哥哥鍾意食翅，一路都好想同佢黎食下！

上到二樓，一開門就有幾個呀姐企晒係度拉客，嚇得我丫！一邊係嫦記，一邊係銖記？揀邊間好呢？兩間人流又差唔多．．．

記得上次黎係食入面的銖記既，而今次招攬我地個位呀叔又好識做好好人喎，佢係嫦記人黎既，咁不如今次就試．．．嫦記啦！

我地叫左一個翅、一個攞獎菜式好似叫鮮奶竹笙西蘭花、一客風沙雞翼同一個雲南炒蜆！

比個食物close up大家睇下先，個翅真係好得，好足料好好味，一流（$6x）！平時好似要訂定的，但我地黎到仲早所以仲有；鮮奶竹笙西蘭花亦好好味（$6x），唔怪之得係攞獎菜式，我同太陽哥哥都好鍾意食竹笙架；風沙雞翼好香脆（$5x），食落亦唔油，但怕肥的我，食左一件連皮食後，其餘的都叫太陽哥哥幫我咬走晒塊皮先食！至於個雲南炒蜆就好麻麻喇（$7x），最衷係我啦，鍾意試新野，見豉椒炒冇咩特別，聽左呀叔介紹，試下雲南炒，佢當時講到話酸酸辣辣好開胃，我見佢講到咁泰式feel咁，我又鍾意食泰國野，咪試下囉，點知就"lai(拿)"野囉！酸酸辣辣炒出黎好怪呀，唔夾得黎仲炒得熟過頭有ｄ韌添！

食完野後搭返叮叮返銅鑼灣行街，去到剛開走了一班叮叮，就走入7-11行行，意料地比我發現．．．．．．

原來呢間7-11係全香港第一間7-11，開於1981年！嘩．．．開左咁耐架啦，我當時都仲未出世，仲老過我添！哈哈！