2011-03-16 (Wed) 韓國護肝寶

上月係韓國買的護肝寶，因為成 US389 一盒，買完一路想做個真正測試；問左中大醫生可幫我做 liver function test，最主要驗GOT+GPT，早幾日抽血驗左，咁可以開始食啦！

療程為期四個月，食完又做個test，睇下work唔work先！不過咁架，如果本身GOT+GPT偏高，食左兩個月話一定會降低（醫學角度），唔係可退款；但如果本身係正常，咁食左只係保健（保健角度）；其實我買黎食，主要係因為呢一兩年覺得自己身體差左，好易攰啦，朋友們都話我面色差左，黃黃青青咁，希望食左有改善啦！

2011-03-15 (Tue) Freelance+ing

呢幾天接左單freelance，今次本書又厚又細本，好難控制．．．唯有．．．

每做一頁夾一頁啦！

2011-03-14 (Mon) 白色情人節慶@MIST

因為上個月的情人節係韓國，沒有慶祝活動，只係行行程；所以今日的白色情人節，我同太陽哥哥一齊慶祝返！今次我地仲好認真，好似拍拖時咁約會，上open rice查下去邊度食，各自各買下禮物咁，而晚飯最後揀左試 MIST。

係open rice睇得出 MIST 係貴價拉麵，要百幾蚊碗，但口啤好好，所以都決定黎試；但黎到先知呢度唔太大間，仲係馬路邊的餐廳，感覺唔太high；但真係超好食，每個座位的抽屜都有貼心的預備，加分！

香焗千葉縣幸福麥豬～～侍應話佢地ｄ豬仔係日本千葉縣食小麥大架，有腩位同肩位揀，我地揀左腩位，真係超級好味，好幸福呀！絕對推介，爆燈讚！

辣蔥味噌湯底(Kara Miso Ramen)＋溏心蛋：

鼓油湯底(Soya Ramen)＋叉燒＋紫菜：

溏心蛋：

呢度真係樣樣野都好好味，太陽哥哥都勁讚拉麵同湯底，有機會必再光臨！

我送太陽哥哥的禮物～～亦買了一件比自己，因為三件抵ｄ，嘻嘻～～

太陽哥哥送我的禮物～～佢見買比我舊個支香水快用完，幫我補給，今次仲買了最大支裝！

今晚真係過左個又開心又滿足的白色情人節，重拾拍拖時的感覺，感覺好幸福呀！

2011-03-13 (Sun) 和風紙上燒@大家樂．甜品宵夜

今晚休＋CW有野約我地傾，傾完一齊食飯，去左大家樂試 和風紙上燒！

我地三個都食和風紙上燒，而太陽哥哥繼續食佬飯，哈哈！

係度又食又傾計，食左足足兩個鍾，再去食糖水，食到成十點半先走，今晚好癲呀！

今晚衣著好襯的兩個傻人：

今晚全程拎住呢兩舊大野（雙sink盤＋砧板掠水架），穿插旺角佐敦油蔴地，有點攞命，好在休幫手拎咋！