媽咪尋日聽完我講旺角有好多羽絨揀，佢今朝就話想出去行，佢話花園街都好多；咁我地就出太子先，先行花園街＋食車仔麵！
食完就一路向旺角方向行，行埋Quicksilver，仲有彌敦道既羽絨鋪頭，但真係好少岩心水既顏色呀；最後去返尋日同太陽哥哥睇過個既其中一間 - 戶外城！
呢間似乎最"市正"，加上贊助好多電視既旅遊特輯，連華仔都有份呢！
最後呢兩件最岩，亦係尋日有睇中既其一，媽咪係度可以幫下眼揀；最後始終嫌藍色唔夠sharp，雖然佢係有牌子(lafuma)，但我係要牌子定要靚中間，都係揀左後者，因為最重要影相出黎夠靚，所以就梗左第二件喇！
呢個藍就超級靚啦，可惜係男裝風褸＋fleece．．．
跟住出旺角另一目的，去油蔴地拎媽咪信用咭禮物 - 手提旅行喼一個，都幾重架．．．
見到Kleenex靚靚紙巾，我最鐘意卡通可愛紙巾，即買！
行到攰就同媽咪去左義順食雙皮奶，都好味，不過個人鐘意澳洲牛奶公司多ｄ！
唔知今日係咪媽咪心情靚呢？夜晚有好豐富既晚餐呀！
Happy New Year!! Welcome to 2010!!
今日訓到下午一點先起身，好鐘意可以訓到自然醒的感覺！其實唔係太陽哥哥唔知係出面整咩有聲，我都繼續訓緊；後尾先知原來佢抹地，既然為屋企貢獻，咁就唔怪佢啦！
起身後約左太陽媽係旺角食午餐，跟住同太陽哥哥行街，主要睇下羽絨，因為如無意外，應該會同表姐家一齊去韓國玩，諗到可同諾諾一齊玩幾日就開心呢！
旺角原來都有好多樓上鋪賣羽絨，不過我都係齋睇，想睇定ｄ先；因為我本身勁唔鐘意著羽絨，著到又肥又論盡，又揹唔到手袋喎，加上係香港既天氣，我都唔需要著羽絨，亦唔想為左去個短trip而花太多錢去買件羽絨；如果要買，我一定要買靚靚顏色架！好似呢幾件既顏色就岩我心水，不過款同cutting就冇咩特別，各有好壞，未係有件perfect既．．．
今日可能晏出動，好快就天黑了，我地就去左朗豪坊Market Place買牛扒＋麵包返屋企開爐！今日係2010第一日，又係我地真正用屋企爐煮既第一餐飯，可謂雙重意義！希望有個好開始，黎緊呢年都事事順利，甜甜蜜蜜，多點歡笑，少點煩惱！
