2008-09-02 (Tue) 麵包超人捐獻

我公司一向有個chip n dale箱仔，平時多數用黎裝ｄ小零食，比如餅仔朱古力仔糖仔呀咁，但近日清晒倉，冇晒野食．．．．

於是就同同事開玩笑，打個個蓋話有冇咩捐獻呀？

點知麵包超人經過，佢就話：好！等我比晒我ｄ散銀您！跟住佢就入房將佢檯上的散銀兜ｄ散銀放晒入黎呀！嘩，原來都有$56呀！！

我就拎晒去零食物語買野食，計埋九五折，共$55.8，係咪好叻女呢？嘻嘻~~

不過ｄ零食咁大包，又唔係一舊舊仔，放唔到入chip n dale箱仔呀！睇黎．．．都係要繼續搵捐獻先得啦，哈哈！

2008-09-01 (Mon) 好多好多日本手信呀!!

今日好多日本手信呀，因為yammy同professor係大阪帶完團返黎啦；ｄ日本零食包裝精美，令人唔忍心拆開個盒，連食完都唔捨得丟呢！點解佢地去大阪，但手信盒上全都寫"關西"限定既？關西同大阪有咩關係呀？

呢隻薯條好好味，不過都唔及北海道個隻正中，可能呢款帶ｄ薯菜味道，但都好脆好好食呀！

呢隻樂天熊仔餅，味道一樣，但包裝盒勝香港好多，六角形包裝盒共三幅圖；而入面再有四款包裝，仲有張好cute的紙仔！

呢款又係脆卜卜，好香口，有ｄ似橙色個隻旺旺，唔錯唔錯！

日本白桃新鮮運到，每個都好大個，最重要係甜過同香過香港個ｄ好多好多！但每位同事只分到一個的四分一，唔夠喉呀！><

有份去的george(同學仔)都好有心，又買左手信比我地office呢！

呢個糯米糍個樣雖然麻麻地兼唔吸引，但點知一咬落去，好煙韌仲勁好味，正呀！

除左official手信外，亦有yammy的私人愛心手信 - 心型紮辮橡筋，係我鐘意的心型呀！心面的顏色，好似雲石咁，仲帶點幻彩feel呢！

仲有搭yammy買的杯麵，雖然買唔到cheese curry味，但買到milk seafood都一樣開心，可以同太陽哥哥一齊開餐麻！