早於兩星期前，表姐話諾諾學校攪Outing活動，去位於上水既「假日農莊」(http://www.hkhfarm.com/)，內容非常豐富架，有：農耕體驗埸、翻土、灌溉、打水、人力車、腳踏水車、親親黃牛可餵養、磨豆及舂米、餵飼小動物、小吊籃、玩沙樂、優閒吊床樂、自製創意焗麵包、稻草人扎作、釣魚、自製拉麵、聰明車、自轉棉花糖等等．．．因為表姐宜家個肚好大呀，加上好易攰，唔能夠陪住諾諾玩成日呢ｄ咁勞動既活動，就叫左我幫手做諾諾的 helper；我見到咁多野玩都覺得好正，所以都請定假陪諾諾玩！
點知，諾諾上個weekend開始病，仲發高燒，燒完又停，停完又燒．．．禮拜中已擔心再唔好返，今日實去唔到玩啦！點知呢幾日又天陰又落雨，係尋日，諾諾學校出左通告，因為天雨關係，取消唔去假日農莊啦，改去天水圍的濕地公園．．．
濕地公園真係麻麻地囉，加上諾諾都未係完全好返，所以同表姐講定今朝再決定去唔去．．．大約六點幾，表姐夫發左短訊比我，話諾諾仲係咳得好犀利，唔去啦．．．我本身諗住咁不如返工啦，但尋晚同太陽哥哥食宵夜好夜先訓，加埋請左假既holiday mood，今朝真係唔願起身呀，所以繼續訓．．．到九點，表姐打比我，原來佢見唔到我online，估我係咪仲訓緊等佢通知，哈哈！佢打比我，我話比佢知唔願起身都係繼續放假唔返工啦，而咁岩佢話諾諾又冇咁咳，唔去濕地公園，一係一齊飲茶啦！
就係咁我地係青衣城一齊飲茶，飲完茶諾諾玩左陣食錢車車，睇佢幾開心，有入錢唔同 feel ｄ吧！
諾諾因為病，成個禮拜都冇出過街，佢今朝出黎後，唔知係咪外間draw左佢attention，冇係屋企咳得咁誇咁犀利；表姐就話咁不如我地自己去Outing啦，出去玩下呼吸下新鮮空氣對個病都好，我地就去左赤柱喇！
Yellow 諾諾 VS Yellow Mini Cooper：
揀赤柱係因為有藍天＋白雲＋沙灘，可以同諾諾玩沙！早前表姐係Bossini仲換左個帳篷，大派用場，我地將隨身物品放晒係入面，勁有用呀！
諾諾既玩沙裝備，係麵包超人系列呀！
跟住我負責睇住諾諾，表姐就訓覺休息！
諾諾原來鐘意咁樣玩沙架，玩到成身都係；佢仲要"楂"ｄ沙係我手同撥ｄ沙落我度添架！
跟住諾諾想潑ｄ沙落訓緊覺既表姐度，可能想媽媽同佢一齊玩啦，我當然阻止啦，唯有用其他野引開佢注意力，就係帶佢．．．行沙灘喇！行行下都想帶諾諾踩水架，沿住水邊咁行應該好浪漫麻，哈哈！不過我最後都唔敢，所以冇落到咁低！
我地就係沙灘周圍行，同踩上ｄ小沙山度！
跟住諾諾發現沙上有車軚行過的痕跡，佢就好好奇咁跟住行！
我地玩到夜晚六點就走～～今日赤柱的戰利品，係兩件我超級鐘意的初生size BB衫！勁鐘意藍色個件，後面好似有翼的天使仔咁！
今晚約左太陽爸媽食晚飯，因為太陽哥哥未放工，我就係姑媽屋企hea．．．等到成九點半先有得食，我地去左大圍既"金曼谷"，我鐘意的泰國菜！
太陽爸媽星期日就出發去澳洲探親，為期13日，真係羨慕死人；我都想去旅行呀，但要儲多ｄ錢先得！
