2009-03-27 (Fri) 後補的ticket holders & 婚妙相 fittings again

 

太陽哥哥送了我兩個後補的ticket holders，以前睇演唱會佢事前會整定架，近來都沒有了，我同佢講，今時唔同往日啦．．．其實都知佢呢排好忙，忙住畫畫畫，點知佢聽完就拿拿林整返比我，哈哈～～ 不過都唔知係咪因為大哥，佢先順便整埋個梁靜茹比我呢？係佢就死梗！><

 

爭取到多一次婚妙相 fittings，太好了！由於下星期要影，時間無多，今日放工即去！ 試返自己係網上面揀左，但前日冇試的款；大公司真係服務質素保證，我仲擔心唔好意思，又怕尷尬，點知試身部sales姐姐冇事喎，仲好好service，真係好impressed！

呢件金色我幾鐘意呀，唔洗用鋼紗但裙腳都有"拋拋地"既感覺，岩晒我怕漲卜卜的裙腳！可惜太淺色．．．

呢個蘋果綠隻色我都鐘意呀，終於有ｄ顏色睇下冇咁齋，可惜．．．個胸現到好大咁，我唔鐘意大波呢！

呢件都唔錯，不過又係同一個問題，太淺色．．．

呢個係薛凱琪的黃色呀，相版真係睇唔出，上次話租左冇期，點解無拿拿又會有得試既？因為我有反映比門市部sales姐姐知麻，我話您又話唔洗爭衫，點知無期呀，我好失望呀等等．．．原來反映有用架，唔理門市部同試衫部當中點啦，最終比我試到，我梗係覺得開心返啦！

睇相以為係粉藍色，點知原來係淺紫色，感覺一般，未至於肉酸，但感覺都係大個左．．．

 

婚紗方面，幾乎係重新試過晒，因為晚裝轉左款，所有野要從新配搭過！

呢件前日有試過架，但當時唔太起眼，今次因為第二次試，亦係最後一次機會，每件衫都會試得仔細ｄ同嚴謹ｄ，所以今次呢件起眼好多！

呢件未試過架，其實cutting真係好靚，吊帶款冇low cut咁悶，個蝴蝶又出，幾特別！可惜著到個胸好大咁，同埋唔夠修腰．．．

呢幾件前日都試過，再試多次啫；試多次都好，因為太陽哥哥前日係未睇過我真人著出黎架，當時佢放工黎到我已經試晒咁滯，佢只係係電腦睇相咋，嘻嘻~~

一向諗住會揀一婚紗兩晚裝，最後揀左兩婚紗一晚裝，因為結婚相麻，當然係著婚紗啦，估唔到最後自己變得咁同意呢個想法，哈哈！

今次fittings完後，係帶住開心與滿足離開，真係好開心好滿意，笑到四萬咁口，太陽哥哥話我同前日判若兩人呢，因為個日係帶住猶豫同擔心咁離開架！elsa今日黎唔到，我以為會大亂，點知出奇地，我變得冷靜、果斷，同平時十五十六、猶豫不決的性格完全唔同，上面個個又似乎做緊野喎．．．elsa黎唔到，我試過短暫唔開心，覺得點解比個咁既安排我呢？但事後發現，呢個自己認為係最好既安排，原來未必架，總之真係要信佢會安排最適合既比您就得架啦！

elsa一直都好想黎，可惜黎唔到，但我都好多謝佢的所有幫忙與支持，真係好多好多好多好多．．．妳之前比我既步驟提示紙仔真係好有用，令我頭腦清晰好多，冇妳就幣了！尋晚仲同妳一齊祈禱，係我既第一次，難忘＋好笑！雖然妳最後都係黎唔到，但妳既步驟提示紙，可能係佢其中一個安排呢，因為我諗返，您原本尋日係唔洗返PT架，無端端要您返去幫手，可能佢一早做緊野呢！如果係，妳就係佢安排比我身邊的一個小天使呢！

今日太陽媽媽都有黎睇我fittings呀，感覺幾特別，最記得有一幕係，我一出黎企定準備影相時，佢急步行埋黎我身邊，踎底，跟住同我整好條拖尾．．．嘩，呢下．．．感覺好難形容，莫名的窩心與感動，好開心，覺得佢真係好錫我呀！