今日係太陽哥哥考的士牌的日子，呢兩個月黎，因為要應付今日的考試，佢日日放工就去上堂，每日三個鐘，上足咁多個星期！加上好多野要記同背，以我所知，要考的士例、交通例、路名；我平時都會同佢溫習路名架，淨係呢部份都要背晒六百幾條街名，每次問都要個幾鐘先問晒，我見到佢真係付出左好多心機同時間架；前排佢整親手冇得碌齡，佢陪我去碌，自己就坐埋一邊乖乖溫習架！
點解要考？其實都為當一技旁身同可當兼職，譬如想轉工，唔想求其搵，中間的空檔期，唔想手停口停，有定個的士牌就可有用喇；而平時得閒的話，亦可當兼職搵多ｄ錢，因為我地想一齊儲多ｄ錢呀！
為鼓勵佢考試，我尋晚就請左佢去板前食壽司，我地第一次食板前咋，基本上迴轉壽司之前都係同佢食過一兩次，因為我唔食魚生，又唔鍾意食咁多飯落肚，通常去日本餐廳食多，有熟食麻；不過我知佢都幾鍾意食壽司，亦想鼓勵佢努力"上路"，就踏出左我地的第一次啦！
因為要等太陽哥哥放學，我特登早左半個鐘黎排隊，食時都成九點幾，所以我地好肚餓，食左好多呢！我對壽司無太大研究，但我覺得板前都係一般咋喎，點解成日排長龍架？兩個人食左三百五十蚊，我覺得呢個價錢，好似元氣抵食ｄ喎，係咪一間間舖唔同呢？
尋晚同今朝幫太陽哥哥作最後revision後，佢就一早返學校做模擬考試了，同佢分別時都好緊張，但又唔可以表露出黎喎，唔想加大佢壓力麻！點都好啦，佢咁努力為我地將來，無論成績係點，我都準備左張證書比佢！但我又唔知佢結果係點，所以寫左兩張紙仔，一張係考到的獎勵，一張係考唔到的鼓勵同支持，諗住到時知結果後隨機應變！
打開證書係咩黎？咪就係．．．太陽哥哥至愛的成龍大哥戲飛囉！
其實功夫之王尋日已上畫，但太陽哥哥要考試唔睇得住，今日仲唔拿拿林睇咩，佢實會好開心啫！不過太陽哥哥想睇英文版聽大哥講英文，但英文版真係好難搵呀，成個旺角都冇，有都係好遠的IFC，太古城等．．．為求買到好位，我每日都上網check住今日會出咩場同時間，好在係星期三個日，比我摷到GH加左港威有得播咋！
最後結果係：太陽哥哥順利過關，PASS！好戥佢開心！雖然唔係我去考，但我既心真係十足考個個咁，未考時好緊張，考緊時又狂睇錶，考到時又勁開心，哈哈！
收到我的證書禮物後，佢當然sweet啦，我地去左食泰國人海南雞飯（唔記得影相），只係share一碟食咋，因為食少少野先，想睇完戲先再去慶祝！跟住去左citysuper買零食睇戲！睇下，全部都係日本野，有我係日本愛飲的bikkle；見到有粟米湯味chips喎，我咁鍾意飲粟米湯，又點會唔試下呢！其次就係芝麻糯米滋入貨，太陽哥哥知我鍾意食，就二話不說買兩包比我啦！yeah~~
我地第一次去港威睇戲，嘩，個銀幕好細呀；大家如果去睇，記得買前ｄ！呢套功夫之王，我的評價係．．．爛！可能用英文講中國故事，好怪．．．學太陽哥哥話齋，拍比鬼佬睇麻．．．除左打交位緊張ｄ外，我嫌略多講故仔位，悶到我中段都訓著左，我仲發現太陽哥哥都有呀，連佢至愛的大哥都竟然訓著，可想而知．．．
睇完戲後，我地落旺角諗住食野，點知落到旺角都係未肚餓，結果咩都冇食，最後行左陣就返去；夜ｄ肚餓，就食埋係北海道買的最後兩個杯麵，好唔捨得呀！如果有朋友去開日本，可以的話，請幫我入貨丫，記住係 milk seafood 同 cheese curry 味道呀！
睇下ｄcheese溶晒係面，好正呀！今日食左好多日本野，由citysuper的bikkle開始．．．好似返返北海道咁，哈哈！
沒有留言:
張貼留言